Read O‘zbek tilidagi Muqaddas Kitob, 2013 Ishayo 9 Bible Online

Ishayo 9 - O‘zbek tilidagi Muqaddas Kitob, 2013 bible

Ishayo 9

¹Biroq kulfatli joyda endi azob bo‘lmaydi. Boshida Zabulun va Naftali yurti [1] sharmanda bo‘lgan edi. Ammo kelajakda o‘sha dengiz bo‘yi, Iordanning narigi tomonidagi g‘ayriyahudiylar Jalilasi ulug‘lanadi.

²Zulmatda yurgan xalq yorqin ziyoni ko‘rdi, O‘lim soya solgan yurt aholisi ustiga nur sochildi.

³Bu xalqni Sen ko‘paytirgansan, Ularga ko‘p shodlik ato qilgansan. Hosil paytidagi mamnunlik kabi, O‘ljalarin bo‘lishib olgan paytdagi kabi, Ular huzuringda quvonchga to‘lgan.

⁴Bu xalqning og‘ir bo‘yinturug‘ini, Yelkasidagi tayog‘ini Sen sindirib tashlagansan. Zolimlarning kaltagini Midiyon xalqi kabi [2] Mag‘lub qilgansan.

⁵Jangda kiyilgan etiklar, Qonga belangan hamma kiyim Olovga tashlanib, yoqilajak.

⁶Mana biz uchun bola tug‘ildi, O‘g‘il bizga berildi. Hukmronlik Uning zimmasidadir, Nomi Ajoyib maslahatchi [3], Qudratli Xudo, Abadiy ota, Tinchlik shahzodasidir.

⁷Dovudning taxtida Uning hukmronligi ortib boraveradi. Tinchlik to abad hukm suradi. Hozirdan boshlab, to abad Adolat va solihlik ila Shohligini mustahkamlab, barqaror qiladi. Sarvari Olam jon kuydirib, Buni bajo aylaydi.

⁸Yoqub nasliga qarshi Rabbiy bir so‘z yubordi, Uning so‘zi Isroil xalqiga yetib keldi.

⁹Efrayimda [4], Samariyada yashaydiganlar, Jamiki xalq bundan xabardor bo‘ldi. Ular dimog‘dorlik, kiborlik ila aytmoqda:

¹⁰“G‘ishtin imoratlar vayron bo‘lsa, Yo‘nilgan toshlar bilan quramiz. Shikamora–anjir daraxtlari kesilgan bo‘lsa, Ularning o‘rniga sadr daraxtlari [5] ekamiz.”

¹¹Ana, Oram shohi Ratanga qarshi Egam uning dushmanlarini qo‘zg‘atdi, G‘animlarini da’vat qildi.

¹²Sharqdan Oramlar, g‘arbdan Filistlar Og‘izlarin katta ochib, Isroilni yutib yubordi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.

¹³Bu xalq Sarvari Olamga yuz burmadi, Jazo berganga qaytmadi.

¹⁴Shunda Egam bir kunda Isroildan boshini va quyrug‘ini, Xurmosini va foydasiz qamishini kesib oldi.

¹⁵Oqsoqollar, amaldorlar boshdir, Soxta payg‘ambarlar quyruqdir.

¹⁶Ular bu xalqni yo‘ldan adashtirgan, Ularga ergashganlar boshi berk ko‘chaga kirib qolgan.

¹⁷Hammasi shakkok, qabihlik qilar, Barcha og‘izlardan ahmoqona so‘z chiqar. Rabbiy yoshlardan mamnun bo‘lmadi, Yetim, bevalarga shafqat ko‘rsatmadi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.

¹⁸Fosiqlik olovga o‘xshab yonar, Yeb bitirar butazoru tikanzorlarni. O‘rmondagi changalzorlarni yondirib, Balandlarga tutunini o‘rlatadi.

¹⁹Sarvari Olamning qahridan Yurt yonib bitar, Xalq olovga yonilg‘i bo‘lar, Odam o‘z yaqiniga shafqat qilmas.

²⁰O‘ng tarafga hamla qilar, Ammo och qolaverarlar. Ha, chap tarafda, yutaman, der, Ammo to‘ymaslar. O‘z qo‘lining go‘shtini yeydi insonlar.

²¹Manashe qabilasi yeydi Efrayim qabilasini, Efrayim esa Manasheni, Ikkovi birlashib Yahudoga [6] hujum qiladi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.