Read O‘zbek tilidagi Muqaddas Kitob, 2013 Levilar 17 Bible Online

Levilar 17 - O‘zbek tilidagi Muqaddas Kitob, 2013 bible

Levilar 17

¹Egamiz Muso orqali

²Horunga, uning o‘g‘illariga va jamiki Isroil xalqiga quyidagi amrlarni berdi:

³agar Isroil xalqidan birortasi qarorgohda yoki qarorgoh tashqarisida buqa, qo‘zi yoki echkini qurbonlik qilsayu,

⁴uni Egamizga taqdim qilish uchun Uchrashuv chodiri kiraverishiga olib kelmasa, o‘sha odam qon to‘kkani uchun aybdor hisoblansin. Qon to‘kkan bu odam xalq orasidan yo‘q qilinsin.

⁵Bu qoida Isroil xalqining dalalarda qurbonliklar qilishlariga chek qo‘yadi. Ular qurbonliklarini ruhoniyga, Uchrashuv chodiri kiraverishiga olib keladigan bo‘lishadi va qurbonliklarini tinchlik qurbonligi qilib, Egamizga bag‘ishlashadi.

⁶Ruhoniy qurbonlikning qonini Uchrashuv chodiriga kiraverishda turgan Egamizning qurbongohiga sepsin. So‘ng Egamizga yoqimli hid borishi uchun qurbonlikning yog‘ini kuydirsin.

⁷Bundan buyon Isroil xalqi o‘z qurbonliklarini echki jinlariga keltirmasin, shu yo‘sin Egamizga bevafolik qilmasin. Bu qoidaga ular doimo, avlodlari osha rioya qilishsin.

⁸Isroil xalqidan yoki ularning oralarida istiqomat qilayotgan musofirlardan birortasi quydiriladigan va boshqa qurbonliklar qilsayu,

⁹o‘shalarni Egamizga nazr qilish uchun Uchrashuv chodiri kiraverishiga olib kelmasa, u odam xalq orasidan yo‘q qilinsin.

¹⁰Agar Isroil xalqidan yoki ularning oralarida istiqomat qilayotgan musofirlardan birortasi qoni chiqarilmagan go‘shtni yesa, Egamiz qon iste’mol qilgan o‘sha odamga qarshi chiqib, uni xalq orasidan yo‘q qilib yuboradi.

¹¹Zotan jonzotning joni uning qonidir. Egamiz qonni sizlarga qurbongoh ustida gunohlaringizni yuvish uchun bergan. Jon ato etadigan qon sizlarni gunohlaringizdan poklaydi.

¹²Shuning uchun Egamiz Isroil xalqiga: “Qoni chiqarilmagan go‘shtni zinhor iste’mol qilmang, oralaringizda yashayotgan musofir ham qonni iste’mol qilmasin.” — deb aytgan.

¹³Ovlangan halol hayvon yoki qushning qonini chiqaringlar. Qonni tuproq bilan ko‘mib qo‘yinglar. Bu qoida Isroil xalqiga va ularning orasida istiqomat qilayotgan musofirlarga taalluqlidir.

¹⁴Har bir jonzotning joni uning qonidir. Shu bois Egamiz Isroil xalqiga aytdi: “Qoni chiqarilmagan go‘shtni yemanglar. Zotan har bir jonzotning joni qondadir. Qon iste’mol qilgan odam xalqi orasidan yo‘q qilinsin.”

¹⁵Harom o‘lgan yoki yovvoyi hayvon g‘ajib tashlagan jonivorning go‘shtini yegan har bir odam, Isroil xalqidan yoki boshqa xalqdan bo‘lishidan qat’iy nazar, kiyimlarini yuvsin, o‘zi ham yuvinsin. U kechgacha harom bo‘lib, so‘ng yana pok bo‘ladi.

¹⁶Bordi–yu, u kiyimlarini yuvmasa, o‘zi ham yuvinmasa, qilgan gunohi uchun jazoga tortiladi.