Read O‘zbek tilidagi Muqaddas Kitob, 2013 Levilar 13 Bible Online

Levilar 13 - O‘zbek tilidagi Muqaddas Kitob, 2013 bible

Levilar 13

¹Muso va Horunga Egamiz quyidagi qonunlarni berdi:

²agar birortasining badanida teri kasalligiga aylanishi mumkin bo‘lgan shish, toshma yoki dog‘ paydo bo‘lsa, o‘sha odamni ruhoniy Horun yoki uning o‘g‘illaridan biri huzuriga olib keling.

³Ruhoniy badandagi yarani ko‘rsin. Agar yara ustidagi tuklar oqargan va yara teri ostiga o‘tgan bo‘lsa, bu teri kasalligidir. Ruhoniy yarani ko‘rib bo‘lishi bilanoq o‘sha odamni, harom, deb e’lon qilsin.

⁴Bordi–yu, odamning badanida oq dog‘ bo‘lib, teri ostiga o‘tmagan bo‘lsa va dog‘ ustidagi tuklar oqarmagan bo‘lsa, ruhoniy kasallangan odamni yetti kunga yolg‘izlatib qo‘ysin.

⁵Yettinchi kuni ruhoniy yana o‘sha odamni ko‘rsin. Agar yara o‘zgarmagan bo‘lsa va atrofidagi teriga yoyilmagan bo‘lsa, ruhoniy o‘sha odamni yana yetti kunga yolg‘izlatib qo‘ysin.

⁶Yettinchi kuni ruhoniy uni yana ko‘rsin. Agar yara tuzala boshlagan bo‘lib, atrofidagi teriga yoyilmagan bo‘lsa, ruhoniy u odamni pok deb e’lon qilsin. Bu toshmadir. U odam kiyimlarni yuvsin va u pok bo‘ladi.

⁷Bordi–yu, ruhoniy tekshirib, pok deb e’lon qilgan o‘sha odamning terisidagi toshmasi yoyilib ketsa, u qaytadan ruhoniyga ko‘rinsin.

⁸Ruhoniy kasalni yana tekshirsin. Agar toshma teriga yoyilgan bo‘lsa, ruhoniy u odamni harom, deb e’lon qilsin. Bu teri kasalligidir.

⁹Agar odam teri kasalligiga chalinsa, uni ruhoniy huzuriga olib keling.

¹⁰Ruhoniy uni tekshirsin. Agar teri ustida oq shish paydo bo‘lgan bo‘lib, shish ustidagi tuklar oqargan bo‘lsa va ochiq yara hosil bo‘lgan bo‘lsa,

¹¹bu tuzalmas teri kasalligidir. Ruhoniy u odamni harom deb e’lon qilsin, uni yolg‘izlatib o‘tirmasin, chunki uning haromligi oydindir.

¹²Bordi–yu, teridagi toshma odamning butun tanasini boshdan–oyoq qoplab olsa,

¹³ruhoniy uni tekshirsin. Agar toshma butun tanaga yoyilgan bo‘lsa, ruhoniy uni pok deb e’lon qilsin. Hamma teri birday oqargani uchun, bunday odam pok hisoblanadi.

¹⁴Bordi–yu, uning badanida ochiq yara hosil bo‘lsa, o‘sha odam harom hisoblanadi.

¹⁵Ruhoniy ochiq yarani ko‘rsin va u odamni harom deb e’lon qilsin. Ochiq yara haromdir, bu teri kasalligining belgisidir.

¹⁶Lekin ochiq yara tuzalib, oqarsa o‘sha odam ruhoniyning oldiga kelsin.

¹⁷Ruhoniy uni ko‘rsin. Agar yara haqiqatan ham oqargan bo‘lsa, ruhoniy kasal odamni pok deb e’lon qilsin. Shunda u pok bo‘ladi.

¹⁸Agar birortasining badaniga chipqon chiqib, bitgan bo‘lsa–yu,

¹⁹lekin chipqon o‘rnida oq shish yoki qizg‘ish–oq dog‘ paydo bo‘lsa, u odam ruhoniyga ko‘rinsin.

²⁰Ruhoniy uni ko‘rsin. Agar dog‘ teri ostiga o‘tgan bo‘lsa va tuklari oqarib qolgan bo‘lsa, ruhoniy o‘sha odamni harom deb e’lon qilsin. Demak, chipqon o‘rnida teri kasalligi hosil bo‘lgan.

²¹Lekin ruhoniy uni tekshirganda, dog‘ ustidagi tuklar oqarmagan, dog‘ terining ostiga o‘tmagan va tuzala boshlagan bo‘lsa, ruhoniy o‘sha odamni yetti kunga yolg‘izlatib qo‘ysin.

²²Agar dog‘ teriga yoyilib ketsa, ruhoniy u odamni harom deb e’lon qilsin. Bu teri kasalligidir.

²³Bordi–yu, dog‘ o‘zgarmasa va yoyilmasa, chipqonning chandig‘i bo‘ladi, xolos. Ruhoniy bu odamni pok deb e’lon qilsin.

²⁴Agar birortasi kuyib qolsa va kuygan joyining rangi o‘zgarib, qizg‘ish–oq yoki oppoq tusga kirsa,

²⁵ruhoniy kuygan joyni tekshirsin. Agar kuygan joy ustidagi tuklar oqarib qolgan bo‘lsa va dog‘ teri ostiga o‘tgan bo‘lsa, demak, kuygan joy o‘rnida teri kasalligi hosil bo‘lgan. Ruhoniy bu odamni harom, deb e’lon qilsin.

²⁶Lekin ruhoniy uni tekshirganda tuklar oqarmagan va dog‘ teri ostiga o‘tmagan bo‘lsa, buning ustiga dog‘ tuzala boshlagan bo‘lsa, ruhoniy u odamni yetti kunga yolg‘izlatib qo‘ysin.

²⁷Yettinchi kuni ruhoniy u odamni ko‘rsin. Agar dog‘ teriga yoyilgan bo‘lsa, ruhoniy u odamni harom deb e’lon qilsin. Bu teri kasalligidir.

²⁸Bordi–yu, dog‘ o‘zgarmasa va atrofdagi teriga yoyilmasa, buning ustiga tuzala boshlagan bo‘lsa, demak, bu kuyish natijasida paydo bo‘lgan shishdir. Ruhoniy u odamni pok deb e’lon qilsin. Bu kuygan joyning izidir.

²⁹Agar erkak yoki ayolning boshiga yo jag‘iga yara chiqsa,

³⁰ruhoniy yarani tekshirsin. Yara terining ostiga o‘tgan bo‘lsa va yara ustidagi tuklar sarg‘ayib, nimjon bo‘lib qolgan bo‘lsa, ruhoniy o‘sha erkak yoki ayolni harom deb e’lon qilsin. Demak, uning boshi yoki jag‘iga qichitma chiqqan, bu teri kasalligidir.

³¹Agar ruhoniy qichitmani tekshirganda yara terining ostiga o‘tmagan bo‘lsa, lekin yaraning ustida sog‘lom tuklar bo‘lmasa, ruhoniy qichitmaga chalingan bu odamni yetti kunga yolg‘izlatib qo‘ysin.

³²Yettinchi kuni ruhoniy qichitmani yana ko‘rsin. Agar qichitma yoyilmagan bo‘lsa, uning ustida sarg‘ish tuklar bo‘lmasa, yara terining ostiga o‘tmagan bo‘lsa,

³³kasal odam hamma sochini qirsin, lekin qichitma bor joyiga tegmasin. So‘ng ruhoniy uni yana yetti kunga yolg‘izlatib qo‘ysin.

³⁴Yettinchi kuni ruhoniy qichitmani ko‘rsin. Agar qichitma yoyilmagan va terining ostiga o‘tmagan bo‘lsa, ruhoniy u odamni pok deb e’lon qilsin. U odam kiyimlarini yuvsin, shunda u pok bo‘ladi.

³⁵Bordi–yu, ruhoniy uni pok deb e’lon qilgandan keyin qichitma yoyilsa,

³⁶ruhoniy u odamni yana tekshirsin. Agar qichitma haqiqatan ham yoyilgan bo‘lsa, sarg‘ish tukni qidirishning hojati yo‘q. U odam haromdir.

³⁷Bordi–yu, ruhoniyning nazarida qichitma o‘zgarmagan bo‘lsa va uning ustida qora tuklar o‘sa boshlagan bo‘lsa, qichitma tuzalgan bo‘ladi. Ruhoniy u odamni pok deb e’lon qilsin.

³⁸Agar erkak yoki ayolning badanida oq dog‘lar paydo bo‘lsa,

³⁹ruhoniy o‘sha odamni tekshirsin. Agar bu dog‘lar ko‘rinar–ko‘rinmas oqishroq tusda bo‘lsa, bu bor–yo‘g‘i toshmadir. Bunday odam pokdir.

⁴⁰Agar odamning sochi to‘kilgan bo‘lsa, u odam kal, lekin pok hisoblanadi.

⁴¹Boshning old tomonidagi va chakkalaridagi sochlari to‘kilgan bo‘lsa, u odam kal bo‘lgani bilan pok hisoblanadi.

⁴²Bordi–yu, boshning kal joyida qizg‘ish–oq dog‘ paydo bo‘lsa, bu teri kasalligidir.

⁴³Ruhoniy uni ko‘rsin. Agar shish haqiqatan teri kasalligi singari qizg‘ish–oq tusda bo‘lsa,

⁴⁴demak, odam kasallangan, u haromdir. Boshidagi yarasi tufayli ruhoniy uni harom deb e’lon qilsin.

⁴⁵Bunday yomon teri kasalliklaridan biriga chalingan odam kiyimlarini yirtsin, sochini to‘zsin, yuzining quyi qismini berkitsin. So‘ng: “Harom! Harom!” deb baqirsin.

⁴⁶U odam kasalligi davomida harom hisoblanadi. U alohida, qarorgohdan tashqarida yashasin.

⁴⁷Agar kiyimni mog‘or bossa, jun yoki zig‘ir matosidan tikilgan kiyimni,

⁴⁸jun yoki zig‘irdan to‘qilgan matoni, charmni yo charmdan yasalgan buyumni

⁴⁹bosgan o‘sha mog‘or ko‘kimtir yoki qizg‘ish rangda bo‘lsa, bu yoyiladigan zamburug‘dir, uni ruhoniyga ko‘rsatish lozim.

⁵⁰Ruhoniy mog‘orni tekshirsin, so‘ng zararlangan narsani yetti kunga olib qo‘ysin.

⁵¹Yettinchi kuni ruhoniy uni yana ko‘rsin. Agar mog‘or kiyimga, to‘qilgan matoga yo charmdan yasalgan har qanday buyumga yoyilgan bo‘lsa, bu yoyiladigan zamburug‘dir. Zararlangan narsa harom hisoblanadi.

⁵²Ruhoniy o‘sha narsani kuydirsin. Buyum yoyiladigan zamburug‘ bilan zararlangani uchun uni kuydirib yuborish kerak.

⁵³Bordi–yu, mog‘or kiyimga, matoga yoki charmga yoyilmagan bo‘lsa,

⁵⁴ruhoniy zararlangan o‘sha narsani yuvdirsin. So‘ng uni yana yetti kunga olib qo‘ysin.

⁵⁵Ruhoniy yuvilgan o‘sha narsani yana tekshirsin. Agar mog‘orlagan joyning rangi o‘zgarmagan bo‘lsa, mog‘or yoyilmagan taqdirda ham harom hisoblanadi. Narsaning mog‘orlagan joyi ichki yoki tashqi tomonida bo‘lishidan qat’iy nazar, uni kuydirib yuboring.

⁵⁶Bordi–yu, ruhoniy yuvilgan narsani tekshirganda mog‘orning rangi o‘chgan bo‘lsa, ruhoniy kiyim, mato yoki charmdagi mog‘orlagan joyni yulib olsin.

⁵⁷Agar mog‘or o‘sha narsada yana paydo bo‘lsa, zamburug‘ yana ko‘payishni boshlagandir, narsaning egasi uni kuydirib yuborsin.

⁵⁸Bordi–yu, yuvilgandan keyin narsadagi mog‘or ketsa, uni ikkinchi marta yuving va u pok bo‘ladi.

⁵⁹Jun yoki zig‘ir matosidan tikilgan kiyimda, jun yoki zig‘irdan to‘qilgan matoda va charmdan yasalgan har qanday buyumda hosil bo‘lgan yoyiladigan zamburug‘ga oid qoidalar shulardan iboratdir. Bular sizlarga halolni haromdan ajrata olishingiz uchun xizmat qiladi.