Read O‘zbek tilidagi Muqaddas Kitob, 2013 Levilar 24 Bible Online

Levilar 24 - O‘zbek tilidagi Muqaddas Kitob, 2013 bible

Levilar 24

¹Egamiz Muso orqali

²Isroil xalqiga quyidagi amrlarni berdi: toza zaytun moyidan olib kelinglar. Toki moychiroqlar har doim tun bo‘yi yonib tursin.

³Horun moychiroqlarni Uchrashuv chodiriga, ahd sandig‘ini to‘sib turgan ichki parda oldiga o‘rnatsin. Moychiroqlar Egamiz oldida oqshomdan ertalabgacha o‘chmay yonib tursin. Bu avlodlaringiz osha doimiy qonun–qoida bo‘lsin.

⁴Horun moychiroqlarni toza oltindan yasalgan chiroqpoyaga o‘rnatsin. Moychiroqlar Egamizning oldida har doim tun bo‘yi yonib tursin.

⁵Sifatli undan o‘n ikkita non yop. Har bir non sakkiz kosa undan yopilgan bo‘lsin.

⁶Nonlarni Egamiz huzuridagi toza oltindan yasalgan xontaxta ustiga ikki qator qilib ter. Har bir qatorda oltitadan non bo‘lsin.

⁷Har bir qatorga toza xushbo‘y tutatqidan qo‘y. Bu xushbo‘y tutatqi nonning o‘rniga olovda kuydirilib, Egamizga nazr qilinadi.

⁸Horun nonlarni doimiy tarzda, har Shabbat kuni Isroil xalqi nomidan Egamiz oldiga qo‘ysin. Bu Isroil xalqining abadiy majburiyatidir.

⁹Bu nonlar Horun va uning avlodiniki bo‘lsin. Ular bu nonlarni muqaddas joyda tanovul qilishsin. Egamizga atab, olovda kuydiriladigan nazrlardan Horunning nasliga berilgan doimiy ulush shudir, u g‘oyat muqaddasdir.

¹⁰[10-11] Dan qabilasidan bo‘lgan Dibri qizi Shalumit Misrlik bir kishiga turmushga chiqqan edi. Ularning bir o‘g‘li bor edi. Bir kuni o‘sha o‘g‘li Isroil xalqidan bo‘lgan bir odam bilan janjallashib qoldi. Janjal paytida Shalumitning o‘g‘li qarg‘anib, Xudoga shak keltirdi. Shunda uni Musoning oldiga olib kelishdi.

¹²Egamizning hukmi ma’lum bo‘lgunga qadar uni qamab qo‘yishdi.

¹³Egamiz Musoga dedi:

¹⁴— Shakkokni qarorgohning tashqarisiga olib chiqinglar. Shak keltirganini eshitganlarning hammasi qo‘lini uning boshiga qo‘ysin, keyin butun jamoa uni toshbo‘ron qilsin.

¹⁵Isroil xalqiga shu gapimni aytib qo‘y: “Meni qarg‘agan har qanday odam jazoga tortilsin.

¹⁶Men, Egangizga shak keltirgan odamning jazosi o‘limdir. Butun jamoa uni toshbo‘ron qilsin. Shakkok, musofir yoki Isroil xalqidan bo‘lishidan qat’iy nazar, o‘ldirilsin.

¹⁷Odamning joniga qasd qilgan har qanday odam o‘ldirilsin.

¹⁸Birovning molini o‘ldirib qo‘ygan odam egasiga tovon to‘lasin. Bunday vaziyatda jon evaziga jon, degan qoida qo‘llanilsin.

¹⁹Agar kimdir birovga shikast yetkazsa, unga ham xuddi shunday shikast yetkazilsin.

²⁰Siniq evaziga siniq, ko‘z evaziga ko‘z, tish evaziga tish bilan javob qaytarilsin. Shikast yetkazganga xuddi shunday shikast yetkazilsin.

²¹Jonivorni o‘ldirgan tovon to‘lasin, odamni o‘ldirgan esa o‘lim jazosini olsin.

²²Musofir uchun ham, Isroillik uchun ham qonun birdir. Men Egangiz Xudoman.”

²³Muso bu so‘zlarni Isroil xalqiga aytib bo‘lgach, xalq shakkokni qarorgoh tashqarisiga olib chiqib, toshbo‘ron qildi. Shunday qilib, Isroil xalqi Egamizning Musoga bergan amrini ado etdi.