Read O‘zbek tilidagi Muqaddas Kitob, 2013 Yeremiyo 32 Bible Online

Yeremiyo 32 - O‘zbek tilidagi Muqaddas Kitob, 2013 bible

Yeremiyo 32

¹Yahudo shohi Zidqiyo hukmronligining o‘ninchi yilida Yeremiyoga Egamizning so‘zi ayon bo‘ldi. O‘sha yili Bobil shohi Navuxadnazar hukmronligining o‘n sakkizinchi yili bo‘lib,

²ayni vaqtda u lashkarlari bilan Quddusni qamal qilib turgan edi. Yeremiyo esa Yahudo shohi saroyidagi soqchilar hovlisiga qamab qo‘yilgan edi.

³(Shoh Zidqiyoning o‘zi Yeremiyoni o‘sha yerga qamatib, shunday degan edi: “Nega sen Egamizning nomidan bashorat qilib yuribsan? Sen shunday deb yurgan emishsan: “Egamiz bu shaharni Bobil shohining qo‘liga topshiradi, shahar taslim bo‘ladi.

⁴Yahudo shohi Zidqiyo ham Bobilliklarning qo‘lidan qochib qutulolmaydi. U Bobil shohining qo‘liga topshiriladi. U o‘z ko‘zi bilan shoh Navuxadnazarni ko‘radi, Navuxadnazar u bilan yuzma–yuz gaplashadi.”

⁵Yana shunday deb yurgan emishsan: “Navuxadnazar Zidqiyoni Bobilga olib ketadi. Egamiz Zidqiyoni jazolamaguncha Zidqiyo o‘sha yerda qoladi.” Yana: “Agar Bobilliklarga qarshi jang qilsangizlar, mag‘lub bo‘lasizlar”, deb aytgan ekansan.)

⁶Egamiz Yeremiyoga O‘z so‘zini ayon qilib dedi:

⁷“Ey Yeremiyo, sening oldingga Shallum amakingning o‘g‘li Xanomil keladi. U senga: “Onoto‘tdagi dalamni sotib ol. Eng yaqin qarindoshim bo‘lganing uchun, dalamni sotib olish huquqiga egasan”, deb aytadi.”

⁸Keyin, xuddi Egamiz aytganidek, soqchilar hovlisiga amakivachcham Xanomil kirib keldi. U menga shunday dedi: “Benyamin hududida joylashgan Onoto‘tdagi dalamni sotib olsang, degan edim. Sen yaqin qarindoshim bo‘lganing uchun, dalamni o‘zingga mulk qilib olish huquqiga egasan. Dalamni sotib olaqol.” Shunda menga haqiqatan ham Egamiz gapirganini bildim.

⁹Men amakivachcham Xanomildan Onoto‘tdagi dalani sotib olib, unga 43 misqol kumushni o‘lchab berdim.

¹⁰Keyin vasiqaga qo‘l qo‘yib, uni muhrladim, hammasini guvohlar oldida qildim, kumushni tarozida o‘lchab berdim.

¹¹So‘ng muddat va shartlari bayon qilingan vasiqaning muhrlangan nusxasini, shuningdek, ochiq nusxani

¹²Boruxga berdim (Borux Neriyoning o‘g‘li, Maxsiyoning nevarasi edi). Soqchilar hovlisida o‘tirgan hamma yahudiylar, vasiqaga qo‘l qo‘ygan guvohlar va amakivachcham Xanomil buning shohidi bo‘ldilar.

¹³Men ularning oldida Boruxga shunday dedim:

¹⁴“Isroil xalqining Xudosi — Sarvari Olam demoqda: “Bu vasiqaning ikkala nusxasini, muhrlangan va ochiq nusxalarini olib, xumchaga solib qo‘y, toki ular uzoq yillar davomida saqlanib qolsin.

¹⁵Zero, bu yurtda odamlar yana uylar, dalalar va uzumzorlar sotib oladigan bo‘lishadi.” Isroil xalqining Xudosi — Sarvari Olamning kalomi shudir.”

¹⁶Men vasiqani Neriyo o‘g‘li Boruxga berganimdan so‘ng, Egamizga ibodat qildim:

¹⁷“Yo Egam Rabbiy! Sen O‘z qudrating va ajoyibotlaring bilan yeru osmonni yaratding. Sening qo‘lingdan kelmaydigan narsa yo‘q.

¹⁸Sen ming–ming avlodlarga O‘zingning mustahkam sevgingni ko‘rsatasan, ammo otalarning gunohlari uchun bolalarni jazolaysan. Ey, buyuk va qudratli Xudo! Sarvari Olamdir Sening noming.

¹⁹Sen dono rejalar tuzib, buyuk ishlar qilasan. Foniy bandalar qilayotgan barcha ishlarni kuzatib turasan. Ularni qilmishiga yarasha jazolaysan, qilgan ishiga yarasha taqdirlaysan.

²⁰Sen Misrda yodda qoladigan alomatu mo‘jizalar ko‘rsatding. Hozirgi kunda ham Isroil va butun odamzod orasida Sening noming nihoyatda mashhur.

²¹Alomatu mo‘jizalaring, O‘z qudratingu ajoyibotlaring, buyuk bir dahshating bilan Sen O‘z xalqingni Misrdan olib chiqqan eding.

²²Ota–bobolariga va’da qilgan, sut va asal oqib yotgan yurt ularga bergan eding.

²³Ular bu yurtga kelib, uni mulk qilib oldilar. Ammo Senga bo‘ysunmadilar, qonunlaringga rioya qilmadilar. Buyurgan amrlaringni bajarmadilar. Shu sababdan Sen bu falokatlarning hammasini ularning boshiga solding.

²⁴Ana endi Bobilliklar Quddusga hujum qilyaptilar. Quddusni qo‘lga kiritish uchun, shahar devoriga qiyalatib tuproq uyyaptilar. Qirg‘in, ocharchilik va o‘lat dastidan shahar taslim bo‘ladi. O‘zing ko‘rib turganingdek, aytganlaringning bari bajo bo‘lyapti.

²⁵Ey Egam Rabbiy, shahar Bobilliklarga taslim bo‘layotgan shunday bir paytda Sen menga: “Guvohlar oldida kumushga dala sotib ol”, deding–a!

²⁶Egamiz Yeremiyoga O‘z so‘zini ayon qildi:

²⁷“Men Egangman. Men barcha tirik jonning Xudosiman. Qo‘limdan kelmaydigan ish yo‘q!”

²⁸Egamiz yana shunday dedi: “Men bu shaharni Bobilliklarga, Bobil shohi Navuxadnazarga taslim qilib beraman. Ular shaharni qo‘lga kiritadilar.

²⁹Sizlarga hujum qilib kelayotgan bu Bobilliklar shaharga o‘t qo‘yadilar. Quddusdagi uylarni yondirib tashlaydilar! Axir, Quddus aholisi uylarining tomlari ustida Baalga qurbonliklar kuydirib, boshqa xudolarga sharob nazrlarini keltirib, Meni g‘azablantirdi.”

³⁰Egamiz shunday demoqda: “Isroil va Yahudo xalqlari yoshligidan beri oldimda faqat qabihlik qilishadi. Qachon qarasa, Isroil xalqi o‘z ishlari bilan Meni g‘azablantirib yuradi.

³¹Bu shahar bino bo‘lgandan beri, to bugunga qadar, shahar aholisi Meni qattiq g‘azablantirib kelmoqda. Men ularni huzurimdan daf qilaman,

³²chunki Isroil va Yahudo xalqlari — shohlariyu a’yonlari, ruhoniylariyu payg‘ambarlari, Yahudo va Quddusda yashagan hamma odamlar qilgan yovuzliklari bilan jahlimni chiqardilar.

³³Ular Menga yuz burmay, orqa o‘girdilar. Men ularni to‘g‘ri yo‘lga solmoqchi bo‘lib astoydil harakat qilgandim, ammo ular Menga quloq solmadilar, o‘zlariga saboq olmadilar.

³⁴Mening nomim bilan atalgan uyga jirkanch butlarini o‘rnatib, uyimni harom qildilar.

³⁵Xinnum soyligida Baalga sajdagohlar qurdilar. U yerda o‘g‘il–qizlarini Mo‘laxga olovda kuydirib qurbonlik qildilar. Men ularga bunday jirkanch ishni amr qilmaganman, bu hatto xayolimga ham kelmagan. Natijada bu qilmishlari tufayli Yahudo jazoga loyiq bo‘ldi.”

³⁶Sizlar bu shahar haqida “Quddus shahri qirg‘in, ocharchilik va o‘lat dastidan Bobilliklar oldida taslim bo‘ladi”, deb aytyapsizlar, ammo Isroil xalqining Xudosi — Egamiz shunday demoqda:

³⁷“Men g‘azab, qahr va qattiq jahl ustida turli yurtlarga xalqimni tarqatib yuborgan edim, endi ularni yig‘ib olaman. Ularni yana mana shu yerga olib kelaman. Ular bu yerda osoyishta umr kechiradilar.

³⁸Ular Mening xalqim, Men esa ularning Xudosi bo‘laman.

³⁹Ular Mendan har doim qo‘rqsin, deb ularni yakdil qilaman, hammasini hayotning bir maqsadi tomon yo‘naltiraman. Shunda o‘zlariga ham, bolalariga ham yaxshi bo‘ladi.

⁴⁰Men ular bilan abadiy ahd tuzaman. Ularga doim yaxshilik qilishdan qochmayman. Mendan yuz o‘girib ketmasliklari uchun, ularning yuraklariga Mendan qo‘rqish hissini solib qo‘yaman.

⁴¹Men ularga yaxshilik qilganimdan xursand bo‘laman, ularni jonu dilim bilan bu yurtda albatta mustahkam o‘rnashtiraman.”

⁴²Egamiz shunday demoqda: “Men bu xalqning boshiga katta falokatni qanday yog‘dirgan bo‘lsam, va’da qilgan barcha ezguliklarimni ham ustilariga xuddi shunday yog‘diraman.

⁴³Odamlar bu yurt haqida “Ha, yurtimiz Bobilliklarga taslim bo‘ldi, odamlar va hayvonlarsiz huvullab qoldi”, deb aytishyapti. Ammo shunday kun keladiki, bu yurtdagi dalalar yana sotiladigan bo‘ladi.

⁴⁴Odamlar bu dalalarni kumushga sotib oladilar, guvohlar oldida vasiqalarga qo‘l qo‘yib, muhr bosadilar. Bunday hodisa Benyamin hududida, Quddus atrofida, Yahudo shaharlarida, qirlarda, g‘arbdagi qirlar etaklarida va Nagav cho‘lida sodir bo‘ladi. Axir, Men xalqimni yana farovonlikka erishtiraman.” Egamizning kalomi shudir.