Read O‘zbek tilidagi Muqaddas Kitob, 2013 Yeremiyo 31 Bible Online

Yeremiyo 31 - O‘zbek tilidagi Muqaddas Kitob, 2013 bible

Yeremiyo 31

¹Egamiz shunday demoqda: “O‘sha vaqtda Men hamma Isroil qabilalarining Xudosi bo‘laman, ular esa Mening xalqim bo‘ladi.”

²Egamiz shunday demoqda: “Qirg‘indan omon qolgan Isroil xalqi Orom izlab safarga chiqqanda, Sahroda inoyat topdi.

³Men qadimda Isroilga zohir bo‘lib, shunday degan edim: Seni mangu sevgi bilan sevdim, Senga sodiq bo‘lib keldim.

⁴Ey bokira qiz Isroil, Men seni qaytadan bunyod etaman. Sen qayta bino bo‘lasan. Sen yana childirmalaringni chalasan, Quvonch ila raqsga tushasan.

⁵Samariya qirlarida yana uzumzorlar barpo qilasan. Tok ekkan dehqonlar o‘z hosilidan yeydilar.

⁶Shunday kunlar keladiki, Soqchilar Efrayim qirlarida jar soladilar: “Kelinglar, Egamiz Xudoning oldiga boraylik! Kelinglar, Quddusga chiqaylik!”

⁷Egamiz shunday demoqda: “Yoqub nasli uchun sevinch ila qo‘shiq ayting, Ha, xalqlar sardori uchun Xudoni madh qiling. Xudoga hamdu sanolar o‘qing, Unga yolvorib ayting: “Ey Egamiz, O‘z xalqingni xalos qilgin! Isroilning omon qolganlarini qutqargin!”

⁸Men ularni shimoldan olib kelaman, Dunyoning to‘rt burchagidan yig‘ib olaman. Oralarida ko‘ru cho‘loqlar bo‘ladi, Homilador ayollaru to‘lg‘oq tutayotganlar bo‘ladi. Katta bir jamoa bo‘lib, bu yerga qaytib kelishadi.

⁹Ular yo‘l yurib, ko‘z yosh to‘kishadi, Ularni boshlab kelayotganimda iltijo qilishadi. Men ularni suv buloqlari bo‘ylab yetaklayman, Qoqilmasin deb, tekis yo‘ldan olib yuraman. Zotan, Men Isroilning otasidirman, Efrayim Mening to‘ng‘ich o‘g‘limdir.

¹⁰Ey xalqlar, Egamizning so‘zini eshitinglar, Dengiz ortidagi yurtlarda shunday e’lon qilinglar: “Egamiz Isroil xalqini tarqatib yubordi, Ammo endi uni qayta yig‘ib oladi, Cho‘pon suruvini qo‘riqlaganday, Egamiz Isroilni qo‘riqlaydi.”

¹¹Zero, Yoqub naslini Egamiz ozod qildi, Ulardan kuchliroq bo‘lgan bir xalqdan bu naslni qutqardi.

¹²Yoqub nasli Quddus qirlarida quvonch ila ashula aytadi, Egamiz bergan barakadan quvonadi. Bug‘doy, sharob va zaytun moyi tufayli, Suruvdagi qo‘zilaru podalardagi buzoqlar tufayli Ularning yuzidan nur sochiladi. Ular sug‘orilgan boqqa o‘xshaydigan bo‘ladi, Butunlay qayg‘uni unutib yuborishadi.

¹³Qizlar xursand bo‘lib, raqsga tushadilar, Erkaklarning yoshu qarisi shod bo‘ladi. Men ularning qayg‘usini quvonchga aylantiraman, Hasrat o‘rniga taskin va shodlik beraman.

¹⁴Ruhoniylarni a’lo sifatli ovqatlar bilan to‘yg‘izaman, Xalqimni barakalardan bahramand qilaman.” Egamizning kalomi shudir.

¹⁵Egamiz shunday demoqda: “Rama shahridan bir nido eshitilur, Achchiq bir nolayu ohu fig‘on bu. Bolalari uchun yig‘lar Rohila, Ovunishni xohlamas, Axir, ular endi yo‘q.”

¹⁶Egamiz shunday demoqda: “Bo‘ldi bas, yig‘lama, Ko‘z yoshlaringni to‘kma. Zero, mehnating taqdirlanadi, Farzandlaring dushman yurtidan qaytib keladi.

¹⁷Kelajaging uchun umid bor, Bolalaring o‘z yurtiga qaytib keladi.” Egamizning kalomi shudir.

¹⁸Efrayimning hasratini eshitdim: “Meni jazolading, o‘zimga saboq oldim. Men o‘jar bir buzoqqa o‘xshagan edim. Meni qaytar, oldingga qaytib boray, Axir, Egam Xudo Sensan.

¹⁹Sendan yuz o‘girganimdan pushaymon bo‘ldim, Esim joyiga kelgach, ko‘ksimga urdim. Yoshlikda isnodga qolganim tufayli Sharmandayu sharmisor bo‘ldim.”

²⁰“Efrayim — Mening aziz o‘g‘lonim, Suyukli farzandimdir u! Unga qarshi ko‘p gapirganim bilan, Xayolimdan uni ketkizmayman. Unga ich–ichimdan achinib ketdim, Albatta unga rahm qilaman.” Egamizning kalomi shudir.

²¹Ey bokira qiz Isroil, O‘zing uchun yo‘l belgilarini qo‘y, Yo‘nalish ustunlarini o‘rnat. Kelgan yo‘lingni aniqlab ol. Qayt, o‘z shaharlaringga qayt.

²²Ey vafosiz qiz, Qachongacha ikkilanasan?! Egamiz dunyoda yangi bir narsa yaratadi: Isroil O‘z Xudosiga chirmashib oladi.

²³Isroil xalqining Xudosi — Sarvari Olam shunday demoqda: “Men xalqimni yana farovonlikka erishtiraman. Shunda Yahudo yurtidagi va barcha shaharlaridagi odamlar Quddusni shunday duo qiladigan bo‘lishadi: ‘Ey muqaddas tog‘, Solihlik makoni, Egamiz senga baraka bersin!’

²⁴Odamlar Yahudo yurtida va uning hamma shaharlarida yashaydilar. U yerda dehqonlar va qo‘ylarni boqadigan chorvadorlar bo‘ladi.

²⁵Men chanqaganlarning chanqog‘ini qondiraman, toliqqan jonga orom beraman.”

²⁶Shunda odamlar miriqib uxlab, kuchga to‘lib uyg‘onadilar.

²⁷Egamiz shunday demoqda: “Shunday kunlar keladiki, Men Isroil va Yahudo yurtlarini odamlarga va hayvonlarga to‘ldiraman.

²⁸Ilgarilari Men bu xalqni qo‘porib, vayron qilgan bo‘lsam, ularni ag‘darib tashlab, yakson etgan bo‘lsam, boshlariga falokat keltirgan bo‘lsam, endi ularni qayta bunyod etib, mustahkam qilaman.” Egamizning kalomi shudir.

²⁹O‘shanda odamlar shunday deb aytmaydigan bo‘ladi: “Otalari achchiq uzum yeyishgan edi, Bolalarining esa tishi qamashdi.”

³⁰Aksincha, har bir odam qilgan gunohi uchun o‘zi o‘lim jazosini tortadi. Kim achchiq uzum yegan bo‘lsa, o‘shaning tishi qamashadi.”

³¹Egamiz demoqda: “Shunday kunlar keladiki, Men Isroil va Yahudo xalqlari bilan yangi ahd tuzaman.

³²Bu yangi ahd Men ularning ota–bobolari bilan tuzgan ahdga o‘xshamaydigan bo‘ladi. Men ota–bobolarini qo‘lidan yetaklab, Misrdan olib chiqqanimda, ular bilan ahd tuzgan edim. Men ularga sodiq xo‘jayin edim, ammo ular o‘sha ahdimni buzishdi.”

³³Egamiz shunday demoqda: “Men kelajakda Isroil xalqi bilan tuzadigan ahd shunday bo‘ladi: Men qonunimni odamlarning ongiga solib qo‘yaman, qonunimni yuraklariga yozaman. Men ularning Xudosi, ular esa Mening xalqim bo‘ladilar.

³⁴Shundan keyin odamlar bir–biriga: ‘Egamizni tanib–biling’, demaydigan bo‘lishadi. Chunki ularning hammasi — kattasidan tortib kichigigacha Meni biladigan bo‘ladi. Men ularning ayblarini kechiraman, gunohlarini hech qachon esga olmayman.” Egamizning kalomi shudir.

³⁵Kunni yoritsin, deya Egamiz quyosh ato qildi. Kechasi nur sochsin, deya oy va yulduzlarni yaratdi. U dengizni ko‘pirtirar, To‘lqinlarini o‘kirtirar, Uning nomi Sarvari Olamdir. U shunday demoqda:

³⁶“Agar tabiatdagi bu tartib buzilsa, Isroil nasli ham xalq sifatida yo‘q bo‘ladi.”

³⁷Egamiz shunday demoqda: “Osmonu falakni o‘lchab bo‘lmaganday, Zamin poydevorini tekshirib bo‘lmaganday, Men ham Isroil naslini tark etolmayman, Qilgan qilmishlari uchun ularni tashlab ketolmayman.” Egamizning kalomi shudir.

³⁸Egamiz shunday demoqda: “Shunday kunlar kelyaptiki, Quddus Men uchun qayta tiklanadi. Butun shahar Xanonil minorasidan tortib, to Burchak darvozasigacha qayta quriladi.

³⁹Shahar kengayadi, chegarasi g‘arbdagi Goriv tepaligigacha borib, Go‘ax tomon buriladi.

⁴⁰O‘liklar ko‘milgan, axlat tashlangan butun Xinnum soyligi va Qidron soyligining sharqidagi Ot darvozasigacha cho‘zilgan hamma dalalar Men uchun muqaddas bo‘ladi. Quddus shahri endi hech qachon vayron qilinmaydi, xarobaga aylanmaydi.”