Read O‘zbek tilidagi Muqaddas Kitob, 2013 Levilar 26 Bible Online

Levilar 26 - O‘zbek tilidagi Muqaddas Kitob, 2013 bible

Levilar 26

¹O‘zingiz uchun butlar yasamang, o‘yib ishlangan tasvirlaru boshqa xudolarga atalgan toshlarni o‘rnatmang. Yurtingizda butsimon toshlar o‘rnatib, ularga sajda qilmang. Zotan Men Egangiz Xudoman.

²Shabbat kunlariga rioya qiling, muqaddas makonimni izzat eting. Men Egangizman.

³Agar qonunlarimga rioya qilib, amrlarimni bitta qoldirmay bajarsangiz,

⁴Men o‘z vaqtida yomg‘ir yog‘diraman. Yer hosilini beradi, daraxtlar meva soladi.

⁵G‘alla yanchish vaqti uzum terish paytiga ulashib ketadi, uzum terish payti ekin–tikin vaqtiga ulashib ketadi. To‘yguningizcha non yeysiz, yurtingizda bexatar yashaysiz.

⁶Men yurtingizga tinchlik ato etaman, yotganingizda hech kim sizni vahimaga solmaydi. Yurtingizdan yirtqich hayvonlarni haydab yuboraman. Zaminingiz urush ko‘rmaydi.

⁷G‘animlaringizni ta’qib qilasiz, ular qilichingizdan halok bo‘ladi.

⁸Beshtangiz g‘animlarning yuztasini quvadi, yuztangiz o‘n mingtasini quvadi. Ularni qilichdan o‘tkazasizlar.

⁹Sizlarga yuz buraman, barakali qilib ko‘paytiraman. Sizlar bilan qilgan ahdimga sodiq qolaman.

¹⁰Eski hosilingizni yeb bo‘lmasingizdan, yangisiga joy bo‘shatish uchun eskisini chiqarib tashlaysizlar.

¹¹Men orangizda yashayman, sizlardan hazar etmayman.

¹²Doimo orangizda bo‘laman. Men sizning Xudoyingiz, sizlar esa Mening xalqim bo‘lasizlar.

¹³Men Egangiz Xudoman. Sizlar bundan buyon qul bo‘lmasligingiz uchun Men sizlarni Misrdan olib chiqqanman. Qaddingizni rostlab yurishingiz uchun bo‘yinturug‘ingizni sindirganman.

¹⁴Agar Menga quloq solmasangiz, Mening amrlarimni bajarmasangiz,

¹⁵qonunlarimni rad etsangiz, qoidalarimdan nafrat qilsangiz, amrlarimni bajarmay, ahdimni buzsangiz,

¹⁶Men boshingizga kulfat solaman, sizlarni tuzalmas kasallikka duchor qilaman, isitmangizni chiqarib, ko‘zingizning nurini olaman, joningizni iztirobga solman. Ekkan urug‘laringiz behudaga ketar, chunki hosilingiz g‘animlarga nasib etar.

¹⁷Men yuzimni sizlarga qarshi buraman, dushmanlaringiz sizlarni mag‘lub etadi. Yovlaringiz ustingizdan hukmronlik qiladi. Sizlarni hech kim ta’qib qilmasa ham tumtaraqay bo‘lib qochasizlar.

¹⁸Shunda ham Menga itoat qilmasangizlar, gunohlaringiz uchun jazoni yetti karra kuchaytiraman.

¹⁹Takabbur qaysarligingizni sindiraman, osmonni temir kabi qattiq, yerni mis kabi zarang qilaman.

²⁰Mehnatingiz behudaga sarf bo‘lar: yeringiz hosil bermas, daraxtlaringiz meva solmas.

²¹Shunda ham Menga qarshilik qilib itoat etmasangiz, gunohlaringizga yarasha yetti karra ko‘proq ta’ziringizni beraman.

²²Sizlarga qarshi yirtqich hayvonlarni yuboraman. Ular sizlarni bolalaringizdan judo qiladi, mol–holingizni qirib yuboradi, shunda soningiz kamayib, ko‘chalaringiz huvullab qoladi.

²³Agar shundan ham saboq olmay, Menga qarshilik qilaversangiz,

²⁴Men ham sizlarga qarshiliq qilishni davom ettiraman. O‘zim gunohlaringizga yarasha yetti karra ko‘proq ta’ziringizni beraman.

²⁵Ahdimni buzganlaringiz uchun ustilaringizga yov qo‘shinlarini bostirib boraman. Shaharlaringizga qochib berkinsangizlar, oralaringizga o‘lat yuborib, sizlarni g‘animlar qo‘liga tutib beraman.

²⁶Rizq–ro‘zingizni qirqaman. O‘nta ayol bir tandirda non yopadi, nonni hammaga o‘lchab berishadi. Sizlar yeysizlaru, ammo to‘ymaysizlar.

²⁷Bordi–yu, shunda ham Menga quloq solmay qarshilik qilaversangiz,

²⁸Men ham g‘azab ustida sizlarga qarshilik qilaveraman. Gunohlaring uchun jazoni yetti karra ko‘paytiraman.

²⁹Sizlar hatto o‘g‘il–qizlaringizning tanasini yeydigan bo‘lasizlar.

³⁰Men sajdagohlaringizni buzib tashlayman, tutatqi qurbongohlaringizni vayron qilaman. Jasadlaringizni jonsiz butlaringiz ustiga uyib tashlayman. Sizlardan hazar qilaman.

³¹Shaharlaringizni vayron etaman, muqaddas joylaringizni buzib tashlayman. Qurbonliklaringizning yoqimli hididan zavq olmayman.

³²Yurtingizni shu qadar xarob qilamanki, u yerda o‘rnashib oladigan g‘animlaringiz uning ahvolidan dong qotadi.

³³Sizlarni esa xalqlar orasiga tarqatib yuboraman, qilichimni yalang‘ochlab sizlarni ta’qib qilaman. Yurtingiz huvullab qoladi, shaharlaringiz xarobazorga aylanadi.

³⁴Sizlar g‘animlaringiz yerida bo‘lganingizda yurtingiz dam oladi. Xarob bo‘lib yotgan yillar davomida yurtingiz orom oladi.

³⁵Vayronalar ichra yotib, dam oladi, chunki sizlar yurtingizda yashab yurgan paytingizda yeringizga dam bermagan edingizlar.

³⁶G‘animlaringiz yurtida omon qolganlaringizning yuragiga vahima solaman. Sizlar hilpirayotgan bargning ovozidan dahshatga tushasizlar. Qilichdan qochganday qochasizlar. Hech kim sizni ta’qib qilmasa ham, qochib yiqilasizlar.

³⁷Hech kim sizni quvlamasa ham, joningizni hovuchlab qochasizlar, bir–biringizga turtilib yiqilasizlar. Ha, sizlar g‘animlaringizga bas kela olmaysizlar.

³⁸Shunda xalqlar orasidan yo‘q bo‘lib ketasizlar, g‘animlaringiz yurti sizni yutib yuboradi.

³⁹Omon qolganlaringiz g‘animlar yurtida o‘lasizlar. O‘z gunohlaringiz va ota–bobolaringizning gunohlari tufayli adoyi tamom bo‘lasizlar.

⁴⁰Lekin oxiri sizlar o‘z gunohlaringizni va ota–bobolaringizning gunohlarini tan olasizlar. Menga qilgan qarshiligu xiyonatga iqror bo‘lasizlar.

⁴¹O‘sha gunohlaringiz tufayli Men sizlarga qarshilik qilib, sizlarni g‘animlaringiz yurtiga olib kelaman. Shunda sizning sunnatsiz yuragingiz kamtarlikka to‘ladi. Qilgan gunohlaringiz uchun jazo tortasizlar.

⁴²Shunda Men Yoqub bilan qilgan ahdimni yodga olaman. Is’hoq va Ibrohim bilan qilgan ahdimni ham yodimda tutaman, Men yurtni yodga olaman.

⁴³Huvullab yotgan yurt orom olgan yillar davomida, qilgan gunohlaringiz uchun jazo oladi. Axir, sizlar qoidalarimni rad etishga jazm etdingizlar, qonunlarimdan hazar qildingizlar.

⁴⁴Shunday bo‘lsa–da, Men sizlarni g‘animlaringiz yurtida rad etmayman, sizdan hazar qilmayman, tamomila qirib yubormayman. Sizlar bilan qilgan ahdimni buzmayman. Zotan Men sizning Egangiz Xudoman.

⁴⁵Men sizning manfaatingizni ko‘zlab, ota–bobolaringiz bilan qilgan ahdimni yodimda tutaman. Men Xudoyingiz bo‘lishim uchun, ota–bobolaringizni ellarning ko‘zi oldida Misrdan olib chiqqanman. Men Egangizman.”

⁴⁶Egamiz Muso orqali Isroil xalqiga Sinay tog‘ida bergan farmonu qonun–qoidalar shulardan iborat edi.