Read O‘zbek tilidagi Muqaddas Kitob, 2013 Yeremiyo 30 Bible Online

Yeremiyo 30 - O‘zbek tilidagi Muqaddas Kitob, 2013 bible

Yeremiyo 30

¹Egamizning so‘zi Yeremiyoga ayon bo‘ldi.

²Isroil xalqining Xudosi — Egamiz shunday dedi: “Men senga aytgan barcha so‘zlarimni o‘rama qog‘ozga yozib qo‘y.

³Shunday kunlar keladiki, Men xalqim Isroilni va Yahudoni yana farovonlikka erishtiraman. Ota–bobolariga bergan yurtga ularni olib kelaman. Ular o‘sha yurtga egalik qiladilar.” Egamizning kalomi shudir.

⁴Quyida Egamizning Isroil va Yahudo haqida aytgan so‘zlari yozilgan:

⁵“Egamiz shunday demoqda, Sarosima xitoblarini eshitdik. Ana, vahima sadolari eshitilmoqda! Tinchlik yo‘q!

⁶Qani, so‘rab ko‘ring: Erkak kishi tug‘adimi? Nega unda men ko‘rgan har bir kuchli erkak Dard tutgan ayolday belini ushlab olgan? Nega har bir erkakning yuzi bo‘zday oqargan?

⁷Evoh, naqadar dahshatli bu kun! Bunday kun hech qachon bo‘lmagan. Yoqub nasli uchun bu jabr kuni bo‘ladi, Ammo bu kundan xalqim qutqariladi.”

⁸Sarvari Olam shunday demoqda: “O‘sha kuni Men xalqimning bo‘ynidagi bo‘yinturuqni sindiraman, kishanlarini uzib tashlayman. Mening xalqim endi hech qachon ajnabiylarga qul bo‘lmaydi.

⁹Ular Menga — O‘z Egasi Xudoga va Men taxtga o‘tqizadigan Dovud avlodidan bo‘lgan shohga xizmat qilishadi.

¹⁰Egamiz shunday demoqda: “Ey qulim Yoqub, qo‘rqma! Ey Isroil xalqi, sarosimaga tushma! Men seni olis yurtdan ozod qilib olib kelaman, Naslingni surgun bo‘lgan mamlakatdan qutqaraman. Ey Yoqub nasli, sen yurtingga qaytasan, Osoyishta va bexatar yashaysan. Endi hech kim seni qo‘rqitmaydi.”

¹¹Egamiz shunday demoqda: “Men sen bilan birga bo‘laman, O‘zim seni qutqaraman. Seni xalqlar orasiga tarqatgan edim, Endi o‘sha xalqlarning hammasini qirib tashlayman. Seni esa qirib yubormayman, Ammo jazosiz ham qoldirmayman, Adolat ila jazoingni beraman.”

¹²Mana, Egamiz xalqiga shunday demoqda: “Yarangni davolab bo‘lmaydi, Sening darding tuzalmasdir.

¹³Arzingni eshitadigan odam yo‘q, Yarang uchun dori–darmon yo‘q, Seni davolab bo‘lmaydi.

¹⁴Hamma o‘ynashlaring seni unutdi, Ularning sen bilan ishi yo‘q. Men dushman kabi senga hamla qildim, Shafqatsiz jazoingni berdim. Og‘ir jinoyating, ko‘p gunohlaring uchun, Seni shu ko‘yga soldim.

¹⁵Nechun jon achchig‘ida baqiryapsan?! Yarangni davolab bo‘lmaydi, axir! Og‘ir jinoyating, ko‘p gunohlaring uchun Seni shu ko‘yga soldim.

¹⁶Ammo seni halok qilganlar halok bo‘ladi, Dushmanlaringning hammasi surgun qilinadi. Seni talon–taroj qilganlar talanadi. Senga hujum qilganlar bosib olinadi.

¹⁷Dushmanlar seni “Tashlab ketilgan”, deb atashsa ham, “Hech kimning Quddus bilan ishi yo‘q”, deb aytishsa ham, Men seni sog‘aytiraman, Yarangga shifo beraman.” Egamizning kalomi shudir.

¹⁸Egamiz shunday demoqda: “Men Yoqub naslining chodirlarini qayta tiklayman. Xalqim xonadonlariga rahm–shafqat qilaman. Shahar o‘z vayronalari ustida qayta bunyod bo‘ladi, Saroy o‘z joyida tiklanadi.

¹⁹U yerdan shukrona qo‘shiqlari eshitiladi, Shodlik hayqiriqlari yangrab turadi. Men xalqimni ko‘paytiraman, Ularning soni kamaymaydi. Ularni obro‘–e’tiborli qilaman, Hech kim ularni oyoq osti qilmaydi.

²⁰Farzandlari oldingiday farovon hayot kechiradi, Jamoasi oldimda mustahkam turadi. Ularga jabr qilganlarni Men jazolayman.

²¹Shahzodasi o‘zlaridan chiqadi, Hukmdori Mening xalqimdan bo‘ladi. Men uni O‘zimga yaqinlashtiraman, Shunda u Menga yaqinlasha oladi. Zotan hech kim o‘zidan o‘zi Menga yaqinlashishga jur’at etmaydi!” deb aytmoqda Egamiz.

²²Shunda sizlar Mening xalqim, Men esa sizlarning Xudoyingiz bo‘laman.

²³Qaranglar, Egamiz g‘azabga mindi, Uning qahri bo‘ronga o‘xshaydi, Avj olgan to‘fonday, Fosiqlarning boshiga tushadi.

²⁴Egamiz niyatini to‘liq bajarmaguncha, O‘z g‘azabidan tushmaydi. Keyinchalik buni anglab olasiz.”