Read O‘zbek tilidagi Muqaddas Kitob, 2013 Yeremiyo 23 Bible Online

Yeremiyo 23 - O‘zbek tilidagi Muqaddas Kitob, 2013 bible

Yeremiyo 23

¹Egamiz shunday demoqda: “Cho‘ponlar yaylovimdagi qo‘ylarni tarqatib yuboryaptilar, ularni yo‘q qilyaptilar. Bunday cho‘ponlarning holiga voy!”

²Isroil xalqining Xudosi — Egamiz shunday demoqda: “Ey xalqimni boqqan cho‘ponlar, sizlar qo‘ylarimni o‘z holiga tashlab qo‘ydingizlar. Ularni tarqatib, uzoqlarga qochirib yubordingizlar. Bu qilgan yovuz qilmishingiz uchun Men sizlarni o‘z holingizga qo‘ymay jazolayman.” Egamizning kalomi shudir.

³“Men qo‘ylarimni har xil yurtlarga haydab yuborgan edim. Endi O‘zim ularni yig‘ib olaman, o‘zlarining yayloviga olib kelaman. Ular barakali bo‘lib, ko‘payadilar.

⁴Men ular ustidan boshqa cho‘ponlarni tayinlayman. Cho‘ponlar qo‘ylarimni boqadilar. Shunda qo‘ylarim hech narsadan qo‘rqmaydi, sarosimaga tushmaydi. Ularning birontasi ham yo‘qolmaydi”, deb aytmoqda Egamiz.

⁵Egamiz demoqda: “Shunday kunlar keladiki, Men Dovud naslidan solih bir novdani chiqaraman. Bu Shoh donolik bilan hukmronlik qiladi. Adolat va to‘g‘rilik bilan ish tutadi.

⁶Uning hukmronligi davrida Yahudo xalqi bexatar yashaydi, Isroil xalqi osoyishta hayot kechiradi. O‘sha Shohni “Egamiz najotkorimizdir”, deb atashadi.”

⁷Egamiz demoqda: “Shunday kunlar keladiki, odamlar ont ichganda: ‘Isroil xalqini Misrdan olib chiqqan Egamiz shohid’, deb aytmaydigan bo‘ladi.

⁸Buning o‘rniga ular: ‘Isroil naslini shimoldagi yurtdan va surgun qilingan barcha boshqa yurtlardan olib chiqqan Egamiz shohid’, deb ont ichadigan bo‘ladi. Ular o‘z yurtlarida yashashadi.”

⁹Payg‘ambarlar haqida: Yurak–bag‘rim ezilib ketdi, Vujudim titrab ketmoqda. Egamiz tufayli, Uning aytgan muqaddas so‘zi tufayli Men mast odamga o‘xshab qoldim, Sharobga bo‘kkan kishiday bo‘lib qoldim.

¹⁰Evoh, yurt zinokorlarga to‘lib ketdi, La’nat tufayli yer qaqrab qoldi, Dashtdagi yaylovlar qurib yotibdi. Payg‘ambarlar qabihlik qilishga shoshiladi, Kuchini haqsizlik yo‘lida ishlatishadi.

¹¹Egamiz shunday demoqda: “Payg‘ambaru ruhoniylar betavfiqdirlar, Hatto Mening uyimda ham qabihlik qilganlarini ko‘rdim.”

¹²“Shu sababdan yurgan yo‘llari sirpanchiq bo‘ladi, Ular zulmatga g‘arq bo‘lishadi. Hammasi yiqilib qoladi. Jazo oladigan yili, Boshlariga kulfat keltiraman”, deb aytmoqda Egamiz.

¹³“Samariya payg‘ambarlari orasida Jirkanch bir ishni ko‘rdim: Ular Baal nomidan bashorat qilishdi, Xalqimni yo‘ldan ozdirishdi.

¹⁴Ammo Quddus payg‘ambarlari orasida Bundan ham battarog‘ini ko‘rdim: Ular zino qilib, yolg‘on ichida yashashadi, Yovuzlarning ishini qo‘llab turishadi, Shuning uchun hech kim yomon yo‘lidan qaytmayapti. Nazarimda ularning hammasi Sado‘m odamlariday bo‘lib qolgan, Quddus aholisi G‘amo‘ra aholisiga o‘xshab qolgan.”

¹⁵Sarvari Olam payg‘ambarlar haqida shunday demoqda: “Men ularga achchiq o‘tdan yediraman, Zaharli suvdan ichiraman, Zero, Quddus payg‘ambarlari tufayli Yurtimda betavfiqlar ko‘payib ketdi.”

¹⁶Sarvari Olam shunday demoqda: “Sizlarga bashorat qilayotgan payg‘ambarlarning gaplariga quloq solmanglar. Ular qo‘yningizni puch yong‘oqqa to‘ldiryapti. Ular Mening og‘zimdan chiqqan so‘zlarni emas, o‘z dil orzularini aytishyapti.

¹⁷Egangizning so‘zidan nafratlangan odamlarga ular hadeb “Hammasi yaxshi bo‘ladi” deyishadi. Yuragidagi o‘jarliklarni bajarganlarga “Boshingizga balo–qazo yetmaydi”, deyishadi.”

¹⁸Xo‘sh, Egamizning kengashida ulardan qaysi biri qatnashibdi?! Xudoning so‘zini qaysi biri eshitibdi?! Qaysi biri e’tibor bilan Uni tinglabdi?!

¹⁹Ana, bo‘ron ko‘tarildi! Bu Egamizning g‘azabidir. Uning g‘azabi quyun girdobi bo‘lib, Fosiqlarning boshiga tushdi.

²⁰Egamiz ko‘nglidagi niyatini bajarmaguncha, Uni oxirigacha yetkazmaguncha, G‘azabidan tushmaydi. Keyinchalik buni anglab olasizlar.

²¹Egamiz shunday dedi: “Bu payg‘ambarlarni Men yubormadim, Ular o‘zlari yugurib bordilar. Ularga Men gapirmadim, Ular esa bashorat qildilar.

²²Agar o‘sha payg‘ambarlar kengashimda bo‘lganlarida edi, So‘zlarimni xalqimga yetkazgan bo‘lardilar. Xalqimni yomon yo‘ldan, Yovuz qilmishlardan qaytargan bo‘lardilar.”

²³Egamiz shunday demoqda: “Men hamma yoqdaman — yaqinda ham, uzoqda ham o‘sha Xudoman.”

²⁴“Kim Mendan yashirina oladi?! Yeru ko‘kni to‘ldirib turgan Men emasmi?!” deb aytmoqda Egamiz.

²⁵“Mening nomimdan yolg‘on bashorat qilgan payg‘ambarlarning: “Men bir tush ko‘rdim! Xudo menga bir tush berdi!” deganlarini eshitdim.

²⁶Qachongacha bu davom etadi?! Ular yuraklaridagi hiylayu nayranglarini, yolg‘on bashoratlarini bas qilishadimi, yo‘qmi?!

²⁷Ularning ota–bobolari Meni unutib, Baalga sajda qilgan edilar. Shu singari bu soxta payg‘ambarlar “Xalq Egamizni unutsin”, deya bir–birlariga tushlarini aytishadi.”

²⁸Egamiz shunday demoqda: “Mayli, tush ko‘rgan payg‘ambar tushini aytsin, so‘zimni eshitgan esa uni sadoqat bilan e’lon qilsin. Axir, somon bilan bug‘doyning farqi bor–ku!”

²⁹Egamiz shunday demoqda: “Mening so‘zim olovday kuydiradi. Qoyani yoradigan bolg‘aday zarba beradi.”

³⁰Egamiz demoqda: “Bu payg‘ambarlar “Egamizning so‘zi” deb bir–biridan gap o‘g‘irlaydi. Men ularga qarshiman.”

³¹“Ha, Men o‘sha payg‘ambarlarga qarshiman”, — deb aytmoqda Egamiz. “Ular o‘zlaricha valdirab yuradilar, yana “bu Egamizning so‘zlari”, deb aytadilar.

³²Uydirma tushlarini aytgan payg‘ambarlarga qarshiman! Ular yolg‘onlariyu telbaligi bilan xalqimni yo‘ldan ozdirishmoqda. Ularni Men tayinlamaganman, xalqimning oldiga Men yubormaganman. Xalqimga ularning zarracha ham foydasi yo‘q.” Egamizning kalomi shudir.

³³Egamiz menga dedi: “Ey Yeremiyo, agar xalqimdan bo‘lgan birorta odam, payg‘ambar yoki ruhoniy sendan: “Bu safar Egamiz bizga nima yuklamoqchi?” deb so‘rasa, sen shunday deb javob ber: “Sizlar o‘zlaringiz Egamizga yuk bo‘ldingizlar. Endi U sizlarni uloqtirib tashlaydi.”

³⁴Bordi–yu, biron odam, payg‘ambar yoki ruhoniy: “Egamizning so‘zi bizga yuk bo‘ldi”, deb aytadigan bo‘lsa, Men unday odamni butun xonadoni bilan jazolayman.

³⁵Sizlar bir–biringizdan: “Egamiz nima deb javob berdi?” yoki “Egamiz nima deb aytdi?” deb so‘ranglar.

³⁶Ammo “Egamiz bizga nima yuklamoqchi?” deya boshqa so‘ramanglar. Zero, odamlar bu iborani ishlatib, o‘z so‘zlarini ishonarli qilmoqchi bo‘ladilar, barhayot Xudo, Sarvari Olam — Xudoyimizning so‘zlarini buzib aytadilar.

³⁷Sizlar esa payg‘ambarning oldiga borganingizda, undan: “Egamiz sizga nima javob berdi?” yoki “Egamiz sizga nima dedi?”, deb so‘ranglar.

³⁸Bordi–yu, sizlar gapimga kirmay, “Egamiz bizga nima yuklamoqchi?” deb yana so‘rasangizlar,

³⁹Men sizlarni yuk ko‘targanday ko‘tarib, O‘z huzurimdan uloqtirib tashlayman. Ota–bobolaringizga O‘zim bergan shaharni ham shu ko‘yga solaman.

⁴⁰Abadiy isnod va sharmandalikka duchor qilaman. Bunday sharmandalikni unutib bo‘lmaydi.”