Read O‘zbek tilidagi Muqaddas Kitob, 2013 Yeremiyo 25 Bible Online

Yeremiyo 25 - O‘zbek tilidagi Muqaddas Kitob, 2013 bible

Yeremiyo 25

¹Yahudo shohi Yo‘shiyo o‘g‘li Yohayiqim hukmronligining to‘rtinchi yilida Yeremiyoga Yahudo xalqi to‘g‘risida Egamizning so‘zi ayon bo‘ldi. Bobil taxtiga xuddi o‘sha yili Navuxadnazar o‘tirgan edi.

²Payg‘ambar Yeremiyo Yahudo xalqi va Quddus aholisiga shunday dedi:

³“Omon o‘g‘li Yo‘shiyo Yahudoda hukmronlik qilgan davrning o‘n uchinchi yilidan tortib to bugunga qadar Egamiz menga O‘z so‘zini ayon qilib kelmoqda. Mana, yigirma uch yildirki, men sizlarga to‘xtovsiz gapiryapman, ammo sizlar gaplarimga quloq solmayapsizlar.

⁴Egamiz oldingizga payg‘ambar qullarini birin–ketin yuborgan bo‘lsa ham, sizlar ularning gaplarini eshitmadingiz, ularga quloq solmadingiz.

⁵Ular sizlarga aytishgan edi: “Qabih ishlaringizni bas qilinglar. Yomon yo‘ldan qaytinglar. Shunda Egamiz sizlarga va ota–bobolaringizga abadiy mulk qilib bergan yurtda qolasizlar.

⁶Boshqa xudolarga ergashmanglar. Ularga xizmat qilmanglar, sajda etmanglar. Yasagan butlaringiz bilan Egamizni g‘azablantirmanglar. Shunda Egamiz boshingizga falokat keltirmaydi.”

⁷Ammo sizlar gapimga quloq solmadingizlar. Butlaringiz bilan Meni g‘azablantirib, o‘z boshingizga falokat keltirdingizlar.” Egamizning kalomi shudir.

⁸Shu sababdan Sarvari Olam demoqda: “Sizlar gapimga kirmaganingiz uchun,

⁹Men shimoldagi barcha qabilalarni yig‘ib olaman. Bobil shohi qulim Navuxadnazarni ham chaqiraman. Ularni sizlarga qarshi, bu yurt aholisi va yon–atrofingizdagi xalqlarga qarshi tortib kelaman. Men sizlarni tamomila qirib bitiraman. Ahvolingizni ko‘rgan odamlar qotib qoladi, sizlarni ko‘rganlar dahshatga tushadi. Men yurtingizni abadiy xarobazorga aylantiraman.

¹⁰Shunday qilamanki, orangizda shodu xurramlik sadolari bo‘lmaydi, kelin–kuyovning ovozi eshitilmaydi, tegirmonning tovushi chiqmaydi. Chirog‘ingiz yonmaydi.

¹¹Butun yurt vayron bo‘lib, xarobazorga aylanadi. Bu xalqlar yetmish yil mobaynida Bobil shohiga xizmat qilishadi.”

¹²Egamiz shunday demoqda: “Yetmish yildan keyin esa Men Bobil shohini, uning xalqini va Bobilliklarning butun yurtini qilgan gunohlari uchun jazolayman. Ularning yurti to abad huvullab qoladi.

¹³O‘zim aytgan hamma kulfatlarni o‘sha yurtga yog‘diraman. Bu kitobda yozilgan hamma falokatlarni keltiraman. Yeremiyoning hamma xalqlarga qarshi aytgan bashoratlarini amalga oshiraman.

¹⁴Bobilliklar ko‘plab xalqlaru buyuk shohlarga qul bo‘ladilar. Qilgan qilmishlariga yarasha jazolarini oladilar.”

¹⁵Isroil xalqining Xudosi — Egamiz menga shunday dedi: “Qo‘limdagi kosani ol. Bu kosa g‘azabim sharobiga to‘la. Men seni yuboradigan hamma xalqlarga bu kosadagi sharobdan ichir.

¹⁶Ular sharobdan ichadilar, gandiraklab qolib, aqldan ozadilar. Axir, Men ularga qarshi qilich yuboraman.”

¹⁷Men Egamizning qo‘lidagi kosani oldim. Egamiz meni qaysi xalqlar oldiga yuborgan bo‘lsa, o‘sha xalqlarga sharobdan ichirdim:

¹⁸Quddus, Yahudo yurtining shaharlari va u yerdagi shohu a’yonlar xonavayron bo‘lsin, deb men ularga sharobdan ichirdim. Bugungacha ularning ahvolidan odamlar yoqasini ushlaydi, xalqimning nomini qarg‘ishlarda ishlatishadi.

¹⁹So‘ng men Misrga yo‘l oldim. Fir’avn, uning xizmatkorlari, a’yonlari, butun xalqi

²⁰va u yerda yashayotgan musofirlarga sharobdan ichirdim. So‘ng Uz nomli yurtning shohlariga, shuningdek, Ashqalon, G‘azo, Exron va talafot ko‘rgan Ashdodda hukmronlik qilgan hamma Filist shohlariga sharobdan ichirdim.

²¹So‘ng men Edom, Mo‘ab, Ommonga,

²²Tir, Sidon va dengiz ortidagi yurtlarning shohlariga sharobdan ichirdim.

²³Dedon, Temo, Buz va sochini oldirib yuradigan boshqa hamma xalqlarga sharobdan ichirdim.

²⁴Hamma Arabiston shohlariga, sahroda yashaydigan har xil ko‘chmanchi qabilalarning hamma shohlariga sharobdan ichirdim.

²⁵Zimri, Elam va Midiya yurtlarining hamma shohlariga sharobdan ichirdim.

²⁶Shimoldagi uzog‘u yaqinda bo‘lgan hamma shohlarga sharobdan ichirdim. Yer yuzidagi barcha saltanatlarga birin–ketin borib keldim. Oxiri kosadagi sharobdan Bobil taxtida o‘tirgan shoh ichadigan bo‘ldi.

²⁷Egamiz menga dedi: “Ularga shunday deb ayt, Isroil xalqining Xudosi — Sarvari Olam demoqda: G‘azab kosamdan ichinglar! Mast bo‘lib qusinglar! Turmaydigan bo‘lib yiqilinglar, chunki Men sizlarning ustingizga qilich yuboryapman.”

²⁸Bordi–yu, ular qo‘lingdagi kosani olishdan va sharob ichishdan voz kechsalar, sen ularga shunday deb ayt: “Sarvari Olam sizlarga “Ichishingiz shart!” deb aytmoqda.

²⁹Mana, O‘zimga tegishli Quddus shahriga kulfat yog‘dira boshladim. Sizlar jazodan qochib qutularmidingiz?! Yo‘q, jazodan qutula olmaysizlar! Men yer yuzidagi barcha odamlarni urush balosiga giriftor etaman.” Sarvari Olamning kalomi shudir.

³⁰“Shuning uchun, ey Yeremiyo, sen bu so‘zlarning hammasini ularga ayt: Egamiz yuksakdan o‘kiradi, Muqaddas makonidan sado beradi. Yurtiga shiddat bilan o‘kiradi. Uzum ezuvchilar kabi baqiradi, Yer yuzidagi hamma insonlarga hayqiradi.

³¹Gumburlashi dunyoning chetigacha eshitiladi. Zero, Egamiz xalqlarga da’vo qilmoqda, Dunyodagi odamzodni U hukm etmoqda, Fosiqlarni qilichdan o‘tkazmoqda.” Egamizning kalomi shudir.

³²Sarvari Olam shunday demoqda: “Qaranglar, falokat kelmoqda, Xalqdan xalqqa yuqmoqda! Dunyoning to‘rt burchagidan Kuchli bo‘ron ko‘tarilmoqda!

³³O‘sha kuni butun yer yuzi, bu boshidan narigi chetigacha Xudoning qudratidan nobud bo‘lgan odamlarning jasadlariga to‘ladi. Marhumlar uchun hech kim marsiya aytmaydi, hech kim ularni yig‘ib ko‘mmaydi. Ular yer ustida go‘ngday yotaveradi.

³⁴Ey cho‘ponlar, uvvos solib yig‘langlar! Ey yo‘lboshchilar, kulga belaninglar! Bo‘g‘izlanadigan kuningiz yetib keldi, Jasadlaringiz yerda sochilib yotadi, Chilparchin bo‘lgan qimmatbaho ko‘zaday bo‘ladi.

³⁵Cho‘ponlar hech qayerga qocha olmaydi, Yo‘lboshchilar qutulolmaydi.

³⁶Eshiting! Yo‘lboshchilar faryod qilmoqda, Cho‘ponlar ho‘ngramoqda! Egamiz ularning yaylovlarini nobud qilyapti.

³⁷Sokin maysazorlarini payhon etyapti. Axir, Egamizning g‘azabi alanga oldi.

³⁸O‘lja qidirib uyasidan chiqqan sherday, Egamiz O‘z makonidan chiqdi. Egamizning alangali g‘azabi tufayli, Urush balosi tufayli Butun yurt xarobazorga aylanadi.