Read O‘zbek tilidagi Muqaddas Kitob, 2013 Levilar 6 Bible Online

Levilar 6 - O‘zbek tilidagi Muqaddas Kitob, 2013 bible

Levilar 6

¹Egamiz Musoga quyidagi qoidalarni berdi:

²agar birortangiz Egamizga xiyonat qilsangiz, ya’ni sizga omonatga berilgan yoki garovga qo‘yilgan narsa haqida qo‘shningizni aldasangiz, yoki qo‘shningizning biror narsasini o‘g‘irlasangiz, yoki tovlamachilik qilsangiz,

³yoki yo‘qolgan narsani topib olib, topmadim, deb aytsangiz, yoki qasam ichib turib yolg‘on guvohlik bersangiz, siz gunoh qilgan bo‘lasiz.

⁴Gunoh qilib, aybingizni tan olganingizdan keyin o‘g‘irlagan, tovlamachilik qilib qo‘lga kiritgan, omonatga berilgan, topib olgan,

⁵yolg‘on qasam ichib o‘zingizga olib qolgan har qanday narsani egasiga qaytarib bering. Ustiga o‘sha narsaning beshdan bir qismi qiymatini ham qo‘shib bering.

⁶Bundan tashqari, ayb qurbonligi uchun Egamizga nuqsonsiz bir qo‘chqorni yoki qo‘chqorning qiymatiga ko‘ra kumushni olib keling.

⁷Ruhoniy Egamiz oldida sizni gunohdan poklaydi, shunda qilgan har qanday aybingiz kechiriladi.

⁸Egamiz Muso orqali

⁹Horun va uning o‘g‘illariga kuydiriladigan qurbonlikka oid quyidagi qoidalarni berdi: kuydiriladigan qurbonlik qurbongoh ustida tun bo‘yi, ertalabgacha qolsin. Qurbongoh ustidagi olov doim yonib tursin.

¹⁰Ertasi kuni ertalab ruhoniy zig‘ir matosidan tikilgan libos va ichidan ishtonni kiysin. So‘ng kuydirilgan qurbonlikning kulini qurbongoh ustidan yig‘ishtirib olsin. Kulni qurbongohning yoniga tashlasin.

¹¹Keyin ustidagi liboslarni yechib, boshqa liboslarni kiysin. Kulni qarorgohdan tashqaridagi halol joyga olib chiqib tashlasin.

¹²Qurbongohdagi olov o‘chmay doim yonib turishi shart. Har kuni ertalab ruhoniy olovga o‘tin tashlab, uning ustiga kuydiriladigan qurbonlikni qo‘ysin. Tinchlik qurbonligining yog‘ini ham o‘sha olovda kuydirsin.

¹³Qurbongohdagi olov zinhor o‘chmasin, u muttasil yonib tursin.”

¹⁴Don nazr qilganda quyidagi qoidaga rioya qilinsin: Horunning o‘g‘illari don nazrini qurbongoh oldiga olib kelishsin.

¹⁵Ruhoniy zaytun moyi qo‘shilgan sifatli unning bir hovuchini va ustidagi xushbo‘y tutatqining hammasini olib, qurbongoh ustida kuydirsin. Bunday qilish unning hammasi Xudoga tegishli ekanini bildiradi. Bu nazrdan Egamizga yoqimli hid boradi.

¹⁶Unning qolganidan xamirturushsiz nonlar yopilsin. Horun va uning o‘g‘illari bu nonlarni muqaddas joyda yesinlar. Nonlar Uchrashuv chodirining hovlisida tanovul qilinishi lozim.

¹⁷Unga xamirturush qo‘shilmasin. Egamizga atab, olovda kuydiriladigan nazrlardan ularga beriladigan ulush shudir. U gunoh qurbonligi va ayb qurbonligi singari g‘oyat muqaddasdir.

¹⁸Horunning naslidan bo‘lgan har bir erkak zoti bu nazrdan yesa bo‘ladi. Egamizga atab, olovda kuydiriladigan nazrlardan Horunning nasliga avlodlar osha berilgan doimiy ulush shudir. Bu nazrga tekkan har qanday narsa muqaddas bo‘ladi.”

¹⁹Egamiz Muso orqali yana quyidagi qoidalarni berdi:

²⁰Horun va uning o‘g‘illari ruhoniylikka tayinlangan kuni Egamizga don nazrini keltirishsin. Bu nazrning miqdori kundalik nazrday to‘rt kosa sifatli undan tashkil topsin. Unning ikki kosasi ertalab, ikki kosasi kechqurun nazr qilinsin.

²¹Undan zaytun moyiga xamir qorilsin, so‘ng tovada qovurilsin. Qovurilgan xamir moyga yaxshilab bo‘ktirilgan bo‘lsin, uni burdalab Egamizga nazr qiling. Bu nazrdan Egamizga yoqimli hid boradi.

²²Boshiga moy surtilib, ruhoniylikka tayinlanadigan Horunning o‘g‘li bu nazrni tayyorlasin. Bu turdagi nazr har bir ruhoniylikka tayinlash marosimida Egamizga keltirilsin. Nazrni butunligicha kuydirish lozim.

²³Xullas, ruhoniy keltirgan har qanday don nazri butunligicha kuydirilsin, uni yeyish mumkin emas.

²⁴Egamiz Muso orqali

²⁵Horun va uning o‘g‘illariga gunoh qurbonligiga oid quyidagi qoidalarni berdi: gunoh qurbonligi qilinadigan jonivor Egamizning oldida, kuydiriladigan qurbonlik bo‘g‘izlanadigan joyda bo‘g‘izlansin. Bu g‘oyat muqaddas qurbonlikdir.

²⁶Gunoh qurbonligini keltirgan ruhoniy qurbonlik go‘shtidan tanovul qilsin. Qurbonlik go‘shti muqaddas joyda, ya’ni Uchrashuv chodirining hovlisida yeyilishi lozim.

²⁷Qurbonlik go‘shtiga tekkan har qanday narsa muqaddas bo‘ladi. Agar qurbonlikning qoni kiyimga sachrasa, kiyim muqaddas joyda yuvilsin.

²⁸Go‘sht pishirilgan sopol idish sindirilsin. Bordi–yu, go‘sht bronza qozonda pishirilgan bo‘lsa, qozonni ishqalab yuvish lozim.

²⁹Ruhoniylar urug‘iga mansub har bir erkak zoti bu qurbonlik go‘shtidan tanovul qilsa bo‘ladi. Bu qurbonlik g‘oyat muqaddasdir.

³⁰Bordi–yu, gunoh qurbonligining qoni Uchrashuv chodirining ichiga, gunohdan poklash uchun Muqaddas xonaga olib kirilsa, bunday qurbonlik go‘shtini tanovul qilish mumkin emas. Uni butunligicha kuydirish lozim.