Read O‘zbek tilidagi Muqaddas Kitob, 2013 Yeremiyo 11 Bible Online

Yeremiyo 11 - O‘zbek tilidagi Muqaddas Kitob, 2013 bible

Yeremiyo 11

¹Yeremiyoga Egamizning quyidagi so‘zi ayon bo‘ldi:

²“Mening Isroil xalqi bilan tuzgan ahd shartlarimga quloq sol. Bularni Yahudo xalqi va Quddus aholisiga yetkaz.

³Ularga ayt: Isroil xalqining Xudosi — Egamiz shunday demoqda: “Ushbu ahd shartlariga rioya qilmagan har bir odam la’nati bo‘lsin!

⁴Men ota–bobolaringizni Misrdan, o‘sha temir o‘choq ichidan olib chiqqan edim. Ularga, gaplarimga quloq solinglar, hamma amrlarimni bajaringlar, deb aytgan edim. Agar shunday qilsangiz, sizlar Mening xalqim, Men esa sizning Xudoyingiz bo‘laman, deb aytdim.

⁵Men ota–bobolaringizga bergan qasamimni bajarish uchun shu so‘zlarni aytgan edim. Mana, Men ularga va’da qilgan, sut va asal oqib yotgan yurtda sizlar yashab yuribsizlar.” “Omin, ey Egam, aytganing kelsin”, dedim men.

⁶Egamiz menga shunday dedi: “Aytadigan gaplarimning hammasini Yahudo shaharlarida va Quddus ko‘chalarida shunday deb e’lon qilgin: Ushbu ahdning shartlarini eshitinglar, ularga rioya qilinglar.

⁷Men ota–bobolaringizni Misrdan olib chiqqanimdan beri ularni ogohlantirib keldim. Ularga: “Mening gaplarimga quloq solinglar”, deb qayta–qayta aytdim.

⁸Ammo ular itoat qilmadilar, Menga quloq solmadilar. Aksini qilib, yovuz yuraklarining o‘jarliklarini bajardilar. Shuning uchun ahdda yozilgan hamma la’natlarni ularning boshiga soldim. Men ularga buyurgan ahdimning shartlarini bajarmaganlari uchun shunday qildim.”

⁹Egamiz menga dedi: “Yahudo xalqi va Quddus aholisi Menga qarshi fitna uyushtirishmoqda.

¹⁰Ular ota–bobolarining eski gunohlariga qaytishdi. Ota–bobolari singari gaplarimga quloq solmay, begona xudolarga ergashib, sajda qilishdi. Yahudo xalqi Isroil xalqiga taqlid qildi, Men ota–bobolari bilan tuzgan ahdimni ular buzishdi.”

¹¹Shuning uchun Egamiz shunday deb aytmoqda: “Ularning boshlariga shunday kulfat keltiramanki, birontasi ham qutulib qololmaydi. Menga iltijo qilishsa ham, ularning iltijolariga quloq solmayman.

¹²O‘shanda Yahudo xalqi bilan Quddus aholisi xudolariga iltijo qilishadi. Ular bu xudolariga qurbonliklar keltirishar edi. Ammo kulfat kuni o‘sha xudolari ularni aslo qutqarolmaydi.

¹³Ey Yahudo xalqi, shaharlaringiz soni qancha bo‘lsa, xudolaringiz ham shunchadir. Quddusdagi ko‘chalar qancha ko‘p bo‘lsa, qurbongohlaringiz ham shunchadir. Sizlar bu qurbongohlarni jirkanch Baalga qurbonliklar keltirish uchun qurgandingizlar.”

¹⁴“Ey Yeremiyo, sen bu xalq uchun ibodat qilma. Ular uchun iltijo qilib yolvorma. Ularning boshlariga kulfat tushib, iltijo qilganlarida, Men ularga quloq solmayman.

¹⁵“Aziz xalqim shuncha jirkanch ishlar qildi. Endi uyimga kirishlariga nima haqlari bor?! Va’dalaru qurbonliklar bilan kulfatning oldini olib bo‘larmidi?! Axir, xalqim qabihliklar qilayotganda sevindi–ku!”

¹⁶Egamiz O‘z xalqini “Yaxshi meva beradigan, maftunkor yam–yashil zaytun daraxti”, deb atagan edi. Ammo endi Egamiz bo‘ronning dahshatli tovushi ostida daraxtga o‘t qo‘yadi, uning shox–shabbalari yonib ketadi.

¹⁷Bu daraxtni ekkan Sarvari Olamning O‘zi uni yo‘q qilishga amr berdi. Zero, Isroil va Yahudo xalqlari qabihliklar qildilar. Baalga qurbonliklar keltirib, Xudoni g‘azablantirdilar.

¹⁸Egamiz menga dushmanlarimning fitnasini ayon qildi. Egamiz ularning yovuz qilmishlarini ko‘rsatgani uchun, men bu haqda xabar topdim.

¹⁹Men bo‘g‘izlanishga olib ketilayotgan yuvosh qo‘ziday bo‘lgan ekanman. Dushmanlarim menga qarshi fitna uyushtirganlarini payqamagan ekanman. Ular shunday deb aytishgan edi: “Daraxt va uning mevalari kesilganday, Kelinglar, uni ham bu dunyodan daf qilaylik, Uning xotirasini o‘chiraylik!”

²⁰Ey Sarvari Olam, Sen adolat bilan hukm qilasan, Insonning yuragini, xayollarini sinaysan. Dushmanlarimdan o‘ch olganingni ko‘ray, Da’voimni O‘zing hal qil!

²¹Shunda Egamiz menga shunday dedi: “Ey Yeremiyo, Onoto‘t aholisi senga: “Egamizning nomidan gapirma, bo‘lmasa o‘lasan”, deb aytib yurishibdi.”

²²Ammo Men, Sarvari Olam, shunday demoqdaman: “Men ularni jazolayman! Yigitlari qilichdan o‘ladi. O‘g‘il–qizlari qahatchilikdan nobud bo‘ladi.

²³Ularning birontasi omon qolmaydi. Belgilangan vaqtda Onoto‘t aholisining boshiga kulfat keltiraman.”