Read O‘zbek tilidagi Muqaddas Kitob, 2013 Levilar 20 Bible Online

Levilar 20 - O‘zbek tilidagi Muqaddas Kitob, 2013 bible

Levilar 20

¹Egamiz Muso orqali

²Isroil xalqiga shunday dedi: “O‘z bolasini Mo‘laxga qurbonlik qilgan har qanday odamga, Isroil xalqidan yoki yurtingizda yashagan musofir bo‘lishidan qat’iy nazar, o‘lim jazosi berilsin. Butun jamoa uni toshbo‘ron qilsin.

³Men O‘zim bunday odamga qarshi chiqib, uni xalq orasidan yo‘q qilib yuboraman, chunki u farzandini Mo‘laxga qurbonlik qilib, Muqaddas chodirimni bulg‘agan bo‘ladi, Meni, Muqaddas Xudoni badnom etgan bo‘ladi.

⁴Bordi–yu, jamoa bu odamning qilmishidan ko‘z yumib, uni o‘ldirmasa,

⁵Men O‘zim jamoaga va ularning barcha xonadonlariga qarshi chiqaman. Ularni xalq orasidan yo‘q qilaman. Menga bevafolik qilib, Mo‘laxga sig‘inadigan barcha izdoshlarini ular qatori qirib yuboraman.

⁶Agar biror odam Menga bevafolik qilib, arvoh chaqiruvchiga va folbinga maslahat solsa, Men o‘sha odamga qarshi chiqib, uni xalq orasidan yo‘q qilib yuboraman.

⁷O‘zlaringizni Menga bag‘ishlanglar, muqaddas bo‘linglar. Men Egangiz Xudoman.

⁸Qonun–qoidalarimni bitta qoldirmay bajaringlar. Sizlarni muqaddas qiladigan Egangizman.

⁹Otasini yoki onasini xo‘rlagan har qanday odamga o‘lim jazosi berilsin. Uning qoni o‘z gardanida qoladi.

¹⁰Agar erkak qo‘shnisining xotini bilan zino qilsa, ikkovi ham o‘ldirilsin.

¹¹Otasining xotini bilan yotgan erkak otasining sha’niga dog‘ tushirgan bo‘ladi. Bunday erkak va ayol o‘ldirilsin. Ularning qoni o‘z gardanida qoladi.

¹²Agar erkak o‘z kelini bilan yotsa, ikkovi ham o‘ldirilsin. Ular Xudo yaratgan tartibni buzgan hisoblanadilar. Ularning qoni o‘z gardanida qoladi.

¹³Agar erkak ayol bilan yotganday boshqa erkak bilan yotsa, ularning ikkovi jirkanch ish qilgan bo‘ladilar. Ikkovi ham o‘ldirilsin, ularning qoni o‘z gardanida qoladi.

¹⁴Agar erkak xotin olib, xotinining onasiga ham uylansa, u buzuqlik qilgan bo‘ladi. Ularning uchalovi ham tiriklayin olovga tashlansin. Orangizdan buzuqlikni yo‘q qiling.

¹⁵Agar erkak hayvon bilan jinsiy aloqa qilsa, u o‘lim jazosini olsin. Hayvon ham o‘ldirilsin.

¹⁶Agar ayol hayvonning oldiga borib jinsiy aloqa qilsa, ayolni ham, hayvonni ham o‘ldiring. Ularning qoni o‘z gardanida qoladi.

¹⁷Agar erkak o‘z singlisiga — otasining yoki onasining qiziga uylanib, u bilan qovushsa, sharmandalikka yo‘l qo‘ygan bo‘ladi. Ularning ikkovi ham xalqning ko‘zi oldida yo‘q qilinsin. U singlisining sha’niga dog‘ tushirgani uchun jazoga tortilsin.

¹⁸Agar erkak hayz ko‘rgan ayol bilan yotsa, ikkalasi ayolning hayz manbaini ochgan hisoblanadi. Ularning ikkovi ham xalq orasidan yo‘q qilinsin.

¹⁹Xolangiz yoki ammangiz bilan yotmang. Bunday qilgan odam o‘z qondoshining sha’niga dog‘ tushirgan bo‘ladi. Ularning ikkovi ham jazoga tortilsin.

²⁰Agar erkak amakisining xotini bilan yotsa, u amakisining sha’niga dog‘ tushirgan bo‘ladi. Erkak ham, ayol ham jazoga tortilsin. Ular farzand ko‘rmay o‘tib ketishadi.

²¹Agar erkak akasining yoki ukasining xotiniga uylansa, yaramas ish qilgan bo‘ladi. U akasining yo ukasining sha’niga dog‘ tushirgani uchun, ular farzandsiz o‘tib ketishadi.

²²Qonun–qoidalarimni bitta qoldirmay bajaringlar, toki Men sizlarni olib borayotgan yurt sizlarni qusib yubormasin.

²³Men oldingizdan quvib yuborayotgan xalqlarning odatlariga taqlid qilmanglar. Ular bu ishlarning hammasini qilganlari uchun, Men ulardan jirkanib ketdim.

²⁴Sizlar ularning sut va asal oqib yotgan yurtini mulk qilib olasizlar, deb Men sizlarga va’da qilgan edim. O‘sha yurtni sizlarga Men beraman. Men Egangiz Xudoman. Sizlarni xalqlar orasidan ajratib olganman.

²⁵Shunday ekan, sizlar halol bilan harom hayvonning farqiga, halol bilan harom qushning farqiga borishingiz lozim. Harom hayvonu qushlarni va yerda sudralib yuruvchilarni yeb o‘zingizni bulg‘amang. Men ularni harom, deb e’lon qilganman.

²⁶O‘zingizni Menga bag‘ishlab, muqaddas bo‘linglar, chunki Men, Egangiz, muqaddasman. Men sizlarni boshqa xalqlardan O‘zim uchun ajratib olganman.

²⁷Arvoh chaqiradigan va folbinlik qiladigan erkagu ayolning jazosi o‘limdir. Ularni toshbo‘ron qiling, ularning qoni o‘z gardanida qoladi.”