Read O‘zbek tilidagi Muqaddas Kitob, 2013 Ishayo 66 Bible Online

Ishayo 66 - O‘zbek tilidagi Muqaddas Kitob, 2013 bible

Ishayo 66

¹Egamiz shunday aytmoqda: “Osmon Mening taxtimdir, Yer oyog‘im tagidagi kursidir. Menga qanday uy qurib bera olasiz?! Qaysi joy Menga maskan bo‘la oladi?!

²Axir, hammasini O‘z qo‘llarim bilan yaratganman, Ha, bularning hammasi shunday paydo bo‘lgan, — demoqda Egamiz. — Kamtar, mo‘min bo‘lgan odamga, Kalomim oldida titraydiganga Men e’tibor bilan qarayman.

³Ammo, buqani qurbonlik qiladigan odam, Odam o‘ldirgan qotil kabidir. Qo‘zini qurbonlik qiladigan odam Itning bo‘ynini sindirgan odam kabidir. Don nazri qiladigan odam Cho‘chqa qonini nazr qiladigan odam kabidir. Tutatqi tutatgan odam Butga topinadigan odam kabidir [1]. O‘shalar o‘z yo‘llarini tanladilar, Qilgan jirkanch ishlaridan jonlari lazzat olar.

⁴Men ham ularni qattiq jazolashni tanlayman. Ular nimadan qo‘rqsa, o‘shani boshlariga solaman. Axir, chaqirganimda, hech kim javob bermadi, Gapirganimda, hech kim quloq solmadi. Ular Mening oldimda qabihlik qildilar, Meni mamnun qilmaydiganlarni tanladilar.”

⁵Ey Egamizning kalomini eshitib, titraydiganlar, Uning so‘zlariga quloq tutinglar: “Qardoshlaringiz sizdan nafratlanadi, Mening nomimni deb ular sizni haydagan. Sizlarni mazax qilib, shunday degan edi: ‘Qani, Egangiz ulug‘vorligini ko‘rsatib, Sizlarni qutqarsin. Xursand bo‘lganingizni ko‘raylik–chi!’ Endi o‘shalar sharmanda bo‘ladi.”

⁶Shahardan kuchli shovqin–suron kelmoqda! Ma’baddan bir ovoz eshitilmoqda! Bu Egamizning ovozidir! U O‘zining dushmanlariga Qilmishlariga yarasha qaytaradi.

⁷Mana, Quddus to‘lg‘oq tutmasdan oldin tug‘di, To‘lg‘oq tutmay turib, bir o‘g‘il tug‘di.

⁸Kim bunday voqeani eshitgan?! Kim bunday hodisani ko‘rgan?! Xo‘sh, yurt bir kunda paydo bo‘ladimi?! Bir onda butun bir xalq dunyoga keladimi?! Qarang, to‘lg‘og‘i tutar–tutmas Qiz Quddus [2] o‘g‘illar tug‘di.

⁹“Tug‘adigan paytgacha olib kelamanu Tug‘ishga kuch bermaymanmi?! — demoqda Egamiz. — Tug‘ishga kuch beramanu Bachadonni yopib qo‘yamanmi?!” — deb aytmoqda Xudoyingiz.

¹⁰Ey Quddusni sevadiganlar, Quddus bilan birga sevining, Hammangiz u bilan birga shodlaning. Ey Quddus uchun aza tutganlar, U bilan birga xursand bo‘ling!

¹¹Siz uning ko‘kragidan emganday bo‘lib, To‘yib, tasalli topasiz. Qonib–qonib ichib, Uning mo‘l–ko‘l barakasidan zavq olasiz.

¹²Ha, Egamiz shunday aytmoqda: “Qarab turing, Quddusga tinchlikni daryo kabi, Elatlarning boyligini toshqin irmoq kabi oqizaman. U sizlarni emizikli boladay qo‘llarida ko‘tarib yuradi, Sizlarni tizzalariga o‘tirg‘izib, parvarish qiladi.

¹³Bolasini ovutgan bir ona kabi Men ham sizlarni ovutaman. Sizlar Quddusda tasalli topasiz.”

¹⁴Bularni ko‘rib, qalbingiz shodlikka to‘ladi, Tanangiz yangi maysa kabi hayot bilan to‘liq bo‘ladi. Egamiz O‘z qullariga qudratini, Dushmanlariga esa g‘azabini ko‘rsatadi.

¹⁵Mana, qarang! Egamiz olov bilan kelmoqda, Uning jang aravalari quyunday kelmoqda. U ayovsiz qasos oladi, G‘azabi olov kabi yonadi.

¹⁶Ha, Egamiz olovu qilich bilan Jamiki jonzotlarga qarshi kurashadi. Uning qo‘lidan ko‘plari halok bo‘ladi.

¹⁷Egamiz shunday aytmoqda: “O‘zlarini poklab, butlarga bag‘ishlaganlar, sajdagoh bog‘larga [3] borib, yo‘lboshchilariga ergashganlar yo‘q bo‘ladi. Cho‘chqa va boshqa harom, makruh hayvonlarning go‘shtini yeydiganlar, ularning hammasi birgalikda halok bo‘ladi.

¹⁸Ularning ishlaridan, o‘ylaridan nafratlanaman [4]. Hamma xalqlarni, elatlarni yig‘ish vaqti keldi [5]. Ular kelib, Mening ulug‘vorligimni ko‘radilar.

¹⁹Men ularning orasida nishona ko‘rsataman. Omon qolganlarini quyidagi xalqlar orasiga yuboraman: Tarshish [6], Liviya [7] xalqlariga, kamonchilari bilan mashhur bo‘lgan Lidiya [8] xalqiga, Tuval [9] va Grek [10] xalqlariga, dengiz ortidagi Men haqimda eshitmagan, Mening ulug‘vorligimni ko‘rmagan xalqlarga. Ular Mening buyukligimni o‘zga xalqlarga bildiradilar.”

²⁰Egamiz shunday deydi: “O‘shanda ular barcha xalqlar orasidan qolgan hamma birodarlaringizni olib kelishadi. Isroil xalqi toza idishda Men, Egangizga nazr olib keladi. Birodarlaringizni ham xuddi shunday qilib, olib kelishadi. Ularni otlarda, jang aravalarida, ot aravalarda, xachirlarda, tuyalarda muqaddas tog‘im [11] — Quddusga nazr sifatida olib kelishadi.”

²¹Egamiz shunday deydi: “Ularning orasidan ba’zilarini ruhoniy, ba’zilarini esa levi qilib tayinlayman.”

²²Egamiz shunday aytmoqda: “Men yaratadigan yangi yer va yangi osmon ko‘z oldimda qancha turadigan bo‘lsa, avlodlaringiz ham, nomingiz ham shuncha turadi.

²³Har yangi oy bayramida, har Shabbat kunida jamiki insonlar huzurimga kelib, Menga sajda qiladilar, — demoqda Egamiz.

²⁴— Ular tashqariga chiqqanlarida Menga qarshi chiqqanlarning jasadlarini ko‘radilar. O‘sha jasadlarni yeydigan qurtlar o‘lmaydi, ularni yondiradigan olov hech qachon o‘chmaydi. Hammasi barcha inson zotiga jirkanch bo‘ladi.”