Read O‘zbek tilidagi Muqaddas Kitob, 2013 Yeremiyo 12 Bible Online

Yeremiyo 12 - O‘zbek tilidagi Muqaddas Kitob, 2013 bible

Yeremiyo 12

¹Sen bilan da’volashganimda, ey Egam, Sen har doim haq bo‘lib chiqasan. Shunday bo‘lsa–da, Sen bilan yana gaplashmoqchiman, Adolat xususida savol bermoqchiman. Nechun fosiqlarning ishi yurishadi? Nechun munofiqlar rohatda yashaydi?

²Ularni Sen ekib undirding, Ular o‘sib hosilga kirdilar. Noming ularning og‘zidan tushmaydi, Ammo dillari Sendan uzoqdir.

³Lekin Sen, ey Egam, meni bilasan. Sen meni sinagansan, Dilim Senga moyil ekanini O‘zing ko‘rding. Endi yovlarimni bo‘g‘izlanadigan qo‘ylarday sudragin! Bo‘g‘izlashga tayyorlab, ajratib qo‘ygin!

⁴Oh, qachongacha yer qaqrab yotadi? Qachongacha hamma daladagi o‘tlar quriydi? Bu yerda yashaydigan fosiqlarning dastidan, Qushlaru hayvonlar nobud bo‘ldi. Bu odamlar: “Bizga nima bo‘lishini Yeremiyo qayerdan ham bilardi?!” deb aytishadi.

⁵Egamiz menga dedi: “Ey Yeremiyo, Sen odamlar bilan poyga qilib holdan toygan bo‘lsang, Qanday qilib otlar bilan poyga qilasan?! Faqat osoyishta yurtda o‘zingni bexatar sezsang, Iordan bo‘yidagi chakalakzorda nima qilasan?!

⁶Hatto qarindoshlaring ham sendan yuz o‘girdi, O‘z oilang senga xiyonat qildi. Ovozi boricha senga do‘q urdi. Ular senga shirin gapirishsa ham, Ularning so‘zlariga ishonma.”

⁷Egamiz shunday deb aytdi: “Men xonadonimni tark etdim, Mulk qilib olgan xalqimni rad etdim. Sevgan xalqimni dushmanlarining qo‘liga berdim.

⁸O‘z xalqim Menga O‘rmondagi sherday bo‘lib qoldi. U Menga qarab bo‘kirdi, Shuning uchun undan nafratlandim.

⁹O‘z xalqim Menga Olachipor kalxatday bo‘lib qoldi. Boshqa kalxatlar xalqimni o‘rab oldi! Boring, barcha yovvoyi hayvonlarni yig‘ing, Xalqimni g‘ajib tashlashsin.

¹⁰To‘da–to‘da cho‘ponlar uzumzorimni xarob qildilar, Dalamni ular payhon qildilar. Ha, go‘zal dalamni tashlandiq cho‘lga aylantirdilar.

¹¹Ular yerimni xarob qildilar, Tashlandiq yerim ko‘z oldimda qaqrab yotibdi. Butun yurtim vayron bo‘ldi, Ammo bu bilan hech kimning ishi yo‘q.

¹²Bosqinchilar sahrodagi Hamma yalang qirlarni egallab oldilar. Endi Mening qilichim butun yurtni vayron qiladi, U boshidan bu boshigacha hammani qirib tashlaydi. Bexatar yashayotgan bironta odam qolmaydi.

¹³Mening xalqim bug‘doy ekdi, Ammo tikan o‘rib oldi, Zo‘r berib ishladi, Ammo hech narsaga erishmadi. Qattiq qahrim hosilini nobud qildi. Ular hosilsiz qolib, sharmanda bo‘lishdi.”

¹⁴Egamiz shunday demoqda: “Men xalqimga Isroil yurtini mulk qilib bergan edim, ammo uning yovuz qo‘shnilari xalqimga hujum qilib, yurtimni talon–taroj qildilar. Men bu yovuz xalqlarni o‘z yurtlaridan sug‘urib tashlayman. Yahudo xalqini ularning iskanjasidan sug‘urib olaman.

¹⁵O‘sha yovuz xalqlarni sug‘urib tashlaganimdan keyin, ularga yana rahm–shafqat qilaman. Hammasini o‘z yurtlariga, o‘z mulklariga qaytarib olib kelaman.

¹⁶Ilgari bu xalqlar Isroil xalqiga Baal nomi bilan qasam ichishni o‘rgatgan edilar. Agar endi ular xalqim Isroilning yo‘lini astoydil o‘rgansalar, “Egamiz shohid” deya Mening nomim bilan qasam ichsalar, xalqim orasida o‘rnashib oladilar.

¹⁷Bordi–yu, bironta xalq Menga itoat etmasa, o‘sha xalqni tag–tomiri bilan qo‘porib tashlayman.” Egamizning kalomi shudir.