Read O‘zbek tilidagi Muqaddas Kitob, 2013 Levilar 14 Bible Online

Levilar 14 - O‘zbek tilidagi Muqaddas Kitob, 2013 bible

Levilar 14

²xasta odamning poklanish marosimiga oid quyidagi qoidalarni berdi: teri kasalligidan forig‘ bo‘lgan odamni ruhoniyning oldiga olib keling.

³Ruhoniy uni qarorgohdan tashqarida ko‘rsin. Agar o‘sha odam haqiqatan ham qasalligidan forig‘ bo‘lgan bo‘lsa,

⁴ruhoniy uni poklash uchun ikkita halol tirik qushni, sadr yog‘ochini, qirmizi ipni va issop o‘tining bir tutamini keltirsin.

⁵Ruhoniyning amriga binoan qushlarning bittasi yangi buloq suvi solingan sopol idish ustida bo‘g‘izlansin.

⁶So‘ng ruhoniy tirik qushni, sadr yog‘ochini, qirmizi ipni va issopni olib, buloq suvi ustida bo‘g‘izlangan qushning qoniga botirsin.

⁷Keyin qonni teri kasalligidan poklanadigan odamning ustiga yetti marta sepsin. Ruhoniy o‘sha odamni pok, deb e’lon qilsin va tirik qushni dalaga qo‘yib yuborsin.

⁸Poklanadigan odam kiyimlarini yuvsin. Hamma sochini qirib tashab, yuvinsin, shunda u pok bo‘ladi. Shundan keyin u qarorgohga kirsin, lekin yetti kun davomida chodirining tashqarisida yashasin.

⁹Yettinchi kuni u yana sochini, soqolini, qoshlarini va hamma tuklarini qirsin. So‘ng kiyimlarini yuvib, o‘zi ham yuvinsin, shunda u pok bo‘ladi.

¹⁰Sakkizinchi kuni u ikkita nuqsonsiz qo‘chqor qo‘zini va bitta bir yoshli nuqsonsiz urg‘ochi qo‘zini, don nazri sifatida zaytun moyi qo‘shilgan o‘n ikki kosa sifatli unni va bir kosa zaytun moyini olib kelsin.

¹¹Poklanish marosimini olib borayotgan ruhoniy poklanadigan odamni va uning olib kelgan qurbonligu nazrlarini Egamizning oldiga, Uchrashuv chodiri kiraverishiga qo‘ysin.

¹²So‘ng qo‘zining bittasini bir kosa zaytun moyi bilan birga ayb qurbonligi sifatida keltirsin. O‘sha narsalarni Egamizga bag‘ishlaganini ko‘rsatib, yuqoriga ko‘tarsin.

¹³U qo‘zini muqaddas joyda, gunoh qurbonligi va kuydiriladigan qurbonlik bo‘g‘izlanadigan joyda so‘ysin. Ayb qurbonligi gunoh qurbonligi singari ruhoniyga tegishlidir. Bu qurbonlik nihoyatda muqaddasdir.

¹⁴Ruhoniy ayb qurbonligining qonidan olib, poklanayotgan odamning o‘ng qulog‘i solinchagiga, o‘ng qo‘lining bosh barmog‘iga va o‘ng oyog‘ining bosh barmog‘iga surtsin.

¹⁵So‘ng kosadagi zaytun moyidan olib, o‘z qo‘lining chap kaftiga quysin.

¹⁶O‘ng qo‘lining barmog‘ini chap kaftidagi zaytun moyiga botirib, yetti marta Egamizning oldida sepsin.

¹⁷Chap kaftida qolgan zaytun moyidan poklanayotgan odamning o‘ng qulog‘i solinchagiga, o‘ng qo‘li bosh barmog‘iga va o‘ng oyog‘i bosh barmog‘iga — ayb qurbonligining qoni surtilgan joyga surtsin.

¹⁸Ortib qolgan moyni esa poklanayotgan odamning boshiga surtsin. Shu yo‘sin, ruhoniy poklanish marosimini o‘tkazsin.

¹⁹Keyin ruhoniy gunoh qurbonligini keltirib, poklanish marosimini o‘tkazsin. U kuydiriladigan qurbonlikni so‘yib,

²⁰don nazri bilan birga qurbongoh ustida kuydirsin. Ruhoniy shu yo‘sin poklanish marosimini o‘tkazsin, shunda kasallikdan forig‘ bo‘lgan odam pok bo‘ladi.

²¹Bordi–yu, u odam kambag‘al bo‘lib, bularni qurbonlik qilishiga qurbi yetmasa, u poklanishi uchun yuqoriga ko‘tariladigan ayb qurbonligi sifatida bitta qo‘chqor qo‘zini, don nazri uchun zaytun moyi qo‘shilgan to‘rt kosa sifatli unni va bir kosa zaytun moyini olib kelsin.

²²Bulardan tashqari, imkoniyatiga ko‘ra ikkita kaptarni yoki ikkita musichani olib kelsin. Biri gunoh qurbonligi, ikkinchisi kuydiriladigan qurbonlik uchundir.

²³U bu narsalarni sakkizinchi kuni poklanish uchun Uchrashuv chodiri kiraverishiga, Egamizning oldiga olib kelib, ruhoniyga bersin.

²⁴Ruhoniy ayb qurbonligi uchun keltirilgan qo‘zini va bir kosa zaytun moyini olib, Egamizga bag‘ishlaganini ko‘rsatish uchun Egamizning oldida yuqoriga ko‘tarsin.

²⁵So‘ng qo‘zini so‘ysin, qonidan olib, poklanayotgan odamning o‘ng qulog‘i solinchagiga, o‘ng qo‘lining bosh barmog‘iga va o‘ng oyog‘ining bosh barmog‘iga surtsin.

²⁶Keyin ruhoniy chap qo‘lining kaftiga zaytun moyidan quysin.

²⁷O‘ng qo‘lining barmog‘i bilan o‘sha moyni yetti marta Egamizning oldida sepsin.

²⁸So‘ng qo‘lidagi moydan poklanayotgan odamning o‘ng qulog‘i solinchagiga, o‘ng qo‘lining bosh barmog‘iga va o‘ng oyog‘ining bosh barmog‘iga — ayb qurbonligining qoni surtilgan joyga surtsin.

²⁹Qo‘lidagi ortib qolgan moyni poklanayotgan odamning boshiga surtsin. Shu yo‘l bilan ruhoniy poklanish marosimini o‘tkazsin.

³⁰So‘ng ruhoniy kaptarlarni yoki musichalarni qurbon qilsin.

³¹Bittasini gunoh qurbonligi, ikkinchisini kuydiriladigan qurbonlik qilib, don nazri bilan birga keltirsin. Shunday qilib, ruhoniy poklanish marosimini o‘tkazsin.

³²Bu qoidalar teri kasalligidan forig‘ bo‘lgan, lekin poklanish marosimi uchun kerakli qurbonliklarni keltirishga qurbi yetmagan odam uchundir.

³³Muso bilan Horunga Egamiz

³⁴mog‘or bosgan uylarga oid quyidagi qonunlarni berdi: Egamiz sizlarga mulk qilib beradigan Kan’on yurtiga borganingizdan keyin sizlarga qarashli yurtdagi uyni mog‘or bostirishi mumkin.

³⁵Shunda xonadon sohibi ruhoniyning oldiga borib: “Uyimni mog‘or bosganga o‘xshaydi”, — deb aytsin.

³⁶Uydagi narsalar harom deb e’lon qilinmasligi uchun, ruhoniy mog‘orni ko‘rishga kirishdan oldin, uydagi hamma narsalarni chiqartirishni buyursin. Shundan so‘ng uyni ko‘zdan kechirish uchun ichkariga kirib,

³⁷mog‘or bosgan devorlarni ko‘rsin. Agar mog‘orning ko‘kimtir yoki qizg‘ish dog‘lari bo‘lib, devorga chuqur botib kirgan bo‘lsa,

³⁸ruhoniy tashqariga chiqib, uyni yetti kunga berkitib qo‘ysin.

³⁹Yettinchi kuni ruhoniy qaytib kelib, uyni yana ko‘rsin. Agar mog‘or devorga yoyilib ketgan bo‘lsa,

⁴⁰ruhoniy mog‘or yoyilgan devordagi toshlarni ko‘chirtirib, shahar tashqarisidagi harom joyga olib borib tashlashni buyursin.

⁴¹So‘ng uy ichkarisidagi devorlarning suvog‘ini ko‘chirtirib, shahar tashqarisidagi harom joyga chiqartirib tashlatsin.

⁴²Ko‘chirib olingan toshlar o‘rniga boshqa toshlar qo‘ydirib, uyning ichini yangidan suvoq qildirsin.

⁴³Agar shundan keyin ham uyni mog‘or bossa,

⁴⁴ruhoniy kelib uyni ko‘rsin. Mog‘or devorlarga yoyilgan bo‘lsa, bu yoyiladigan zamburug‘dir. Uy harom hisoblanadi.

⁴⁵Uy buzib tashlansin, uning tosh, yog‘och va suvog‘ini shahar tashqarisidagi harom joyga olib chiqib tashlashsin.

⁴⁶Uy yopiq paytida u yerga kirgan har qanday odam kechgacha harom hisoblanadi.

⁴⁷O‘sha uyda uxlagan yoki u yerda ovqatlangan har qanday odam kiyimlarini yuvsin.

⁴⁸Bordi–yu, uy yangidan suvoq qilingandan keyin ruhoniy kelib, uyni ko‘rganda devorlarni mog‘or bosmagan bo‘lsa, ruhoniy uyni pok deb e’lon qilsin. Mog‘or yo‘q bo‘lgan bo‘ladi.

⁴⁹Uyni poklash uchun ruhoniy ikkita qushni, sadr yog‘ochini, qirimizi ipni va issop o‘tining bir tutamini olsin.

⁵⁰Qushning birini sopol idishdagi yangi buloq suv ustida so‘ysin.

⁵¹So‘ng sadr yog‘ochini, issopning tutamini, qirmizi ipni va tirik qushni olib, ularni buloq suvi ustida bo‘g‘izlangan qushning qoniga botirsin–da, uyga yetti marta sepsin.

⁵²Shu yo‘l bilan uyni poklagandan keyin,

⁵³tirik qushni shahar chekkasiga olib chiqib, dalaga qo‘yib yuborsin. Shu tariqa ruhoniy uy uchun poklash marosimini o‘tkazsin, shunda uy pok bo‘ladi.

⁵⁴Teri kasalligiga va yoyiladigan zamburug‘larga oid qoidalar shudir. Bu qoidalar teridagi qichitmaning,

⁵⁵uy va kiyimlardagi mog‘orlarning, teridagi shish, toshma yoki dog‘larning

⁵⁶halol yoki harom ekanligini bilish uchun xizmat qiladi. Xullas, teri kasalligi va yoyiladigan zamburug‘larga oid qoidalar shulardan iborat.