Read O‘zbek tilidagi Muqaddas Kitob, 2013 Yeremiyo 22 Bible Online

Yeremiyo 22 - O‘zbek tilidagi Muqaddas Kitob, 2013 bible

Yeremiyo 22

¹Egamiz menga shunday dedi: “Yahudo shohi saroyiga borib, quyidagi gaplarimni ayt:

²Ey, Dovud taxtida o‘tirgan Yahudo shohi, eshit. A’yonlaring va mana bu saroyga kirgan odamlaring ham sen bilan birga Egamizning so‘zini eshitsin.

³Egamiz shunday demoqda: Adolat va to‘g‘rilik bilan ish tuting. Jabrdiydalarni zo‘ravonlarning qo‘lidan qutqaring. Musofirlarga, yetim va bevalarga nohaqlik qilmang, ularni ezmang. Bu yerda begunoh odamning qonini to‘kmang.

⁴Bordi–yu, sizlar haqiqatan ham bularga rioya qilsangizlar, Quddus taxtida doim Dovud naslidan bo‘lgan shoh o‘tiradi. Jang aravalariyu otlar mingan shohlar saroy darvozalaridan kirishadi. A’yonlar va xalq ham ular bilan birga kiradi.

⁵Bordi–yu, bu amrlarimga rioya qilmasangizlar, Men O‘zimning nomim haqi ont ichib aytamanki, bu saroy vayron bo‘ladi.” Egamizning kalomi shudir.

⁶Egamiz Yahudo shohining saroyi haqida shunday demoqda: “Sen Men uchun go‘zal Gilad yurtiga o‘xshaysan, Bamisoli Lubnonning yuksak cho‘qqilarisan. Lekin qasam ichib aytamanki, sen sahroga o‘xshab qolasan, Huvullagan bir shaharga aylanib qolasan.

⁷Senga qarshi bosqinchilarni jo‘nataman, Qurollangan odamlarni yuboraman. Ular sara sadrlaringni kesadilar, Yog‘ochlaringni olovga tashlaydilar.

⁸Ko‘plab xalqlar bu shahar oldidan o‘tayotib, bir–birlaridan: “Nega Egamiz bunday buyuk shaharni shu ko‘yga solgan ekan–a?” deb so‘raydilar.

⁹Ularga shunday javob berishadi: “Shahar aholisi o‘zlarining Egasi Xudo bilan tuzgan ahdini buzdi. Boshqa xudolarga sajda qilib, xizmat qiladigan bo‘ldi.”

¹⁰O‘lgan shohingiz uchun yig‘lamang, U uchun aza tutmang. Undan ko‘ra surgun bo‘lgan shahzodangiz uchun qayg‘uring, U uchun achchiq–achchiq ko‘z yosh to‘king. Axir, u endi qaytib kelmaydi, Ona yurtini boshqa ko‘rmaydi.

¹¹Shoh Yo‘shiyodan keyin Yahudo taxtiga Yo‘shiyoning o‘g‘li Yohuxoz o‘tirgan edi. Shoh Yohuxoz surgun qilingandan keyin Egamiz u haqda shunday dedi: “U bu yerga hech qachon qaytib kelmaydi.

¹²Surgun qilingan yerda olamdan o‘tadi, bu yurtni boshqa ko‘rmaydi.”

¹³“Uyini nohaqlik bilan qurganning holiga voy! Yuqori xonalarini adolatsizlik bilan bino qilganning holiga voy! Bunday odam birodarini tekinga ishlatadi, Uning mehnat haqini bermaydi.

¹⁴U shunday deydi: “Mana, o‘zim uchun katta saroy qurdim, Yuqori qavatdagi xonalarni keng qildirdim.” U uyiga katta oynalar qo‘ydirmoqda, Devorlarini sadr yog‘ochi bilan qoplamoqda, Ularni qirmizi rangga bo‘yamoqda.

¹⁵Sen o‘zing uchun ko‘p sadr yog‘ochini yig‘ding, Bu bilan sen yaxshi shoh bo‘lib qolmading! Sening otang ham xohlaganicha yeb–ichgan, Ammo doim haqiqatu adolatni o‘rnatgan. Shu sababdan uning ishi yurishgan.

¹⁶U faqiru bechorani himoya qilgan, Shuning uchun farovon hayot kechirgan. Xudoni bilish degani shu emasmi?!” Egamizning kalomi shudir.

¹⁷“Sen esa faqat nohaq foydani ko‘zlaysan. Begunoh odamning qonini to‘kasan, Zo‘ravonlik va zulm o‘tkazasan.”

¹⁸Shu sababdan Yo‘shiyo o‘g‘li Yahudo shohi Yohayiqim haqida Egamiz shunday demoqda: “Uning uchun hech kim aza tutmaydi, “Voy, jigarim! Voy, jigarim!” deya yig‘lamaydi. “Xo‘jayinim! Olampanohim!” deya hech kim kayg‘urmaydi.

¹⁹Uni o‘lgan eshakning ahvoliga soladilar, Quddus darvozalaridan sudrab chiqib, otib yuboradilar.

²⁰Ey Quddus, Lubnonga chiqib faryod qilgin, Bashan o‘lkasiga borib, xitob etgin. Aborim tog‘larida turib, ovozing boricha baqirgin, Chunki hamma o‘ynashlaring yo‘q bo‘ldi.

²¹Farog‘atda yashaganingda, senga gapirdim, Sen esa “Gapingga quloq solmayman!” deb aytding. Ha, yoshligingdan shu yo‘lni tutgansan, Gapimga sen kirmagansan.

²²Shamol hamma cho‘ponlaringni supurib ketadi, O‘ynashlaring surgun bo‘ladi. Sen esa qabih ishlaring tufayli uyatda qolasan, Sharmandayi sharmisor bo‘lasan.

²³Sen “Lubnon” saroyida yashab yuribsan, Sadr daraxtlari orasida in qurgansan, Ammo tug‘ayotgan ayol kabi dard chekasan, Azobdan ingraysan.

²⁴Yohayiqim o‘g‘li Yohayixin haqida Egamiz shunday demoqda: “Ey Yahudo shohi Yohayixin, bordi–yu, sen Mening o‘ng qo‘limdagi muhr uzugim bo‘lganingda edi, Men barhayot Xudo bo‘lganim haqi ont ichib aytamanki, seni uloqtirib tashlagan bo‘lar edim.

²⁵Sen kimdan qo‘rqsang, seni o‘shaning qo‘liga beraman, senda qasdi borlarning qo‘liga topshiraman. Seni shoh Navuxadnazarning va Bobilliklarning qo‘liga beraman.

²⁶Seni va seni tuqqan onangni begona bir yurtga, kindik qoning to‘kilmagan bir yerga uloqtirib yuboraman. Sizlar o‘sha yerda o‘lasizlar.

²⁷Sizlar bu yurtga qaytib kelishni orzu qilasizlar, ammo qaytib kelmaysizlar.”

²⁸Yohayixin tashlab yuboriladigan siniq xumday bo‘lib qoladi, Hech kimga kerak bo‘lmaydigan sopol idishga o‘xshab qoladi. U bolalari bilan surgun bo‘ladi! O‘zi bilmagan yurtga uloqtirib tashlanadi!

²⁹Ey yurt, yurt, yurt! Egamizning so‘zini eshit!

³⁰Egamiz shunday demoqda: “Bu odamning farzandlarini nasabnomaga kiritmang, Uni hayotda omadi yo‘q, deb qayd qiling. Uning zurriyotidan birortasi muvaffaqiyat qozonmas, Birortasi Dovud taxtiga chiqa olmas. Yahudoda ular hech qachon hukmronlik qilmaydilar.”