Read O‘zbek tilidagi Muqaddas Kitob, 2013 Levilar 8 Bible Online

Levilar 8 - O‘zbek tilidagi Muqaddas Kitob, 2013 bible

Levilar 8

¹Egamiz Musoga dedi:

²“Horun va uning o‘g‘illarini Uchrashuv chodiri kiraverishiga olib kel, ular bilan birga ruhoniylik liboslarini, muqaddas qiladigan moyni, gunoh qurbonligi uchun buqani, ikkita qo‘chqorni va bir savat xamirturushsiz nonlarni olib kel.

³So‘ng butun jamoani o‘sha yerga to‘pla.”

⁴Muso Egamizning aytganini qildi. Jamoa Uchrashuv chodiriga kiraverishda to‘plangach,

⁵Muso ularga dedi: “Men hozir Egam bergan amrni bajaraman.”

⁶Muso Horun va uning o‘g‘illarini oldinga chiqarib yuvintirdi.

⁷So‘ng Horunning ustiga ko‘ylakni kiydirib, beliga belbog‘ni bog‘ladi. Ustidan ridoni kiydirib, efodni taqdi. Beliga naqsh solingan kamarni bog‘lab, efodni mahkamladi.

⁸Ko‘ksiga ko‘krakpech taqib, ko‘krakpech xaltasining ichiga Urim va Tummimni soldi.

⁹Horunning boshiga sallani kiydirdi. Egamizning Musoga bergan amriga binoan sallaning old tomoniga oltin lavhani o‘rnashtirdi, bu lavha Horun Egamizga bag‘ishlanganini bildirar edi.

¹⁰So‘ng Muso Muqaddas chodirga va uning ichidagi hamma ashyolarga muqaddas qiladigan moydan surtib chiqib, ularni muqaddas qildi.

¹¹Qurbongoh ustiga moydan yetti marta sepdi. So‘ng qurbongohga, qurbongoh buyumlariga, qo‘lyuvgichga va qo‘lyuvgich tagligiga moydan surtib, ularni muqaddas qildi.

¹²U Horunning boshiga ham muqaddas qiladigan moydan surtib, Horunni Egamizning xizmatiga bag‘ishladi.

¹³So‘ng Egamizning amriga ko‘ra, Horunning o‘g‘illarini oldinga chiqarib, ularning ustiga ko‘ylaklar kiydirdi, bellariga belbog‘lar, boshlariga peshanabog‘lar bog‘ladi.

¹⁴Keyin Muso gunoh qurbonligi qilinadigan buqani yetaklab keldi. Horun va uning o‘g‘illari qo‘llarini buqaning boshiga qo‘yishdi.

¹⁵Muso buqani so‘ydi. Qurbongohni poklash uchun barmog‘ini qonga botirib, qonni qurbongohning shoxlariga surtib chiqdi. Qonning qolganini qurbongohning yoniga to‘kdi. Shu yo‘sin u qurbongohni poklab, Egamizga bag‘ishladi.

¹⁶So‘ng buqaning ichak–chovoqlarini qoplagan hamma yog‘larni, jigarning a’lo qismini, ikkala buyragini va buyrak atrofidagi yog‘larini ajratib olib, qurbongoh ustida kuydirdi.

¹⁷Buqaning o‘zini esa terisi, go‘shti va ichak–chovoqlari bilan birga, Egamizning amriga ko‘ra, qarorgohning tashqarisiga olib chiqib kuydirdi.

¹⁸So‘ng Muso kuydiriladigan qurbonlik qilish uchun qo‘chqorni olib keldi. Horun va uning o‘g‘illari qo‘llarini qo‘chqorning boshiga qo‘yishdi.

¹⁹Muso qo‘chqorni so‘yib, qonidan qurbongohning to‘rtta yon tomoniga sepib chiqdi.

²⁰So‘ng qo‘chqorning tanasini bo‘laklarga bo‘lib, kallasini, bo‘laklarini va yog‘ini qurbongoh ustida kuydirdi.

²¹Ichak–chovoqlari va oyoqlarini yuvib, qo‘chqorni butunligicha qurbongoh ustida kuydirdi. Olovda kuydirilgan bu qurbonlikdan Egamizga yoqimli hid bordi. Muso hammasini Egamizning amriga binoan bajardi.

²²So‘ng Muso ikkinchi qo‘chqorni yetaklab keldi. Horun va uning o‘g‘illarini ruhoniylikka tayinlash marosimida keltiriladigan qurbonlik shu edi. Horun va uning o‘g‘illari qo‘llarini qo‘chqorning boshiga qo‘yishdi.

²³Muso qo‘chqorni so‘yib, qo‘chqorning qonidan Horunning o‘ng qulog‘i solinchagiga, o‘ng qo‘lining bosh barmog‘iga va o‘ng oyog‘ining bosh barmog‘iga surtdi.

²⁴So‘ng Muso Horunning o‘g‘illarini oldinga chiqarib, qo‘chqorning qonidan ularning o‘ng quloqlari solinchaklariga, o‘ng qo‘llari bosh barmoqlariga va o‘ng oyoqlari bosh barmoqlariga surtdi. Qonning qolganini esa qurbongohning to‘rtta yon tomoniga sepib chiqdi.

²⁵U qo‘chqorning yog‘ini, chunonchi dumbasini, ichak–chovoqlarini qoplab turgan yog‘larni, jigarning a’lo qismini, ikkala buyragini, buyrak atrofidagi yog‘larini va o‘ng sonini ajratib oldi.

²⁶Egamiz huzuridagi xamirturushsiz nonlar solingan savatdan xamirturushsiz nondan bittasini, zaytun moyi qo‘shilgan nondan bittasini va chalpakdan bittasini olib, qo‘chqorning yog‘i va o‘ng soni ustiga qo‘ydi.

²⁷U bularning hammasini Horunning va uning o‘g‘illarining qo‘liga tutqazdi. Ular bularni Egamizga bag‘ishlaganini ko‘rsatish uchun yuqoriga ko‘tardilar.

²⁸So‘ng Muso bu nazrlarni ularning qo‘llaridan olib, qurbongoh ustida kuydiriladigan qurbonlik bilan birga kuydirdi. Olovda kuydirilgan bu nazrlardan Egamizga yoqimli hid bordi. Ruhoniylikka tayinlash marosimida keltirilgan nazrlar shular edi.

²⁹Keyin Muso to‘shni olib, uni Egamizga bag‘ishlaganini ko‘rsatish uchun yuqoriga ko‘tardi. Egamizning amriga binoan ruhoniylikka tayinlanish marosimida qurbonlik qilingan qo‘chqorning bu qismi Musoga tegadigan ulush edi.

³⁰Muso muqaddas qiladigan moydan va qurbongoh ustidagi qondan olib, Horunga va uning liboslariga hamda Horunning o‘g‘illariga va ularning liboslariga sepdi. Shunday qilib, u Horunni va uning liboslarini hamda Horunning o‘g‘illarini va ularning liboslarini muqaddas qildi.

³¹Muso Horun va uning o‘g‘illariga dedi: “Uchrashuv chodiriga kiraverishda qurbonlikning go‘shtini pishiringlar. Go‘shtni o‘sha yerning o‘zida, savatdagi nazr qilingan nonlarga qo‘shib yenglar. Zotan bu Egamizning amridir.

³²Ortib qolgan go‘sht va nonni kuydiringlar.

³³Ruhoniylikka tayinlash marosimi tamom bo‘lgunga qadar, yetti kun davomida Uchrashuv chodiri kiraverishidan jilmanglar.

³⁴Biz bugungi marosimni Egamizning amriga ko‘ra, sizlarni gunohdan poklash uchun ado etdik.

³⁵Sizlar Uchrashuv chodiriga kiraverishda kechayu kunduz yetti kun davomida bo‘lib, Egamizning barcha talablarini bajaringlar. Shunda nobud bo‘lmaysizlar. Egamizning amri shudir.”

³⁶Horun va uning o‘g‘illari Egamizning Muso orqali amr qilgan hamma narsani bajardilar.