Read O‘zbek tilidagi Muqaddas Kitob, 2013 Levilar 7 Bible Online

Levilar 7 - O‘zbek tilidagi Muqaddas Kitob, 2013 bible

Levilar 7

¹Ayb qurbonligi g‘oyat muqaddasdir. Uni keltirganda quyidagi qoidaga rioya qilinsin:

²ayb qurbonligi uchun keltiriladigan jonivorni kuydiriladigan qurbonlik bo‘g‘izlanadigan joyda so‘yishsin. Uning qonini qurbongohning to‘rtta yon tomoniga sepib chiqishsin.

³Jonivorning hamma yog‘i keltirilsin: dumbasi, ichak–chovoqlarini qoplab turgan yog‘lari,

⁴ikkala buyragi, buyrak atrofidagi yog‘lari va jigarning a’lo qismi. Jigarning a’lo qismi buyraklar bilan birga ajratib olinsin.

⁵Ruhoniy bularni olovda kuydirib, Egamizga nazr qilsin. Bu ayb qurbonligidir.

⁶Ruhoniylar urug‘iga mansub bo‘lgan har bir erkak zoti qurbonlikni tanovul qilsa bo‘ladi. Uni muqaddas joyda tanovul qilishsin, chunki bu qurbonlik g‘oyat muqaddasdir.

⁷Ayb qurbonligi uchun ham, gunoh qurbonligi uchun ham qoida bir: qurbonlikning go‘shti gunohdan poklash marosimini olib borgan ruhoniyga tegishli bo‘lsin.

⁸Birovning kuydiriladigan qurbonligini keltirgan ruhoniy o‘ziga qurbonlikning terisini olsin.

⁹Tandirda yopilgan, qozonda yoki tovada tayyorlangan har qanday don nazri ham, uni keltirgan ruhoniyga tegishli bo‘lsin.

¹⁰Lekin boshqa turdagi don nazrlari, zaytun moyi aralashtirilgan yoki aralashtirilmaganidan qat’iy nazar, Horunning hamma o‘g‘illariga birday tegishli bo‘lsin.

¹¹Egamizga tinchlik qurbonligini keltirganingizda quyidagi qoidaga rioya qiling:

¹²agar qurbonlikni shukrona aytish uchun keltirayotgan bo‘lsangiz, qurbonlik bilan birga zaytun moyi aralashtirilgan xamirturushsiz nonlarni, zaytun moyi surtilgan xamirturushsiz chalpaklarni hamda sifatli un va zaytun moyidan qorib tayyorlangan kulchalarni keltiring.

¹³Shukrona qurbonligi qatorida xamirturushli nonlarni ham olib keling.

¹⁴Nonlarning har bir turidan bittasini Egamizga hadya sifatida taqdim qiling. Bu nonlar tinchlik qonini qurbongohga sepgan ruhoniyniki bo‘lsin.

¹⁵Shukrona aytish uchun keltirilgan tinchlik qurbonligining go‘shtini o‘sha kuniyoq tanovul qiling. Qurbonlik go‘shtidan ertalabgacha qoldirmang.

¹⁶Bordi–yu, qurbonlikni ichgan ontingiz bo‘yicha keltirsangiz, yoki ko‘ngildan chiqarib bersangiz, go‘shtini qurbonlik qilgan kuningiz va qolganini ikkinchi kuni ham yesangiz bo‘ladi.

¹⁷Uchinchi kuni esa qurbonlikning qolgan hamma go‘shtini kuydirib tashlang.

¹⁸Agar qilgan tinchlik qurbonligingizning go‘shti uchinchi kuni tanovul qilinsa, qurbonligingiz qabul bo‘lmaydi va hisobingizga o‘tmaydi. Qurbonligingiz bulg‘angan hisoblanib, uning go‘shtidan yegan odam jazoga tortiladi.

¹⁹Har qanday nopok narsaga tekkan qurbonlik go‘shti yeyilmasin. Uni kuydirib tashlang. Go‘shtning qolganini esa har bir pok odam tanovul qilishi mumkin.

²⁰Bordi–yu, biror odam harom bo‘la turib, Egamizga keltirilgan tinchlik qurbonligining go‘shtidan yesa, o‘z xalqi orasidan yo‘q qilinsin.

²¹Agar birortangiz odamning nopokligiga, harom xayvonga yoki har qanday jirkanch jonzotga tegib, Egamizning tinchlik qurbonligi go‘shtidan tanovul qilsangiz, xalqingiz orasidan yo‘q qilinasiz.

²²Egamiz Muso orqali

²³Isroil xalqiga quyidagi qoidalarni berdi: mol, qo‘y va echkining yog‘ini aslo yemang.

²⁴Harom o‘lgan yoki yovvoyi hayvon g‘ajib tashlagan jonivorning yog‘ini har qanday ehtiyojlarga ishlatishingiz mumkin, lekin uni aslo tanovul qilmang.

²⁵Bordi–yu, birortangiz Egamizga atab, olovda kuydiriladigan qurbonlikning yog‘idan yesangiz, xalqingiz orasidan yo‘q qilinasiz.

²⁶Qush yoki hayvonning qonini iste’mol qilmang. Qayerda yashashingizdan qat’iy nazar, bu amrimga rioya qiling.

²⁷Bordi–yu, birortangiz qon iste’mol qilsangiz, xalqingiz orasidan yo‘q qilinasiz.

²⁸Egamiz Muso orqali,

²⁹Isroil xalqiga quyidagi qoidalarni berdi: tinchlik qurbonligini keltirganingizda, qurbonlikning bir qismini Egamizga taqdim qiling.

³⁰Olovda kuydiriladigan bu nazrni o‘z qo‘lingiz bilan olib keling. Qurbonlikning yog‘i va to‘shini keltiring. To‘shni Egamizga bag‘ishlaganingizni ko‘rsatish uchun yuqoriga ko‘taring.

³¹Ruhoniy yog‘ni qurbongoh ustida kuydirsin, to‘sh esa Horun va uning o‘g‘illariniki bo‘lsin.

³²Tinchlik qurbonligining o‘ng sonini ruhoniyga hadya qiling.

³³Qurbonlikning qonini keltirgan va yog‘ini kuydirgan Horunning o‘g‘liga o‘shani ulush qilib bering.

³⁴Zotan Isroil xalqi qilgan tinchlik qurbonligining yuqoriga ko‘tarilgan to‘shini va hadya qilingan sonini Egamiz Horun va uning o‘g‘illariga berdi. Bu Isroil xalqidan ularga beriladigan doimiy ulushdir.

³⁵Horun va uning o‘g‘illari Egamiz oldida ruhoniy bo‘lib xizmat qilishlari uchun tayinlangan kundan boshlab, olovda kuydiriladigan qurbonliklardan ularga tegadigan ulush ana shudir.

³⁶Horun va uning o‘g‘illariga moy surtilgan kuni Isroil xalqi bu ulushni ularga berishini Egamiz amr etdi. Avlodlar osha bu ularning doimiy ulushidir.

³⁷Xullas, kuydiriladigan qurbonlik, don nazri, gunoh qurbonligi, ayb qurbonligi, ruhoniylikka tayinlash marosimida keltiriladigan qurbonlik va tinchlik qurbonligiga oid qoidalar shulardan iboratdir.

³⁸Muso Isroil xalqi bilan Sinay tog‘i yon bag‘ridagi sahroda turgan paytlarida Egamiz ularga bu qurbonliklarni keltira boshlashni buyurgan edi.