Read O‘zbek tilidagi Muqaddas Kitob, 2013 Ishayo 8 Bible Online

Ishayo 8 - O‘zbek tilidagi Muqaddas Kitob, 2013 bible

Ishayo 8

¹Shunda Egamiz menga aytdi: — Katta lavha olib, unga: “Moxirshalolxoshbozga [1] tegishli”, deb tushunarli qilib yoz.

²Men ruhoniy Uriyo bilan Yabarakiyo o‘g‘li Zakariyoni O‘zimga ishonchli guvohlar qilib tayinlayman.

³Shundan keyin men xotinim bilan yotdim. U homilador bo‘lib, o‘g‘il tug‘di. Shunda Egamiz menga dedi: — Uning ismini Moxirshalolxoshboz, deb qo‘y.

⁴Bola hali “ota”, “ona”, deb aytishni o‘rganmasdan oldin, Ossuriya shohi Damashqning boyliklarini va Samariyadan tortib olgan o‘ljalarini olib ketadi.

⁵Egamiz yana menga gapirib: —

⁶Bu xalq tinch oqadigan Shilo‘vax suvlaridan [2] voz kechdi, Ratan va Ramaliyo o‘g‘li Pekaxdan ko‘ngillari shod bo‘ldi, — dedi.

⁷— Shuning uchun, Men, Rabbiy, xalqimga qarshi Ossuriya shohini va uning butun shavkatli lashkarini boshlab kelmoqdaman. Ular Furot daryosining bahaybat to‘lqinlari kabidir. Hamma irmoqlardan oshib, hamma qirg‘oqlardan toshib ketadi.

⁸Sel kabi Yahudoni bosadi, uning bo‘g‘ziga yetib keladi. Ey Immanuil! [3] Yoyilgan qanotlari butun yeringni to‘ldiradi!

⁹Ey xalqlar, yig‘ilavering, halokatga yo‘liqasiz! Ey jamiki uzoq yurtdagilar, eshiting! Belingizni bog‘layvering, ammo halokatga yo‘liqasiz! Belingizni bog‘layvering, ammo halokatga yo‘liqasiz!

¹⁰Puxta reja qilavering, ammo puchga chiqadi, So‘z beravering, ammo amalga oshmaydi, Chunki Xudo biz bilandir! [4]

¹¹Egam qudrati bilan meni O‘ziga tortib, menga ko‘rsatma berdi: — Bu xalqning yo‘lidan bormanglar.

¹²Bu xalq, isyon, deb aytadigan hamma narsani sizlar, isyon, deb bilmanglar. Ularni qo‘rquvga soladigan narsalardan sizlar qo‘rqmanglar, vahimaga tushmanglar.

¹³Sizlar Men, Sarvari Olamni muqaddas deb izzat qilinglar. Faqat Mendan qo‘rqing, faqatgina Men sizni vahimaga solay.

¹⁴O‘shanda Mening O‘zim panoh bo‘laman. Ammo Isroilning ikkala xonadoni uchun Men qoqiltiradigan tosh, to‘sqinlik qiladigan qoya, Quddus aholisi uchun tuzoq va to‘r bo‘laman.

¹⁵Ulardan ko‘plari qoqiladi, yiqilib, burda–burda bo‘ladi. Ular tuzoqqa tushib, asir bo‘ladi.

¹⁶Dalilimni o‘rab bog‘la, shogirdlarim orasida ta’limotimni muhrla.

¹⁷[17-18] Sarvari Olam Sion tog‘ida maskan qilgan. U Yoqub xalqidan yuzini yashiryapti, ammo men Uni kutaman, umidim Undadir. Mana, qarang, Egam bergan farzandlarim bilan birga men shu yerdaman! Isroilda biz belgi va nishonamiz [5].

¹⁹Xalqlar sizlarga: “Otalar ruhiga, folbinlarga, azayimxonlarga va afsungarlarga boringlar”, deb aytsalar, sizlar o‘z Xudoyingizga bormaysizmi?! Axir, tiriklar o‘liklardan nasihat izlab boradimi?!

²⁰Shunday deganlarga yorug‘lik bo‘lmaydi. Xudoning yo‘l–yo‘riqlari va ta’limotiga maslahat soling [6].

²¹Ular bu yurt bo‘ylab o‘tadi, ular och, iztirobda. Och qolib, g‘azablanib, shohini va xudolarini la’natlaydi. Yuqoriga qaraydi,

²²yerga qaraydi. Ana, kulfat va zulmat, g‘am va ofat. Ular yo‘q bo‘lib ketadi.