Read O‘zbek tilidagi Muqaddas Kitob, 2013 Yeremiyo 16 Bible Online

Yeremiyo 16 - O‘zbek tilidagi Muqaddas Kitob, 2013 bible

Yeremiyo 16

¹Egamizning quyidagi so‘zi menga ayon bo‘ldi:

²“Oila qurma, bu yurtda o‘g‘il–qizlaring bo‘lmasin.

³Bu yurtda tug‘ilgan o‘g‘il–qizlar haqida va ularni dunyoga keltirgan ota–onalar haqida Men, Egang, shunday deyapman:

⁴Ular og‘ir xastaliklardan halok bo‘lishadi. Ular uchun hech kim aza tutmaydi, jasadlarini ko‘madigan hech–kim bo‘lmaydi, jasadlari go‘ng kabi yer ustida yotaveradi. Ular qilichdan va qahatchilikdan halok bo‘lishadi, jasadlari qushlar va yovvoyi hayvonlarga yem bo‘ladi.”

⁵Zero, Egamiz shunday deb aytmoqda: “Azador uyga kirma, motam tutma, ta’ziya bildirma. Men bu xalqni tinchlik–xotirjamligimdan mahrum qildim. Men bu xalqni sevmayman, ularga mehr–shafqat ko‘rsatmayman.

⁶Bu yurtning kattayu kichigi o‘lib ketadi, ularni hech kim ko‘mmaydi. Hech kim ular uchun aza tutmaydi, qayg‘udan badanini tilmaydi, sochini oldirmaydi.

⁷Azadorlarga tasalli berish uchun hech kim ovqat olib chiqmaydi. Hech kim ota yoki onasidan judo bo‘lganlarga tasalli berish uchun bir kosa sharob uzatmaydi.

⁸Ziyofat bo‘layotgan uyga kirma, ular bilan o‘tirib, yeb–ichma.”

⁹Zero, Isroil xalqining Xudosi — Sarvari Olam shunday demoqda: “Sening zamoningda shodu xurramlik sadolariga, kelin–kuyovning xursandchilik ovozlariga chek qo‘yaman. Buni o‘z ko‘zing bilan ko‘rasan.

¹⁰Aytganlarimning hammasini odamlarga gapirib berganingda, ular sendan shunday deb so‘raydilar: “Nega Egamiz bizga bunday kulfatlarni ravo ko‘ryapti? Aybimiz nima? Egamiz Xudoga qarshi nima gunoh qildik?”

¹¹Sen ularga shunday javob ber: Egamiz aytmoqda: Ota–bobolaringiz Meni tark etdilar. Mendan yuz o‘girib, qonunlarimga rioya qilmadilar. Boshqa xudolarga ergashdilar, ularga xizmat qilib, sajda etdilar.

¹²Sizlarning gunohlaringiz esa ota–bobolaringiznikidan ham oshib tushdi. Mana, har biringiz yovuz yuragingizning o‘jarliklarini bajaryapsiz, Menga quloq solmayapsiz.

¹³Shuning uchun Men sizlarni bu yerdan boshqa bir yurtga uloqtirib yuboraman. U yurtni o‘zingiz ham, ota–bobolaringiz ham bilmaydilar. U yerda sizlar kechayu kunduz boshqa xudolarga xizmat qilasizlar. Endi Men sizlarga rahm qilmayman.”

¹⁴Egamiz demoqda: “Shunday kunlar keladiki, odamlar ont ichganda: “Isroil xalqini Misrdan olib chiqqan Egamiz shohid”, deb aytmaydigan bo‘ladi.

¹⁵Buning o‘rniga ular: “Isroil xalqini shimoldagi yurtdan va O‘zi surgun qilgan barcha boshqa yurtlardan olib chiqqan Egamiz shohid”, deb ont ichadigan bo‘lishadi. Men xalqimni O‘zim ota–bobolariga bergan yurtga qaytarib olib kelaman.”

¹⁶Egamiz shunday demoqda: “Mana, Men talay dushmanni yuboryapman. Ular xalqimni baliqchilar kabi tutib oladilar. U dushmanlar ketidan boshqalarni jo‘nataman, ular ovchilar kabi xalqimni har bir tog‘da, har bir tepalikda, qoyalarning jarliklarida ovlaydilar.

¹⁷Men xalqimning tutgan hamma yo‘llarini ko‘rib turibman. Ularning yovuz yo‘llari Mendan yashirin emas. Hamma gunohlari ko‘z o‘ngimda.

¹⁸Qilgan gunohlari va qilmishlari uchun xalqimga ikki barobar qilib qaytaraman. Zotan ular jonsiz, jirkanch xudolari bilan yurtimni harom qildilar, Mening mulkimni makruh butlarga to‘ldirdilar.”

¹⁹Ey Egam, mening qudratim, qo‘rg‘onimsan, Kulfat kunida panohimsan. Dunyoning to‘rt burchagidan xalqlar Sening oldingga kelib, aytadi: “Ajdodlarimizning soxta butlaridan bo‘lak hech narsasi yo‘q edi, Bu betayin butlaridan foyda bo‘lmagan edi.

²⁰Inson o‘zi uchun xudolarni yasay oladimi?! Bunday xudolar haqiqiy Xudo emas–ku!”

²¹“Shunday ekan, ularga saboq beray, Kuch–qudratimni ularga ko‘rsatib qo‘yay. Shunda Egangiz Men ekanligimni bilib olishadi.”