Read O‘zbek tilidagi Muqaddas Kitob, 2013 Yeremiyo 18 Bible Online

Yeremiyo 18 - O‘zbek tilidagi Muqaddas Kitob, 2013 bible

Yeremiyo 18

¹Egamiz Yeremiyoga shu so‘zini ayon qildi:

²“Qani bo‘l, kulolning uyiga bor. O‘sha yerda senga bir gap aytaman.”

³Men kulolning uyiga bordim. Kulol charx urib, ishlayotgan edi.

⁴U loydan yasayotgan idish buzilib qoldi, shundan keyin u o‘zi xohlagan shakldagi boshqa bir idishni yasadi.

⁵Egamiz O‘z so‘zini menga ayon qilib,

⁶dedi: “Ey Isroil xonadoni, nahotki bu kulol qilgan ishni Men sizlarga qila olmasam?! Sizlar Mening qo‘limda kulol qo‘lidagi loyga o‘xshaysizlar.

⁷Men biron xalqni yoki shohlikni qo‘porib tashlashimni, yo‘q qilib vayron qilishimni e’lon etishim mumkin.

⁸Ammo o‘sha xalq yovuz qilmishlaridan qaytsa, Men ham ularning boshlariga falokat keltirish niyatimdan qaytaman.

⁹Shunday paytlar ham bo‘ladiki, Men biron xalq yoki shohlikka: “Sizlarni qayta bunyod etib, mustahkam qilaman”, deb aytaman.

¹⁰Ammo o‘sha xalq Mening oldimda qabihlik qilsa yoki aytganlarimga quloq solmasa, Men niyatimdan qaytaman, ularga qilmoqchi bo‘lgan yaxshiligimni qilmayman.”

¹¹Shunday ekan, Yahudo xalqi bilan Quddus aholisiga ayt: “Egamiz shunday demoqda: Mana, Men boshingizga soladigan kulfatni tayyorlayapman, sizlarga qarshi rejalar tuzyapman. Bo‘ldi endi, har biringiz yomon yo‘lingizdan qaytinglar. Turmush tarzingizni o‘zgartiringlar. Eski qilmishlaringizdan voz kechinglar.”

¹²Ammo ular: “Gapirganing befoyda!” — deyishadi. “Biz baribir xohlaganimizday yashaymiz, yovuz yuraklarimizning o‘jarliklarini qilaveramiz”, deb aytishadi.

¹³Shuning uchun Egamiz demoqda: “Xalqlardan so‘rab–surishtiring–chi, Bunaqasini hech eshitganmikan?! Bokira qiz Isroil jirkanch bir ish qildi.

¹⁴Lubnondagi qorlar hech eriganmi?! Azim cho‘qqilarni hech tark etganmi?! Uning muzdek suvlari hech ado bo‘lganmi?!

¹⁵Mening xalqim esa Meni tark etdi, Ular behuda butlarga tutatqi tutatdilar. Butlari tufayli xalqim qoqildi, Azaliy yo‘lidan adashdi. To‘g‘ri yo‘lni tark etib, so‘qmoqlardan yurib ketdi.

¹⁶Shu sababdan yurti huvullab qoladi, Yurtning ahvolidan odamlar qotib qoladi, O‘tgan–ketganlar dahshatga tushadi, “Yo tavba”, deb, yoqasini ushlashadi.

¹⁷Sharqdan esgan shamol kabi, Men ularni dushmanlari oldida sochib tashlayman. Boshlariga kulfat tushgan kuni Ularga orqa o‘giraman, Ularga nazar solmayman.”

¹⁸So‘ng odamlar shunday dedilar: “Qani, Yeremiyoga qarshi fitna uyushtiraylik. Axir, qonunni o‘rgatadigan ruhoniylar, maslahat beradigan donishmandlar va Xudoning so‘zini aytadigan payg‘ambarlar har doim bor. Yeremiyoga tuhmat qilaylik, uning gaplariga umuman e’tibor bermaydigan bo‘laylik.”

¹⁹Ey Egam, meni tingla, Raqiblarim gaplarini eshit!

²⁰Nahotki yaxshilikka yomonlik qaytarishsa?! Esingdami, huzuringda turib, Ular uchun Senga yolvorgandim, Ulardan Sening qahringni qaytargandim. Ular esa menga chuqur qazidilar.

²¹Shunday ekan, bolalarini ochlikdan o‘ldir, Hammasini qilich izmiga topshir. Xotinlari bolalaridan judo bo‘lsin, Hammasi beva bo‘lib qolsin. Erkaklari o‘latdan qirilib ketsin, Yigitlari jangda halok bo‘lsin.

²²To‘satdan ustiga bosqinchi yuborganingda, Uylaridan dod–faryodlar ko‘tarilsin! Axir, ular meni tutib olmoqchi bo‘lib, chuqur qazidilar, Oyog‘imni sirtmoqqa ilintirmoqchi bo‘ldilar.

²³Meni o‘ldirish uchun fitna qildilar, Buni Sen bilasan, ey Egam. Ularning gunohlarini kechirma, Jinoyatlaridan o‘tma. G‘azablanib, jazolarini bergin, Ular Sening oldingda yiqilib qolsinlar.