Read O‘zbek tilidagi Muqaddas Kitob, 2013 Levilar 12 Bible Online

Levilar 12 - O‘zbek tilidagi Muqaddas Kitob, 2013 bible

Levilar 12

¹Egamiz Muso orqali

²Isroil xalqiga quyidagi qoidalarni berdi: agar ayol homilador bo‘lib, o‘g‘il tug‘sa, u ayol yetti kun harom hisoblanadi, hayz ko‘rgan kunlaridagi kabi harom bo‘ladi.

³Sakkizinchi kuni esa o‘g‘il chaqaloq sunnat qilinsin.

⁴Ayolning qondan tozalanish muddati o‘ttiz uch kun bo‘lsin. Bu muddat tugamaguncha u birorta muqaddas narsaga tegmasligi va Muqaddas chodirga kirmasligi lozim.

⁵Agar ayol qiz tug‘sa, u hayz ko‘rgandagi kabi, ikki hafta davomida harom hisoblanadi. U oltmish olti kundan keyingina qon ketishidan poklanadi.

⁶O‘g‘il yoki qiz ko‘rgan ayolning tozalanish muddati tugagach, u kuydiriladigan qurbonlik qilishga bir yoshli qo‘zini va gunoh qurbonligi qilishga musichani yoki kaptarni Uchrashuv chodiri kiraverishiga olib kelib, ruhoniyga bersin.

⁷Ruhoniy Egamizning oldida qurbonliklarni keltirsin, shu yo‘sin ayolni nopokliklaridan poklasin. Shundan so‘ng ayol qon ketishidan poklanadi. O‘g‘il yoki qiz ko‘rgan ayol uchun qonun shudir.

⁸Bordi–yu, qo‘zini qurbonlik qilishga ayolning qurbi yetmasa, u ikkita kaptar yoki ikkita musichani olib kelsin. Ruhoniy birini kuydiriladigan qurbonlik, ikkinchisini gunoh qurbonligi qilsin, shu yo‘sin ayolni nopokliklaridan poklasin. Shunda ayol pok bo‘ladi.