Read O‘zbek tilidagi Muqaddas Kitob, 2013 Yeremiyo 15 Bible Online

Yeremiyo 15 - O‘zbek tilidagi Muqaddas Kitob, 2013 bible

Yeremiyo 15

¹Egamiz menga dedi: “Hatto Muso bilan Shomuil huzurimda turib, yolvorganda ham, Men bu xalqqa achinmagan bo‘lardim. Bu xalqni huzurimdan hayda! Yo‘qolishsin!

²Ular sendan “Qayerga boramiz?” deb so‘rashsa, ularga shunday deb ayt: Egamiz shunday demoqda: Hamma peshanasidagini ko‘rsin, Ba’zilar o‘latga yo‘liqib nobud bo‘lsin, Ba’zilar qilichdan o‘tkazilsin, Ba’zilar ochlikdan qirilib ketsin, Ba’zilar asirlikka tushib, surgunga ketsin.

³Egamiz demoqda: “Ularning boshiga to‘rt xil balo–ofatni keltiraman: ular qilichdan halok bo‘lishadi, jasadlarini itlar sudraydi, qushlar va yovvoyi hayvonlar ularni g‘ajib tashlaydi.

⁴Hizqiyo o‘g‘li Manashe Yahudo shohligi taxtida o‘tirib, Quddusda ko‘p qabihliklar qilgan edi. O‘sha qabihliklar tufayli dunyodagi barcha shohliklar xalqimdan hazar qiladigan bo‘ladi.”

⁵Egamiz shunday demoqda: “Ey Quddus, kim senga achinar ekan?! Kim sen uchun motam tutar ekan?! Birontasi senga kelib, Hol–ahvol so‘rarmikan?!”

⁶Egamiz shunday demoqda: “Sen Meni rad etding, Menga orqa o‘girding. Senga rahm qilaverib charchadim. Endi senga qarshi qo‘l ko‘taraman, Seni yo‘q qilib yuboraman.

⁷Men seni yurtning har bir shahrida Bug‘doyni sovurganday sovuraman. Seni farzandlaringdan judo qilaman. Ey xalqim, seni nobud etaman, Axir, sen o‘z yo‘lingdan qaytmading.

⁸Men bevalaringni dengiz qumidan ham ko‘p qilaman, Yigitlaringning onalariga qarshi Kuppa–kunduz kuni qirg‘in etuvchini jo‘nataman. To‘satdan boshlariga dahshat va azob–uqubat solaman.

⁹Yetti farzandning onasi holdan toyib, jon beradi. Uning quyoshi kunduz kuni botadi, U xo‘rlanib, sharmanda bo‘ladi. Omon qolganlari dushman qilichidan o‘ladi.” Egamizning kalomi shudir.

¹⁰Sho‘rim qurisin! Nega onam meni dunyoga keltirgan ekan–a?! Men butun yurt bilan tortishib, janjallashyapman. Qarz olmagan, qarz bermagan bo‘lsam ham, hamma meni qarg‘amoqda.

¹¹Egamiz shunday dedi: “Ey Quddus ahli, Men ayrimlaringizni omon qoldiraman, o‘shalarga yaxshiroq taqdir ato qilaman. Qolganingizning ustiga esa dushman tortib kelaman, boshingizga kulfatu og‘ir kunlar solaman.

¹²Ey Yahudo xalqi, siz bronza va temirni sindira olmaganingiz kabi, shimoldan sizga hujum qiladigan dushmanlarni ham sindira olmaysizlar.”

¹³“Sizlar yurtingizning hamma joyida ko‘p gunohlar qildingizlar. Shuning uchun boyliklaringiz va xazinalaringiz dushmanlarga tekin o‘lja bo‘ladi.

¹⁴O‘zingiz bilmagan yurtda dushmanlaringizga xizmat qilasizlar. Mening g‘azabim olovday sizlarni yamlamay yutadi”, deb aytmoqda Egamiz.

¹⁵Shunda men dedim: Ey Egam, Sen hammasini bilasan, Yodga ol meni, yordam bergin, Meni quvg‘in qilganlardan o‘ch olgin. G‘animlarimga sabr–toqat qilib, Tag‘in meni halok qilib yuborma. Seni deb xo‘rlanganimni esingdan chiqarma.

¹⁶Aytgan har bir so‘zingga tashna edim. So‘zlaringdan shodlanar edim, So‘zlaring dilimga quvonch bag‘ishlar edi. Zero, men Senga tegishliman, Ey Parvardigori Olam — Egamiz.

¹⁷Men xushchaqchaq ulfatlar davrasida o‘tirmadim, Ularning xursandchiligiga sherik bo‘lmadim. Qo‘ling ostida yolg‘iz o‘zim o‘tirar edim, Sen meni g‘azabga to‘ldirgan eding.

¹⁸Nega mening dardim zo‘rayyapti? Nega og‘ir yaram tuzalmayapti? Nahotki yozda qurigan buloq kabi Umidlarimni barbod qilsang?!

¹⁹Egamiz demoqda: “Agar tavba qilsang, seni yana xizmatimga olaman. Bo‘lmag‘ur gaplar o‘rniga to‘g‘ri so‘zlar gapirsang, Seni O‘zimning so‘zlovchim qilaman. Shunda sen ularning oldiga bormaysan, Ular sening oldingga kelishadi.

²⁰Men seni bu xalq qarshisida Mustahkam bronza devorday qilaman. Ular senga hujum qilishadi, Lekin seni yenga olishmaydi. O‘zim sen bilan birga bo‘laman, Seni xalos qilib, qutqaraman.

²¹Ha, fosiqlar qo‘lidan xalos qilaman, Zolimlar changalidan ozod etaman.” Egamizning kalomi shudir.