Read O‘zbek tilidagi Muqaddas Kitob, 2013 Levilar 19 Bible Online

Levilar 19 - O‘zbek tilidagi Muqaddas Kitob, 2013 bible

Levilar 19

¹Egamiz Muso orqali

²butun Isroil jamoasiga shunday dedi: “Muqaddas bo‘linglar, chunki Men, Egangiz Xudo, muqaddasman.

³Har biringiz ota–onangizni hurmat qiling. Shabbat kunlarimga rioya qiling. Zotan Men Egangiz Xudoman.

⁴Butlarga sajda qilmang, o‘zlaringiz uchun butlar yasamang. Men Egangiz Xudoman.”

⁵Tinchlik qurbonligini Menga keltirganingizda qoidalarga rioya qiling, toki qurbonligingiz qabul bo‘lsin.

⁶Qurbonlikning go‘shtini qurbonlik qilingan kuni yoki ertasi kuni tanovul qiling. Uchinchi kuni ortib qolgan go‘shtni kuydiring.

⁷Bordi–yu, qurbonlikning go‘shti uchinchi kuni yeyilsa, qurbonligingiz bulg‘angan hisoblanib, qabulga o‘tmaydi.

⁸Undan yegan har bir odam Mening muqaddas deb bilgan narsamni bulg‘agani uchun, jazoga tortilsin. Bunday odam xalq orasidan yo‘q qilinsin.

⁹Dalangiz hosilini o‘rganingizda dalaning eng chetidagi bug‘doyni o‘rmang, yerga tushib qolgan bug‘doy boshoqlarini ham termang.

¹⁰Uzumzoringiz hosilini yiqqaningizdan keyin, toklarda qolib ketgan va yerga tushib qolgan uzum boshlarini yig‘ib olmang. Ularni kambag‘al va musofirlarga qoldiring. Men Egangiz Xudoman.

¹¹O‘g‘irlik qilmang, aldamang, birovga yolg‘on gapirmang.

¹²Mening nomim bilan yolg‘ondakam ont ichmang. Shu orqali Men, Xudoyingizni badnom qilmang. Men Egangizman.

¹³Qo‘shningizni tovlamang, uni talamang. Mardikorning haqini ertalabgacha olib qolmang.

¹⁴Kar odamni qarg‘amang. Ko‘r odamning yo‘liga to‘siq qo‘ymang. Men, Xudoyingizdan qo‘rqing. Men Egangizman.

¹⁵Hukm chiqarganda haqsizlik qilmang. Faqirning yonini bosmang, obro‘li odamning ham ko‘ngliga qarab ish tutmang. Qo‘shningizni adolat bilan hukm qiling.

¹⁶Odamlar orasida qo‘shningizni g‘iybat qilib, uning jonini xavf ostiga qo‘ymang. Men Egangizman.

¹⁷Dilingizda birodaringizga qarshi gina qilmang. Qo‘shningizning aybini ochiq yuziga soling, shunda siz uning aybi uchun jazoga tortilmaysiz.

¹⁸Qasos olmang, yurtdoshingizga qarshi kek saqlamang. Aksincha, o‘zgani o‘zingizni sevganday seving. Men Egangizman.

¹⁹Qonun–qoidalarimga rioya qiling. Molingizni boshqa turdagi hayvonlar bilan chatishtirmang. Dalangizga ikki xil urug‘ sepmang. Ustingizga ikki xil ipdan to‘qilgan kiyimni kiymang.

²⁰Agar erkak kishi boshqa birovga unashtirib qo‘yilgan cho‘ri bilan yotsa, u keltirgan zararni to‘lashi lozim. Cho‘ri hali ozodlikka chiqarilmagani uchun, ularga o‘lim jazosi berilmasin.

²¹Erkak ayb qurbonligi sifatida bir qo‘chqorni Uchrashuv chodiri kiraverishiga olib kelib, Menga taqdim qilsin.

²²Ruhoniy qo‘chqorni ayb qurbonligi qilib, o‘sha odamni Mening oldimda gunohidan poklasin. Shunda uning qilgan gunohi kechiriladi.

²³Sizlar Kan’on yurtiga kirib, turli xil mevali daraxtlar ekkaningizdan keyin, uch yil davomida ularning mevasidan yemang. Ularni yeyish man etilsin.

²⁴To‘rtinchi yili hamma mevalar shukrona nazri sifatida Menga bag‘ishlansin.

²⁵Beshinchi yili esa mevalarini yeyishingiz mumkin. Shunday qilsangiz, daraxtlaringiz serhosil bo‘ladi. Men Egangiz Xudoman.

²⁶Qoni chiqarilmagan go‘shtni yemang. Ta’birchilarga e’tiqod qilmang, fol ochtirmang.

²⁷Chakkangizdagi sochlaringizni qirmang, soqolingizning uchini qirqmang.

²⁸Aza tutganingizda marhum uchun badaningizni kesmang, teringizni teshib sur’at solmang. Zero, Men Egangizman.

²⁹Qizingizni fohishalik qilishiga undab, uni bulg‘amang. Toki yurt zinoga botmasin, buzuqlik avj olmasin.

³⁰Mening Shabbat kunlarimga rioya qiling, muqaddas makonimni izzat eting. Men Egangizman.

³¹Arvoh chaqiruvchilarning oldiga bormang, folbinlarga maslahat solmang. Ular tufayli o‘zingizni bulg‘amang. Men Egangiz Xudoman.

³²Mo‘ysafidni ko‘rganingizda o‘rningizdan turing, qariyaning hurmatini joyiga qo‘ying. Men, Xudoyingizdan qo‘rqing. Men Egangizman.

³³Yurtingizda yashab yurgan musofirga zulm qilmang.

³⁴Unga o‘z yurtdoshingizday qarang. Musofirni o‘zingizni sevganday seving, chunki sizlar ham Misr yurtida musofir edingizlar. Men Egangiz Xudoman.

³⁵Uzunlikni, og‘irlikni va miqdorni o‘lchaganda g‘irromlik qilmang.

³⁶Tarozingiz, qadoq toshlaringiz, o‘lchov tog‘orayu kosalaringiz to‘g‘ri bo‘lsin. Sizlarni Misr yurtidan olib chiqqan Egangiz Xudoman.

³⁷Qonun–qoidalarimning hammasini bitta qoldirmay bajaringlar. Men Egangizman.”