Read O‘zbek tilidagi Muqaddas Kitob, 2013 Yeremiyo 10 Bible Online

Yeremiyo 10 - O‘zbek tilidagi Muqaddas Kitob, 2013 bible

Yeremiyo 10

¹Ey Isroil xalqi, Egamiz sizlarga aytayotgan so‘zlarga quloq soling.

²Egamiz shunday demoqda: “Boshqa xalqlarga taqlid qilmanglar, Boshqa xalqlar singari Osmondagi alomatlardan qo‘rqmanglar.

³Xalqlarning udumlari behuda! Ular o‘rmondan daraxt kesadi, Hunarmand boltasi bilan unga shakl berib,

⁴Kumushu oltin bilan bezatadi. Yiqilib ketmasin, deya mix bilan mahkamlaydi,

⁵Butlari polizdagi qo‘riqchilarga o‘xshaydi. Ular gapira olmaydi. Ularni ko‘tarib yurish kerak bo‘ladi, O‘zlari yura olmaydi. Ulardan qo‘rqmanglar, Ularning qo‘lidan hech qanday yomonlik kelmaydi, Yaxshilik ham qila olmaydi.”

⁶Ey Egamiz, Senga o‘xshashi yo‘q! Sen buyukdirsan, Sening noming ulug‘ va qudratlidir.

⁷Ey ellarning Shohi, Sendan qo‘rqmaydigan biror zot bormi?! Sen bunga loyiqdirsan. Xalqlarning donishmandlari orasida, Ularning shohlari orasida Senga o‘xshashi yo‘q.

⁸Ahli donishu shohlar ahmoq va befarosat. Ular betayin yog‘och butlaridan maslahat olishadi.

⁹Butlarini yasash uchun kumushni Tarshishdan, Oltinni Ufazdan keltirishadi. Butlarni hunarmandu zargarlar yasagan. Ko‘k va safsar liboslar bilan bezagan, Hammasi — mohir ustalarning ishidir.

¹⁰Ammo Egamiz haq Xudodir. U barhayot Xudo va abadiy Shohdir. G‘azablanganda yer silkinadi, Uning qahriga xalqlar dosh bermaydi.

¹¹— Boshqa xalqlarga shunday deb ayt: “Bu xudolar yeru osmonni yaratmagan. Ular yer yuzidan va osmon ostidan yo‘q bo‘lib ketadi.”

¹²Egamiz qudrati ila yerni yaratdi, Donoligi ila dunyoni bunyod etdi, Idroki ila osmon gumbazini o‘rnatdi.

¹³Uning ovozidan osmondagi suvlar gulduraydi, U dunyoning to‘rt burchidan bulutlar olib keladi. Yomg‘ir yog‘dirishdan oldin momaqaldiroqni guldiratadi, Omborlaridagi shamollardan esdiradi.

¹⁴Uning oldida hamma odamlar ahmoq va nodondir. Zargarlar o‘z butlari tufayli sharmanda bo‘ladi, Ularning sanamlari jonsiz va soxtadir.

¹⁵Bu betayin butlar aldamchidir. Ularni jazolaganim zahoti yo‘q bo‘lishadi.

¹⁶Yoqubning Xudosi esa unday emas. Butun borliqni U yaratgan, Isroil qabilasini O‘ziga mulk qilgan. Uning nomi Sarvari Olamdir.

¹⁷Ey qurshovda yashaganlar! Bor–yo‘g‘ingizni yig‘ishtirib oling.

¹⁸Zero, Egamiz shunday demoqda: “Men sizlarni Isroil yurtidan uloqtirib tashlayman, Boshingizga kulfat yog‘diraman, Toki sizlar buni sezinglar.”

¹⁹Sho‘rim qurisin! Shunchalik azoblarga qoldim! Og‘ir yaralangan ekanman. Ammo o‘zimga o‘zim “Boshimda shu dard bor ekan, Unga chidashim kerak”, dedim.

²⁰Chodirim yiqitilgan, iplari uzib tashlangan. Farzandlarim ketdi, ular yo‘q bo‘ldi. Endi chodirimni kim tikadi?! Chodirimning pardalarini kim osadi?!

²¹Axir, cho‘ponlar ahmoq, Ular Egamizdan maslahat olmadilar. Shuning uchun ham ishlari o‘ngidan kelmadi, Qo‘ylari har yoqqa tarqalib ketdi.

²²Eshitinglar! Bir xabar kelmoqda! Ana, shimoldan shovqin–suron ko‘tarilmoqda! Lashkarlar Yahudo shaharlarini xarob qilar emish, Chiyabo‘rilar yashaydigan makonga aylantirar emish.

²³Ey Egam, bilaman, Odam zoti o‘z taqdirini o‘zi belgilay olmaydi, O‘z qadamini o‘zi boshqara olmaydi.

²⁴Ey Egam, meni jahl ustida jazolamagin. Adolating ila haq yo‘lga solgin, Aks holda meni yo‘q qilib yuborasan.

²⁵Seni tan olmaydigan xalqlar ustiga qahringni soch, Senga sajda qilmaydigan ellar ustiga soch, Axir, ular Yoqub naslining boshini yedilar. Hammasini halok etib, yo‘q qildilar, Yurtini xarobazorga aylantirdilar.