Read O‘zbek tilidagi Muqaddas Kitob, 2013 Levilar 15 Bible Online

Levilar 15 - O‘zbek tilidagi Muqaddas Kitob, 2013 bible

Levilar 15

¹Egamiz Muso va Horun orqali

²Isroil xalqiga quyidagi qoidalarni berdi: kasallik tufayli biror erkakning jinsiy a’zosidan ajralmalar oqsa, u odam harom bo‘ladi.

³Ajralma oqishi davom etsa ham, yo‘li yopilgandan tana ichida qolsa ham, odam harom hisoblanadi.

⁴Bunday odam to‘shakka yotsa, to‘shak harom bo‘ladi, o‘tirgan har qanday joy ham harom hisoblanadi.

⁵Uning to‘shagiga tekkan har qanday odam kiyimlarini yuvsin, o‘zi ham yuvinsin, u kechgacha harom bo‘ladi.

⁶Ajralmasi oqqan odam o‘tirgan joyga kim o‘tirsa, kiyimlarini yuvsin, o‘zi ham yuvinsin, u kechgacha harom bo‘ladi.

⁷Ajralmasi oqqan odamga tekkan har kim kiyimlarini yuvsin, o‘zi ham yuvinsin, u kechgacha harom bo‘ladi.

⁸Ajralmasi oqqan odam pok odamga tupursa, u odam kiyimlarini yuvsin, o‘zi ham yuvinsin, u kechgacha harom bo‘ladi.

⁹Ajralmasi oqqan odam egarda o‘tirgan bo‘lsa, egar harom hisoblanadi.

¹⁰Bunday odamning o‘tirgan narsasiga tekkan har kim kechgacha harom bo‘ladi. Kim o‘sha narsani ko‘tarib borsa, kiyimlarini yuvsin, o‘zi ham yuvinsin, u kechgacha harom bo‘ladi.

¹¹Ajralmasi oqqan odam qo‘lini yuvmasdan kimga tegsa, o‘sha odam kiyimlarini yuvsin, o‘zi ham yuvinsin, u kechgacha harom bo‘ladi.

¹²Ajralmasi oqqan odam tekkan har qanday sopol idish sindirib tashlansin, yog‘och idish esa yuvilsin.

¹³Ajralmasi oqqan odam kasalligidan xalos bo‘lgach, yetti kun kutsin. So‘ng kiyimlarini yuvib, buloq suvida yuvinsin va u pok bo‘ladi.

¹⁴Sakkizinchi kuni u ikkita kaptar yoki ikkita musichani Egamizning oldiga, Uchrashuv chodiri kiraverishiga olib kelib, ruhoniyga bersin.

¹⁵Ruhoniy qushlarning bittasini gunoh qurbonligi, ikkinchisini esa kuydiriladigan qurbonlik qilsin. Shu tariqa ruhoniy ajralmasi oqqan odamni Egamizning oldida haromligidan poklasin.

¹⁶Agar biror erkakdan maniy oqsa, u butun badanini yuvsin. U kechgacha harom bo‘ladi.

¹⁷Maniy tekkan har qanday kiyim va charm yuvilsin, o‘sha narsalar kechgacha harom bo‘ladi.

¹⁸Erkak ayol bilan yotgandan keyin, erkakdan maniy oqsa, ikkovi ham yuvinishsin. Ular kechgacha harom bo‘ladilar.

¹⁹Ayol kishi hayz ko‘rib, badanidan qon oqqanda, u yetti kun davomida harom hisoblanadi. Unga tekkan odam ham kechgacha harom bo‘ladi.

²⁰Ayol haromligida yotgan va o‘tirgan hamma narsa haromdir.

²¹Uning to‘shagiga tekkan odam kiyimlarini yuvsin, o‘zi ham yuvinsin. U kechgacha harom bo‘ladi.

²²Ayol o‘tirgan buyumga tekkan odam ham kiyimlarini yuvib, o‘zi ham yuvinsin. U kechgacha harom bo‘ladi.

²³Bordi–yu, ayolning to‘shagi yoki o‘tirgan buyumi ustida biron narsa bo‘lsa, o‘sha narsaga tekkan odam ham kechgacha harom bo‘ladi.

²⁴Agar erkak hayz ko‘rgan ayol bilan yotsa, ayolning haromligi erkakka o‘tgan bo‘ladi. Erkak ham yetti kun davomida harom bo‘lib, u yotgan har bir to‘shak harom hisoblanadi.

²⁵Agar ayolning hayz ko‘rgan paytdan tashqari qoni kelsa va bu ahvol uzoq vaqt davom etsa yoki hayz ko‘rgan davri cho‘zilib ketsa, ayol qon to‘xtaguncha harom hisoblanadi. Hayz ko‘rgan kunlariday harom bo‘ladi.

²⁶O‘sha vaqt davomida ayol yotgan har qanday to‘shak va o‘tirgan har qanday buyum, hayz ko‘rgan kunlariday harom bo‘ladi.

²⁷O‘sha narsalarga tekkan odam harom hisoblanadi. U kiyimlarini yuvib, o‘zi ham yuvinsin, u kechgacha harom bo‘ladi.

²⁸Ayolning qoni to‘xtasa, oradan yetti kun o‘tsin. Shundan keyin u pok bo‘ladi.

²⁹Sakkizinchi kuni u ikkita kaptar yoki ikkita musichani Uchrashuv chodirining kiraverishiga olib kelib, ruhoniyga bersin.

³⁰Ruhoniy qushlardan bittasini gunoh qurbonligi, ikkinchisini kuydiriladigan qurbonlik qilsin. Shu yo‘sin ruhoniy hayz ko‘rgan ayolni haromligidan poklasin.

³¹Xullas, Isroil xalqini haromlikdan saqlanglar. Tag‘in ular haromligi bilan oralaridagi Muqaddas chodirimni bulg‘ab qo‘yib, nobud bo‘lmasinlar.

³²Bu qoidalar jinsiy a’zosidan maniy oqqan erkaklarga,

³³hayz ko‘rgan ayollarga, har qanday ajralmasi oqqan erkagu ayollarga va ayolning haromligi davrida u bilan yotgan erkaklarga taalluqlidir.