Read O‘zbek tilidagi Muqaddas Kitob, 2013 Levilar 22 Bible Online

Levilar 22 - O‘zbek tilidagi Muqaddas Kitob, 2013 bible

Levilar 22

¹Egamiz Muso orqali

²Horun va uning o‘g‘illariga shunday dedi: “Sizlar Isroil xalqining Menga bag‘ishlagan ehsonlari bilan ehtiyotkor bo‘linglar, yana Meni — Muqaddas Xudoni badnom qilib qo‘ymanglar. Men Egangizman.

³Agar naslingizdan birontasi harom bo‘la turib, Isroil xalqi Menga bag‘ishlagan ehsonlarga yaqinlashsa, u Mening huzurimda boshqa xizmat qilmaydigan bo‘lsin. Men Egangizman.

⁴Horunning naslidan teri kasalligiga chalingan yoki ajralmasi oqqan hech kim poklanmaguncha ehsondan tanovul qilmasin. Bordi–yu, ruhoniylardan birortasi jasad tufayli bulg‘angan narsaga tegsa yoki jinsiy a’zosidan maniy oqsa,

⁵yohud o‘rmalab yuradigan harom jonivorga yo harom bo‘lgan odamga tegsa, o‘zi harom bo‘lgan hisoblanadi. U tekkan odam qanday yo‘l bilan harom bo‘lganligidan qat’iy nazar,

⁶ruhoniy kechgacha harom bo‘ladi. Ruhoniy badanini yuvmagunicha ehsondan tanovul qilmasin.

⁷Quyosh botgandan keyin u pok bo‘ladi. Ana shundagina u ehsonlardan tanovul qila oladi, chunki bu ehsonlar uning taomidir.

⁸Harom o‘lgan yoki yovvoyi hayvon g‘ajigan jonivorning go‘shtini ruhoniy yemasin. Aks holda u o‘z o‘zini harom qiladi. Men Egangizman.

⁹Ruhoniylar talablarimni bajarishsin. Aks holda gunohlarining jazosini olib, talablarimga rioya qilmaganlari uchun nobud bo‘ladilar. Ularni muqaddas qiladigan Egangiz Menman.

¹⁰Ruhoniy xonadoniga mansub bo‘lgan kishilargina ehsonlardan tanovul qilishlari mumkin. Ruhoniynikida turgan musofir yoki mardikor ehsonlardan tanovul qilmasin.

¹¹Lekin ruhoniy o‘z kumushiga sotib olgan yoki uning xonadonida tug‘ilgan qulu cho‘rilar bu nazrlardan tanovul qilishlari mumkin.

¹²Agar ruhoniyning qizi ruhoniylar qavmiga mansub bo‘lmagan odamga turmushga chiqsa, ehsonlardan tanovul qilish unga man etilsin.

¹³Bordi–yu, ruhoniyning bu qizi farzand ko‘rmay beva bo‘lib qolsa yoki eridan ajralsa, otasining xonadoniga qaytib kelganidan keyin qizlik davridagiday otasining taomidan tanovul qilishi mumkin. Ammo ruhoniylar qavmiga mansub bo‘lmagan odam ruhoniyning taomidan tanovul qilmasin.

¹⁴Agar biror odam bilmagan holda ehsondan yeb qo‘ysa, u ruhoniyga keltirgan zararni to‘lab, ustiga beshdan bir qismini qo‘shib bersin.

¹⁵Ruhoniylar Isroil xalqining Menga keltirgan ehsonlarini bulg‘ashmasin.

¹⁶Ularni boshqalarning tanovul qilishiga yo‘l qo‘yishmasin. Aks holda ruhoniylar Isroil xalqini aybdor qilib qo‘yishadi, xalq ayb qurbonligi keltirishi kerak bo‘ladi. Ehsonni muqaddas qiladigan Egangiz Menman.”

¹⁷Egamiz Muso orqali

¹⁸Horunga, uning o‘g‘illariga va butun Isroil xalqiga quyidagi qoidalarni berdi: Isroil xalqidan yoki orangizda yashayotgan musofirlardan birortasi bergan va’dasi ustidan chiqmoqchi bo‘lib yoki ko‘ngildan chiqarib, kuydiriladigan qurbonlik keltirmoqchi bo‘lsa

¹⁹nuqsonsiz buqa, qo‘chqor yoki takani olib kelsin. Shunda qurbonligi qabul bo‘ladi.

²⁰Nuqsoni bor jonivorni olib kelmang, bunday qurbonligingiz qabul bo‘lmaydi.

²¹Agar birortasi bergan va’dasi ustidan chiqish uchun yoki ko‘ngildan chiqarib, Egamizga tinchlik qurbonligini keltirmoqchi bo‘lsa, podasi yoki suruvidan nuqsonsiz jonivorni tanlab olsin. Qurbonligi qabul bo‘lishi uchun jonivor bekami–ko‘st bo‘lsin.

²²Ko‘r, jarohatlangan, mayib, yarasidan yiring oqqan, qo‘tir yoki qichimasi bor jonivorni Egamizga keltirmang, uni olovda kuydiriladigan nazr sifatida qurbongoh ustida kuydirmang.

²³Bir tuyog‘i kalta yoki uzun bo‘lgan buzoqni yoki qo‘zichoqni ko‘ngildan chiqarib beradigan qurbonlik sifatida keltirishingiz mumkin. Lekin bunday jonivorni bergan va’dangiz ustidan chiqish uchun olib kelmang, u qabul bo‘lmaydi.

²⁴Moyagi ko‘kargan, ezilgan, uzilgan yoki kesib olingan jonivorni Egamizga keltirmang. Yurtingizda bunga yo‘l qo‘ymang.

²⁵Xudoyingizga qurbonlik keltirmoqchi bo‘lgan musofirdan ham mayib jonivorni qabul qilmang. Bunday jonivor nuqsonli bo‘lgani uchun qabul bo‘lmaydi.

²⁶Egamiz Musoga yana dedi:

²⁷“Yangi tug‘ilgan buzoq, qo‘zichoq yoki uloqcha yetti kun onasining yonida bo‘lsin. Yettinchi kundan keyin uni olovda kuydirib, Menga nazr qilishingiz mumkin.

²⁸Lekin podangizdagi yoki suruvingizdagi ona, bolani bir kunda so‘ymang.

²⁹Menga shukrona qurbonligini keltirmoqchi bo‘lganingizda qoidalarga rioya qilgan holda keltiring, toki qurbonligingiz qabul bo‘lsin.

³⁰Qurbonlikning go‘shtini o‘sha kuniyoq tanovul qiling. Undan ertalabgacha hech narsa qoldirmang. Men Egangizman.

³¹Amrlarimni bitta qoldirmay bajaring. Men Egangizman.

³²Meni — Muqaddas Xudoni badnom qilmang. Butun Isroil xalqi Meni muqaddas deb bilsin. Men sizlarni muqaddas qiladigan Egangizman.

³³Xudoyingiz bo‘lish uchun sizlarni Misr yurtidan olib chiqqanman. Men Egangizman.”