Read O‘zbek tilidagi Muqaddas Kitob, 2013 Levilar 16 Bible Online

Levilar 16 - O‘zbek tilidagi Muqaddas Kitob, 2013 bible

Levilar 16

¹Horunning ikki o‘g‘li Egamiz amr etmagan begona olovni olib kelib, nobud bo‘lganlaridan so‘ng, Egamiz Musoga gapirib,

²shunday dedi: “Akang Horunga ayt, u ichki parda orqasidagi Eng muqaddas xonaga xohlagan paytida kirmasin. U yerdagi ahd sandig‘ining qopqog‘i oldiga bormasin. Aks holda u nobud bo‘ladi. Zotan Men o‘sha qopqoq ustida bulut orasida zohir bo‘laman.”

³Egamiz Musoga quyidagi qoidalarni berdi: Horun Muqaddas xonaga kirishidan oldin bitta buqani gunoh qurbonligi va bitta qo‘chqorni kuydiriladigan qurbonlik qilishi lozim.

⁴U ustiga zig‘ir matosidan tikilgan muqaddas ko‘ylakni, ichidan zig‘ir ishtonni kiyib olsin, beliga zig‘ir belbog‘ bog‘lab, boshiga zig‘ir matosidan salla taqib olsin. Bu muqaddas liboslardir. Shuning uchun u bu liboslarni kiyishdan oldin yuvinsin, shundan so‘nggina ularni kiysin.

⁵So‘ng Isroil jamoasidan gunoh qurbonligi uchun ikkita takani va kuydiriladigan qurbonlik uchun bitta qo‘chqorni olsin.

⁶Horun o‘zini va xonadonini gunohdan poklash uchun buqani gunoh qurbonligi sifatida keltirsin.

⁷So‘ng ikkita takani Uchrashuv chodiri kiraverishiga yetaklab kelib, Egamizga taqdim qilsin.

⁸O‘sha yerda ikkala taka uchun qur’a tashlasin, qaysi birini Egamizga qurbonlik qilishni va qaysi birini qo‘yib yuborishni aniqlasin.

⁹Horun qur’a bo‘yicha Egamizga tegishli takani keltirib, gunoh qurbonligi qilsin.

¹⁰Qo‘yib yuboriladigan takani esa tiriklayin Egamizning oldiga olib kelsin. Bu taka xalqni gunohdan poklash uchun cho‘lga haydab yuboriladi.

¹¹Horun o‘zini va xonadonini gunohdan poklash uchun olib kelgan buqani so‘yib, gunoh qurbonligi qilsin.

¹²So‘ng otashkuragiga Egamiz oldida turgan qurbongohdagi cho‘g‘lardan solsin. Ikki hovuch tuyilgan xushbo‘y tutatqidan olib, ichki parda orqasidagi Eng muqaddas xonaga kirsin.

¹³Bu tutatqilarni Egamizning oldida yonib turgan cho‘g‘lar ustiga tashlasin. Tutatqidan hosil bo‘lgan bulut ahd sandig‘ining qopqog‘ini berkitadi. Shunda Horun o‘lmaydi.

¹⁴Horun buqaning qonidan olib, barmog‘i bilan qopqoqqa bir marta sepsin, so‘ng qopqoqning oldida yetti marta sepsin.

¹⁵So‘ngra xalqni gunohlaridan poklash uchun takani so‘ysin. Qonidan Eng muqaddas xonaga olib kirsin. Buqaning qonini sepganday takaning qonini ham qopqoqning old tomoniga va uning oldida sepsin.

¹⁶Shu tariqa u Eng muqaddas xonani Isroil xalqining nopokliklaridan, itoatsizliklaridan va gunohlaridan poklash uchun marosim o‘tkazsin. Butun Uchrashuv chodiri uchun ham, shu singari poklash marosimini o‘tkazsin. Chunki bu chodir bulg‘angan xalq orasida o‘rnatilgandir.

¹⁷Horun Eng muqaddas xonaga kirib, o‘zini, xonadonini va Isroil jamoasini gunohdan poklab chiqmaguncha hech kim Uchrashuv chodiriga kirmasin.

¹⁸So‘ng Horun tashqariga chiqib, Egamiz oldida turgan qurbongohni poklash uchun marosim o‘tkazsin. Buqaning va takaning qonidan olib, qurbongohning har bir shoxiga surtib chiqsin.

¹⁹Qurbongohga yetti marta barmog‘i bilan qonni sepsin. Shu yo‘l bilan qurbongohni Isroil xalqining nopokliklaridan poklab, muqaddas qilsin.

²⁰Horun Eng muqaddas xona, Uchrashuv chodiri va qurbongoh uchun poklash marosimini o‘tkazib bo‘lgach, tirik takani yetaklab kelsin.

²¹U ikkala qo‘lini takaning boshiga qo‘ysin, Isroil xalqining hamma haqsizliklarini, hamma itoatsizliklarini va hamma gunohlarini birma–bir e’tirof etib, takaning boshiga yuklasin. Takani cho‘lga haydab yuborish uchun mas’ul bo‘lgan odam takani olib ketsin.

²²O‘sha odam takani cho‘lga qo‘yib yuborgandan keyin, taka o‘zi bilan xalqning gunohlarini kimsasiz joyga olib ketadi.

²³Shundan keyin Horun Uchrashuv chodiriga kirib, Eng muqaddas xonaga kiyib kirgan zig‘ir matosidan tikilgan liboslarini yechsin–da, ularni o‘sha yerda qoldirsin.

²⁴U muqaddas joyda butun badanini yuvib, kundalik ruhoniy kiyimlarini kiyib olsin. So‘ng tashqariga chiqib, o‘zining va xalqning kuydiriladigan qurbonliklarini ado etsin. Shu tariqa o‘zini ham, xalqni ham gunohdan poklasin.

²⁵Gunoh qurbonligining yog‘ini qurbongoh ustida kuydirsin.

²⁶Qo‘yib yuboriladigan takani cho‘lga haydab yuborgan odam kiyimlarini va butun badanini yuvsin. Shundan so‘nggina u qarorgohga kira oladi.

²⁷Gunoh qurbonligi qilingan va qoni Isroil xalqini gunohdan poklash uchun Eng muqaddas xonaga olib kirilgan buqa va takaning tanasi qarorgohning tashqarisiga olib chiqilsin. Bularning terisi, tanasi va ichak–chovoqlari kuydirib yuborilsin.

²⁸Bularni kuydirgan odam kiyimlarini va butun badanini yuvsin. Shundan so‘nggina u qarorgohga kira oladi.

²⁹Quyidagilar sizlar uchun doimiy qonun–qoida bo‘lsin: yettinchi oyning o‘ninchi kunida ro‘za tutinglar, hech qanday ish qilmanglar. Bu Isroil xalqiga va orangizdagi musofirlarga birday taalluqlidir.

³⁰Zotan o‘sha kuni ruhoniy sizlarni gunohlaringizdan poklaydi. Shunda sizlar Egamiz oldida barcha gunohlaringizdan forig‘ bo‘lasizlar.

³¹O‘sha kun sizlar uchun dam olish Shabbat kunidir, ro‘za tutinglar. Bu sizlar uchun doimiy qonun–qoida bo‘lsin.

³²Bobosi Horun o‘rniga oliy ruhoniylikka bag‘ishlanib, moy surtilgan ruhoniy muqaddas zig‘ir liboslarini kiyib, sizlarni gunohlaringizdan poklasin.

³³U Eng muqaddas xonani, Uchrashuv chodirini, qurbongohni, ruhoniylarni va butun Isroil jamoasini poklash uchun marosim o‘tkazsin.

³⁴Yilda bir marta Isroil xalqi barcha gunohlaridan poklansin. Bu sizlar uchun doimiy qonun–qoida bo‘lsin. Egamiz nimani amr etgan bo‘lsa, Muso hammasini ado etdi.