Read O‘zbek tilidagi Muqaddas Kitob, 2013 Levilar 9 Bible Online

Levilar 9 - O‘zbek tilidagi Muqaddas Kitob, 2013 bible

Levilar 9

¹Sakkizinchi kuni Muso Horunni, uning o‘g‘illarini va Isroil oqsoqollarini chaqirtirib keldi.

²U Horunga dedi: “Gunoh qurbonligi uchun bir nuqsonsiz buzoqni, kuydiriladigan qurbonlik uchun esa bir nuqsonsiz qo‘chqorni Egamizning huzuriga olib kel.

³So‘ng Isroil xalqiga ayt, ular ham gunoh qurbonligi uchun bitta takani, kuydiriladigan qurbonlik uchun bir yoshli nuqsonsiz buzoqni va bir yoshli nuqsonsiz qo‘zini,

⁴tinchlik qurbonligi uchun bitta buqani va bitta qo‘chqorni olib kelishsin. Ular bu jonivorlarni Egamizning oldida qurbonlik qilishsin. Bular bilan birga zaytun moyi aralashtirilgan don nazrini ham keltirishsin. Zotan Egamiz bugun ularga zohir bo‘ladi.”

⁵Ular Muso amr qilgan hamma narsani Uchrashuv chodirining oldiga olib kelishdi. Butun jamoa Egamiz huzuriga kelib turdi.

⁶Muso dedi: “Egamizning bergan bu amrini ado eting, shunda Egamizning ulug‘vorligi sizlarga zohir bo‘ladi.”

⁷So‘ng u Horunga dedi: “Qurbongohning oldiga bor, o‘zingni va xalqni gunohdan poklash uchun gunoh qurbonligingni va kuydiriladigan qurbonligingni keltir. So‘ng xalqning qurbonliklarini ado etib, ularni gunohdan pokla. Egamizning amri shudir.”

⁸Horun qurbongoh yoniga bordi, o‘z gunohlari uchun gunoh qurbonligi sifatida keltirgan buzoqni so‘ydi.

⁹O‘g‘illari Horunga qurbonlikning qonidan olib tutdilar. U barmog‘ini qonga botirib, qurbongohning shoxlariga surtib chiqdi, qonning qolganini esa qurbongohning yoniga to‘kdi.

¹⁰So‘ng Egamiz Musoga bergan amrga binoan gunoh qurbonligining yog‘ini, ikkala buyragini va jigarning a’lo qismini qurbongoh ustida kuydirdi.

¹¹Go‘shti va terisini esa qarorgohdan tashqariga olib chiqib kuydirib tashladi.

¹²Keyin Horun kuydiriladigan qurbonlikni so‘ydi. Horunning o‘g‘illari unga qurbonlik qonidan tutdilar. Horun qonni qurbongohning to‘rtta yon tomoniga sepib chiqdi.

¹³So‘ng o‘g‘illari kuydiriladigan qurbonlikning bo‘laklari va kallasini Horunga birin–ketin berdilar. Horun bularning hammasini qurbongoh ustida kuydirdi.

¹⁴So‘ng qurbonlikning ichak–chovoqlarini va oyoqlarini yuvib, kuydirilgan qurbonlik ustida kuydirdi.

¹⁵Keyin Horun xalqning qurbonliklarini keltirdi. O‘zining gunohi uchun qurbonlik qilgani singari xalqning gunohi uchun ham takani so‘yib qurbonlik qildi.

¹⁶Kuydiriladigan qurbonlikni ham olib kelib, qoidaga ko‘ra, ado etdi.

¹⁷So‘ng don nazrini keltirib, nazrning bir hovuchini qurbongoh ustida kuydirdi. Bular ertalab kuydiriladigan kundalik nazrdan tashqari edi.

¹⁸Horun xalqning tinchlik qurbonligi uchun keltirgan buqa va qo‘chqorni so‘ydi. Uning o‘g‘illari tinchlik qurbonligining qonidan olib, Horunga tutdilar. Horun qonni qurbongohning to‘rtta yon tomoniga sepib chiqdi.

¹⁹So‘ng Horunning o‘g‘illari buqa va qo‘chqorning yog‘ini, ya’ni dumbasini, ichaklarini qoplab turgan yog‘larini, buyraklari va jigarning a’lo qismini

²⁰to‘shlar ustiga qo‘ydilar. Horun yog‘ni qurbongoh ustida kuydirdi.

²¹Muso amr qilganday Horun to‘shlarni va o‘ng sonni Egamizga bag‘ishlaganini ko‘rsatish uchun yuqoriga ko‘tardi.

²²Shundan keyin Horun qo‘llarini xalq tomon cho‘zib ularni duo qildi. Horun gunoh qurbonligini, kuydiriladigan qurbonlikni va tinchlik qurbonligini ado etgach, qurbongohdan pastga tushdi.

²³Muso bilan Horun Uchrashuv chodiriga kirishdi, chodirdan qaytib chiqqanlaridan keyin xalqni duo qilishdi. Shunda Egamizning ulug‘vorligi xalqqa zohir bo‘ldi.

²⁴Egamizning huzuridan olov chiqib, qurbongoh ustidagi kuydiriladigan qurbonlikni va yog‘larni yamlab yubordi. Xalq buni ko‘rgach, hayqirib yubordi–da yerga muk tushdi.