Read O‘zbek tilidagi Muqaddas Kitob, 2013 Yeremiyo 21 Bible Online

Yeremiyo 21 - O‘zbek tilidagi Muqaddas Kitob, 2013 bible

Yeremiyo 21

¹Shoh Zidqiyo Yeremiyo payg‘ambarning oldiga Malkiyo o‘g‘li Peshxur va Masiyo o‘g‘li ruhoniy Zafaniyoni yubordi. Shunda Egamiz O‘z so‘zini Yeremiyoga ayon qildi. Peshxur bilan Zafaniyo Yeremiyoga shunday dedilar:

²“O‘tinamiz, biz uchun Egamizga yolvor, chunki Bobil shohi Navuxadnazar bizga hujum qilyapti. Balki Egamiz avvalgidek mo‘jizalar ko‘rsatib, Navuxadnazarni orqaga chekintirar.”

³Yeremiyo ularga shunday deb javob berdi:

⁴“Borib, Zidqiyoga Isroil xalqining Xudosi — Egamizning so‘zlarini aytinglar: Sizlar qo‘lingizga qurol olib, sizlarni qamal qilgan Bobil shohiga va Bobilliklarga qarshi jang qilyapsizlar. Ammo qo‘lingizdagi qurollaringizni Men Bobilliklarga emas, balki o‘zlaringizga qarshi ishlataman. Mana shu shahar markazida qurollaringizni uyib tashlayman.

⁵Men O‘zim sizlarga qarshi chiqaman. O‘z qudratu ajoyibotlarim bilan, qahru g‘azabim bilan sizlarga qarshi jang qilaman.

⁶Bu shahar aholisini yo‘q qilaman. Odamlaru hayvonlar o‘latdan nobud bo‘ladilar.”

⁷Egamiz shunday demoqda: “Shundan keyin Men Yahudo shohi Zidqiyoni, uning a’yonlarini, shaharda urushdan, qahatchilikdan va o‘latdan omon qolgan hamma odamlarni Bobil shohi Navuxadnazarning qo‘liga beraman. Ularda qasdi borlarga topshiraman, dushman qo‘liga beraman. Dushmanlar shahar aholisini shafqatsizlarcha qirib tashlaydilar. Bironta odamning ham qonidan kechmaydilar, ularga achinmaydilar, rahm qilmaydilar.”

⁸“Sen bu xalqqa shunday deb ayt: Egamiz demoqda: Men sizlarga ikkita yo‘lni — hayot va o‘lim yo‘lini berdim.

⁹Shaharda qolganlar qilich, qahatchilik va o‘latdan nobud bo‘ladilar. Shahardan chiqib, Bobilliklarga taslim bo‘lganlar esa tirik qoladilar. Bu odamlar hech bo‘lmasa o‘z jonlarini saqlab qoladilar.

¹⁰Men bu shaharga yaxshilik emas, kulfat keltirishga qaror qildim. Bu shaharni Bobil shohiga taslim qilib beraman. Navuxadnazar shaharga o‘t qo‘yadi.” Egamizning kalomi shudir.

¹¹“Yahudo shohining xonadoniga shunday deb ayt: Egamizning so‘zini eshitinglar,

¹²ey Dovud sulolasi! Egamiz shunday demoqda: Har kuni ertalabdan adolat qilinglar, Jabrdiydalarni zo‘ravonlar qo‘lidan qutqaringlar. Aks holda qilgan yovuzliklaringiz tufayli Mening g‘azabim alanga oladi, U g‘azabimni so‘ndirishga hech kimning qurbi yetmaydi.”

¹³Egamiz shunday demoqda: “Ey, vodiydagi qoya ustida qurilgan Quddus, Men senga qarshiman! Sizlar aytasiz: “Kim ham bizga qarshi chiqa olardi?! Kim ham qo‘rg‘onlarimizga kira olardi?!”

¹⁴Men qilmishingizga yarasha jazoingizni beraman. Shohning saroyiga o‘t qo‘yaman, Olov atrofdagi hamma narsani yondiradi.” Egamizning kalomi shudir.