Read O‘zbek tilidagi Muqaddas Kitob, 2013 Yeremiyo 17 Bible Online

Yeremiyo 17 - O‘zbek tilidagi Muqaddas Kitob, 2013 bible

Yeremiyo 17

¹Ey Yahudo xalqi, sizlarning gunohingiz temir qalam bilan o‘yib yozilgan. Sizlarning gunohingiz tosh yuraklaringiz ustiga va qurbongohlaringiz shoxlariga olmos uchi bilan o‘yib bitilgan.

²Hatto farzandlaringiz ham baland qirlardagi va sersoya daraxtlar ostidagi qurbongohlarga borib, Asheraning ustunlariga sajda qilishadi.

³Butun yurtda qilgan gunohlaringiz evaziga Men O‘z tog‘imni, sizning hamma boyliklaringizni, xazinalaringizni va barcha sajdagohlaringizni dushmanga o‘lja qilib beraman.

⁴Sizlarga Men mulk qilib bergan yurtdan o‘z aybingiz tufayli ayrilasizlar. Men sizlarni o‘zingiz bilmagan bir yurtga jo‘nataman, dushmanlaringizga hammangizni qul qilib beraman. Sizlar Meni g‘azablantirdingiz, g‘azabim so‘nmas olov kabi yonmoqda.

⁵Egamiz shunday demoqda: “Umidini insonga bog‘lagan, Foniy bandaning kuchiga ishongan, Yuragi Egamizdan uzoqlashgan odam la’natidir.

⁶Bunday odam sahrodagi butaday bo‘ladi, Farovon hayot ko‘rmaydi. Cho‘lning qaqroq joylarida, Sho‘r bosgan bo‘m–bo‘sh yerlarda yashaydi.”

⁷“Egamizdan umid qilgan kishi baxtlidir, Yolg‘iz Unga inongan saodatlidir!

⁸Bunday kishi suv bo‘yiga o‘tqazilgan daraxtga o‘xshaydi, Oqar suvlar tomon ildiz otadi. Kunning jaziramasidan qo‘rqmaydi, Barglari doim yam–yashil bo‘ladi. Qurg‘oqchilik kelganda ham bezovta bo‘lmaydi, Meva berishdan to‘xtamaydi.”

⁹“Odamning yuragi shunchalik ayyor–ki, Uning davosi yo‘q! Uning ichidagini kim biladi?!

¹⁰Ammo Men, Egangiz, odamning yuragini bilaman, Uning o‘y–fikrlarini tekshiraman. Qilmishiga yarasha jazolayman, Qilgan ishiga yarasha taqdirlayman.”

¹¹Nohaqlik bilan boylik orttirgan kishi, O‘zi qo‘ymagan tuxumlarni bosib yotgan kaklikka o‘xshaydi. Bunday kishi umrining yarmida Boyliklaridan mahrum bo‘ladi, Hayoti oxirlab qolganda ahmoq bo‘lib chiqadi.

¹²Muqaddas makonimiz Azaldan yuksaltirilgan ulug‘vor taxtdir!

¹³Ey Egamiz, Sen Isroilning yolg‘iz umidisan! Seni tark etganlarning hammasi sharmanda bo‘lur, Sendan yuz o‘girganlarning ismlari tuproqqa yozilur. Ey Egamiz, ular Seni tark etdilar. Ha, hayotbaxsh suvlar bulog‘idan voz kechdilar.

¹⁴Ey Egam, menga shifo ber, sog‘ayib ketay. Meni qutqargin, najot topay. Axir, yolg‘iz Seni olqishlayman.

¹⁵Qara, bu odamlar ustimdan kulishyapti, “Egamizning tahdidli so‘zlari qani?! Aytganlari bajo bo‘lsin–chi endi!” deb aytishyapti.

¹⁶Men esa xalqingga cho‘pon bo‘ldim, Xizmat qilishdan bosh tortmadim. Ofat kuni kelishini xohlamaganimni bilasan. Og‘zimdan chiqqan har bir so‘z Senga ayondir.

¹⁷Meni vahimaga solmagin, Kulfat kunida panohim Sensan.

¹⁸Meni quvg‘in qilganlar sharmanda bo‘lsin, Meni esa sharmanda qilma. Dushmanlarim sarosimaga tushsin, Meni esa dovdiratib qo‘yma. Ularning boshlariga kulfat keltir, Jazosini ikki barobar og‘irroq qilgin.

¹⁹Egamiz menga shunday dedi: — Yahudo shohlari kirib chiqadigan Xalq Darvozasi oldiga borib tur, so‘ng Quddusning boshqa darvozalari oldiga ham bor.

²⁰Borganingda xalqqa shunday deb ayt: “Ey Yahudo shohlari, ey Yahudo xalqi, bu darvozadan o‘tib yurgan butun Quddus aholisi, Egamizning so‘zini eshitinglar!

²¹Egamiz shunday deb aytmoqda: Shabbat kuni yuk tashimanglar, Quddus darvozalaridan yukni ko‘tarib kirmanglar. Hushyor bo‘linglar, tag‘in hayotingizga o‘zingiz zomin bo‘lib qolmanglar.

²²Shabbat kuni uyingizdan biron yukni ko‘tarib chiqmanglar, hech qanday ish qilmanglar. Men ota–bobolaringizga amr qilganimdek, Shabbat kunini muqaddas deb bilinglar.

²³Ota–bobolaringiz gaplarimga e’tibor bermagan, Menga quloq solmagan edilar. Ular qaysarlik qilib, so‘zlarimni tinglamagandilar, gapimga kirmagandilar.”

²⁴Endi Egamiz shunday demoqda: “Bordi–yu, sizlar gaplarimga quloq solsangizlar, Shabbat kuni shahar darvozalaridan yuk tashimasangizlar, o‘sha muborak kunni muqaddas deb bilib, hech qanday ish qilmasangizlar,

²⁵Quddus taxtida doim Dovud naslidan bo‘lgan shoh o‘tiradi. Jang aravalariyu otlarni minib olgan shohlar va a’yonlar shahar darvozalaridan kirishadi. Yahudo xalqi va Quddus aholisi ular bilan birga kiradilar. Quddusdan to abad odam arimaydi.

²⁶Shunda Yahudo shaharlaridan, Quddus atrofidagi qishloqlardan, Benyamin hududidan, qirlardan, g‘arbdagi qirlar etaklaridan, Nagav cho‘lidan odamlar keladi, ular Egamizning uyiga kuydiriladigan va boshqa qurbonliklarni, shukrona va don nazrlarini, xushbo‘y tutatqilarni olib keladilar.

²⁷Bordi–yu, sizlar gapimga quloq solmasangizlar, Shabbat kunini muqaddas deb bilmay, yuk tashib, darvozalardan kirib chiqsangizlar, Men shahar darvozalarini yondirib yuboraman. Olov Quddus saroylarini yo‘q qiladi, hech kim uni o‘chira olmaydi.