Read O‘zbek tilidagi Muqaddas Kitob, 2013 Yeremiyo 34 Bible Online

Yeremiyo 34 - O‘zbek tilidagi Muqaddas Kitob, 2013 bible

Yeremiyo 34

¹Bobil shohi Navuxadnazar o‘z lashkarlari, qo‘li ostidagi barcha shohliklaru xalqlar bilan birga Quddusga va uning yon–atrofidagi shaharlarga qarshi jang qilayotgan edi. Shunda Yeremiyoga Egamizning so‘zi ayon bo‘ldi.

²Isroil xalqining Xudosi — Egamiz shunday demoqda: “Qani bo‘l, Yeremiyo, Yahudo shohi Zidqiyo huzuriga bor. Unga ayt: Egamiz shunday demoqda: “Men bu shaharni Bobil shohiga taslim qilaman, u shaharga o‘t qo‘yadi.

³Sen ham Bobil shohining qo‘lidan qochib qutula olmaysan. Odamlar seni tutib oladilar. Bobil shohining qo‘liga topshiradilar. Sen o‘z ko‘zing bilan Bobil shohini ko‘rasan, u sen bilan yuzma–yuz gaplashadi. Keyin seni Bobilga jo‘natib yuboradi.

⁴Biroq, ey Yahudo shohi Zidqiyo, Egamizning so‘zini eshit! Egamiz sen haqingda shunday demoqda: Sen qilichdan halok bo‘lmaysan.

⁵Tinchgina olamdan ko‘z yumasan. Odamlar ota–bobolaringni, sendan oldin o‘tgan shohlarni qanday dafn qilishgan bo‘lsa, ularning sharafiga qanday gulxan yoqishgan bo‘lsa, sening sharafingga ham shunday gulxan yoqishadi. Yig‘i–sig‘i qilib: “Voy, xojam!” deya marsiya aytishadi.” Egamizning kalomi shudir.”

⁶Yeremiyo payg‘ambar bularning hammasini Quddusda Yahudo shohi Zidqiyoga aytdi.

⁷Shu orada Bobil shohining lashkarlari Quddus, Laxish va Ozikah shaharlariga hujum qilayotgan edilar. Yahudoning mustahkam shaharlaridan o‘shalargina yovga hanuzgacha taslim bo‘lmagan edi.

⁸Shoh Zidqiyo Quddusdagi butun aholi bilan ahd qilib, ibroniy qullarini ozodlikka chiqarishni e’lon qilgandan keyin, Yeremiyoga Egamizning so‘zi ayon bo‘ldi.

⁹Zidqiyo qilgan ahdga ko‘ra, hamma ibroniy qullariga va cho‘rilarga ozodlik berilishi lozim edi. Yahudiy birodarlarni qullikda tutish man etilgan edi.

¹⁰A’yonlar bilan butun xalq ahd shartlariga ko‘ndi. Ular o‘z qullari bilan cho‘rilarini ozod qilishga, ularni bundan keyin qul qilib olmaslikka rozi bo‘lgan edilar. Barcha quldorlar ahdga rioya qilgan holda, qullariga ozodlik berishdi.

¹¹Keyinchalik esa o‘z fikrlaridan qaytib, ozod qilgan qul va cho‘rilarni majburlab, o‘zlariga yana qul qilib olishdi.

¹²Shunda Egamizning so‘zi Yeremiyoga ayon bo‘ldi.

¹³Isroil xalqining Xudosi — Egamiz shunday demoqda: “Men ota–bobolaringizni Misrdagi qullikdan olib chiqqanimda, ular bilan ahd qilib, shunday degan edim:

¹⁴O‘zini sizga sotib, olti yil xizmat qilgan har bir ibroniy qulini ozod qilinglar.” Ammo ota–bobolaringiz aytganlarimga e’tibor bermadilar, Menga quloq solmadilar.

¹⁵Yaqinda esa sizlar tavba qilgan edingizlar. Mening nomim bilan atalgan uyimda — huzurimda turib, birodarlaringizni ozod qilishga ahd qilgan edingiz. Mening nazarimda bu ishingiz to‘g‘ri edi.

¹⁶Keyin esa sizlar fikringizdan qaytdingizlar. Meni badnom qildingizlar. O‘z xohishiga ko‘ra, ozod qilingan qulu cho‘rilaringizni qaytarib oldingizlar, ularni qul bo‘lishga majbur qildingizlar.”

¹⁷Egamiz shunday demoqda: “Sizlar Menga itoatsizlik qilib, yoru do‘stlaringizni, qo‘ni–qo‘shnilaringizni qo‘yib yubormadingiz, shuning uchun Men sizlarni qo‘yib yuboraman. Mana, urush, qahatchiligu o‘latga yo‘lingiz ochiq! Ahvolingizni dunyodagi barcha shohliklar ko‘rib, dahshatga tushadi.

¹⁸Ahdimni buzgan bu odamlarni Men jazolayman. Ular huzurimda ahd tuzgan edilar, buzoqni ikki qismga bo‘lib, ikki bo‘lagi orasidan o‘tgan edilar. Ammo ahd shartlariga rioya qilmadilar. Shuning uchun Men ularni bo‘g‘izlangan buzoqning holiga tushiraman.

¹⁹Buzoqning ikki bo‘lagi orasidan o‘tgan Yahudo a’yonlarini, Quddus ma’murlarini, saroy amaldorlarini, ruhoniylarini va xalq ommasini jazolayman.

²⁰Ulardan qasdi borlarga o‘zlarini topshiraman, dushman qo‘liga beraman. Jasadlari qushlarga va yovvoyi hayvonlarga yem bo‘ladi.

²¹Yahudo shohi Zidqiyoni ham a’yonlari bilan birga dushman qo‘liga beraman, ulardan qasdi borlarga topshiraman. Vaqtinchalik chekingan Bobil shohining lashkarlariga ularni taslim qilaman.

²²Men buyruq berib, Bobilliklarni bu shaharga qaytarib olib kelaman. Ular sizlarga hujum qiladilar. Shaharni qo‘lga olib, o‘t qo‘yadilar. Yahudo shaharlari vayron bo‘ladi, u yerda hech kim yashamaydi.” Egamizning kalomi shudir.