Read O‘zbek tilidagi Muqaddas Kitob, 2013 Levilar 21 Bible Online

Levilar 21 - O‘zbek tilidagi Muqaddas Kitob, 2013 bible

Levilar 21

¹Egamiz Muso orqali Horunning ruhoniy o‘g‘illariga shunday dedi: “Ruhoniy qazo qilgan qarindoshining jasadiga tegib o‘zini bulg‘amasin.

²Bordi–yu, marhum ruhoniyga eng yaqin qarindoshi, ya’ni ota–onasi, o‘g‘il–qizi, aka–ukasi,

³shuningdek, turmushga chiqmagan opa–singlisi bo‘lsa, ular tufayli bulg‘anishi mumkin.

⁴Lekin xotini tomonidan birov qazo qilsa, u tufayli o‘zini bulg‘ab, murdor bo‘lmasin.

⁵Ruhoniy aza tutganda sochini qirmasin, soqolining uchini qirqmasin, badanini tilmasin.

⁶U Mening oldimda muqaddas bo‘lsin, Meni badnom etmasin. Men, Egasi Xudoga olovda kuydiriladigan taom nazrlarni keltirgani uchun u muqaddas bo‘lsin.

⁷Fohishalik qilib bulg‘angan yoki eridan ajralgan ayolga uylanmasin. Zotan ruhoniy Mening oldimda muqaddasdir.

⁸Xalq ham ruhoniyni muqaddas deb bilsin, chunki Men, Xudoyingizga nonni keltiradigan o‘shadir. U odamlar uchun muqaddas bo‘lsin, zotan Men, Egangiz, muqaddasman. Xalqimni muqaddas qiladigan Menman.

⁹Agar ruhoniyning qizi fohishalik qilib o‘zini bulg‘asa, u otasini ham bulg‘agan bo‘ladi. Unday qizni tiriklayin kuydirish lozim.

¹⁰Aka–ukalari orasidan boshiga moy surtib tanlangan oliy ruhoniy ruhoniylik liboslarini kiyish uchun bag‘ishlangandir. Shuning uchun u qayg‘udan sochini to‘zmasin, liboslarini ham yirtmasin.

¹¹Jasadning yaqiniga bormasin, hatto vafot etgan ota–onasi tufayli ham o‘zini bulg‘amasin.

¹²U ota–onasini dafn qilish uchun Muqaddas chodirdan chiqmasin, shu tufayli Mening chodirimni bulg‘amasin. Zotan Mening muqaddas qiladigan moyim uning ustidadir, u Menga bag‘ishlangandir. Men Egangizman.

¹³Oliy ruhoniy faqat bokira qizga uylansin.

¹⁴Beva, eridan ajralgan yoki fohishalik qilib bulg‘angan ayolni xotinlikka olmasin. O‘z qavmidagi bokira qizga uylansin,

¹⁵shu tariqa muqaddas naslini haromlikdan asrasin. Men, Egangiz, uni muqaddas qilganman.”

¹⁶Egamiz Muso orqali

¹⁷Horunga shunday dedi: “Avlodingdan nuqsoni bor biror odam Menga qurbonliklarni keltirmasin. Bunga avlodlar osha rioya qilinglar.

¹⁸Nuqsoni bor hech kim yaqinimga kelmasin: ko‘r, cho‘loq, mayib, majruh

¹⁹qo‘l–oyog‘i singan,

²⁰bukur, pakana, ko‘zida nuqsoni bor, yiringlagan yaralari yoki qo‘tiri bor, moyagi ezilgan odam qurbongohning yaqiniga bormasin.

²¹Ruhoniy Horun naslidan nuqsoni bor hech kim olovda kuydiriladigan nazrlarni Men, Egangizga keltirmoqchi bo‘lib yaqinlashmasin. Nuqsoni bo‘lgani uchun u Menga taom nazrlarni keltirish uchun yaqinlashmasin.

²²U Mening qurbonliklarimni, eng muqaddas va muqaddas nazrlarimni tanovul qilishi mumkin.

²³Lekin nuqsoni tufayli u Muqaddas xonadagi ichki pardaga va qurbongohga aslo yaqinlashmasin. Aks holda u muqaddas makonimni bulg‘agan bo‘ladi. Makonimni muqaddas qiladigan Egangiz Menman.”

²⁴Shunday qilib, Muso bularning hammasini Horun va uning o‘g‘illariga hamda butun Isroil xalqiga aytdi.