Read O‘zbek tilidagi Muqaddas Kitob, 2013 Levilar 11 Bible Online

Levilar 11 - O‘zbek tilidagi Muqaddas Kitob, 2013 bible

Levilar 11

¹Egamiz Muso va Horun orqali

²Isroil xalqiga shunday dedi: “Yer yuzidagi jamiki hayvonlardan

³ayri tuyoq va kavsh qaytaradigan har qanday hayvonni tanovul qilishingiz mumkin.

⁴Lekin kavsh qaytaradigan yoki ayri tuyoq hayvonlardan quyidagilarni tanovul qilmang: tuya kavsh qaytaradiyu, lekin ayri tuyoq emas. U sizlar uchun haromdir.

⁵Sug‘ur kavsh qaytaradi, lekin ayri tuyoq emas. U sizlar uchun haromdir.

⁶Quyon kavsh qaytaradi, lekin ayri tuyoq emas. U sizlar uchun haromdir.

⁷Cho‘chqa ayri tuyoq bo‘lgani bilan kavsh qaytarmaydi. U sizlar uchun haromdir.

⁸Bu hayvonlarning go‘shtini zinhor tanovul qilmang, ularning jasadlariga qo‘l tekkizmang. Ular sizlar uchun haromdir.

⁹Dengiz va daryolarda yashaydigan suzgichi va tangachalari bor har qanday jonivorni yesangiz bo‘ladi.

¹⁰Biroq suvda yashaydigan, suzgichi va tangachalari bo‘lmagan har qanday suzadigan va boshqa turdagi jonivorni yemang. Ulardan hazar qiling.

¹¹Bunday jonivorlar sizlar uchun jirkanchdir. Ularning go‘shtini og‘zingizga olmang, murdasidan hazar qiling.

¹²Suzgichi va tangachalari bo‘lmagan har qanday suv jonivori sizlar uchun jirkanchdir.

¹³Parrandalar orasidagi quyidagi qushlarni zinhor yemang, ulardan hazar qiling, ular sizlar uchun jirkanchdir: qumoy, boltayutar, tasqara,

¹⁴qizil kalxat, qirg‘iy va uning zoti,

¹⁵har qanday qarg‘a va uning zoti,

¹⁶tuyaqush, lochin, quloqli ukki, qarchig‘ay va uning zoti,

¹⁷yapaloq qush, baliqchi ukki, boyo‘g‘li,

¹⁸oq boyo‘g‘li, birqozon, jo‘rchi,

¹⁹laylak, oq qarqara va uning zoti, sassiqpopishak, qo‘rshapalak.

²⁰To‘rt oyog‘ida yuradigan hamma qanotli hasharotlar sizlar uchun jirkanchdir.

²¹Lekin qanotli hasharotlar orasidagi, to‘rt oyoqda yuradigan ba’zilarini yeyishingiz mumkin. Oyoqlari sakrash uchun bo‘g‘inlar bilan moslangan

²²chigirtkaning hamma turini va ularning zotini yeyishingiz mumkin.

²³Boshqa hamma to‘rt oyoqli, qanotli hasharotlar sizlar uchun jirkanchdir.

²⁴Ba’zi hayvonlar sizlarni bulg‘aydi. Ularning o‘ligiga qo‘l tekkizsangiz, kechgacha harom bo‘lasiz.

²⁵Harom hayvonning murdasini ko‘targan odam kiyimlarini yuvsin. U kechgacha harom bo‘ladi.

²⁶Tuyoqli, lekin tuyoqlari butunlay ayrilmagan yoki kavsh qaytarmaydigan har qanday hayvon sizlar uchun haromdir. Bunday hayvonning murdasiga tekkan odam harom bo‘ladi.

²⁷To‘rt oyog‘ida yuradigan panjali hayvonlar ham sizlar uchun haromdir. Ularning murdasiga tekkan har bir odam kechgacha harom bo‘ladi.

²⁸Bunday hayvonning murdasini ko‘targan odam kiyimlarini yuvsin, u kechgacha harom bo‘ladi. Ular sizlar uchun haromdir.

²⁹Yerda o‘rmalab yuradigan mayda jonivorlardan sizlar uchun quyidagilar haromdir: kalamush, sichqon, echkemar va uning zoti,

³⁰gekkon, kulrang echkemar, oddiy kaltakesak, cho‘l kaltakesagi va buqalamun.

³¹Bularning hammasi sizlar uchun haromdir. Ularning murdasiga tekkan odam kechgacha harom bo‘ladi.

³²Agar bunday jonivorning murdasi biror narsaning ustiga tushsa, o‘sha narsa harom bo‘ladi. Harom bo‘lgan bunday narsa — yog‘och, mato, charm yoki qanordan bo‘lishidan va nimaga ishlatilishidan qat’iy nazar, uni suvga botirib, chayib oling. Bu narsa kechgacha harom bo‘lib, so‘ng yana halol bo‘ladi.

³³Bordi–yu, bunday jonivor o‘lib, sopol idishning ichiga tushsa, idishdagi hamma narsa harom bo‘ladi. Shunda idishning o‘zini ham sindiring.

³⁴Bunday idishdagi suv har qanday ovqat ustiga tushsa, ovqat ham harom bo‘ladi. Harom idishdagi har qanday ichimlik harom hisoblanadi.

³⁵Jonivorning murdasi tushgan hamma narsa harom bo‘ladi. Murda tandir yoki o‘choqqa tushgan bo‘lsa, shu narsalar harom hisoblanib buzib tashlansin. Ularni harom deb biling.

³⁶Lekin murda buloq yoki suv yig‘iladigan sardobaga tushsa, buloq va sardoba halolligicha qoladi. Ammo o‘sha jonivorning murdasiga nimaiki tegsa, bu narsa harom hisoblanadi.

³⁷Bordi–yu, murda ekish uchun ajratib qo‘yilgan urug‘ ustiga tushsa, urug‘ halol hisoblanadi.

³⁸Ammo murda suvda ivitilgan urug‘ ustiga tushsa, urug‘ harom bo‘ladi.

³⁹Bordi–yu, yeb bo‘ladigan hayvon o‘lsa, bunday hayvonning murdasiga tekkan odam kechgacha harom bo‘ladi.

⁴⁰Uning go‘shtidan yegan yoki murdasini ko‘targan odam kiyimlarini yuvsin. Bunday odam kechgacha harom bo‘ladi.

⁴¹Yerda o‘rmalab yuruvchi har qanday jonivor sizlar uchun jirkanchdir. Ularni tanovul qilmang.

⁴²Qorni bilan sudralib yuruvchi, to‘rt oyoqli va ko‘p oyoqli jonivorlarni yemang. Ular sizlar uchun jirkanchdir.

⁴³Bunday jonivorlarni yeb, bulg‘anmang. Ular tufayli o‘zingizni harom qilmang.

⁴⁴Zotan Men Egangiz Xudoman. O‘zingizni Menga bag‘ishlab muqaddas bo‘linglar, chunki Men muqaddasman. O‘rmalab yuradigan jonivorlar tufayli o‘zingizni bulg‘amanglar.

⁴⁵Men Egangizman, Xudoyingiz bo‘lishim uchun sizlarni Misrdan olib chiqqanman. Shunday ekan, Muqaddas bo‘linglar, chunki Men muqaddasman.

⁴⁶Hayvonlar, qushlar, suvdagi turli jonivorlar va yerda sudraluvchi jonzotlarga oid qonunlar shudir.

⁴⁷Sizlar halolni haromdan ajrata oling, yeyish mumkin bo‘lgan va mumkin bo‘lmagan tirik jonivorlarning farqiga boring.”