Read O‘zbek tilidagi Muqaddas Kitob, 2013 Yeremiyo 35 Bible Online

Yeremiyo 35 - O‘zbek tilidagi Muqaddas Kitob, 2013 bible

Yeremiyo 35

¹Yo‘shiyo o‘g‘li shoh Yohayiqim hukmronlik qilgan davrda Egamiz O‘z so‘zini Yeremiyoga ayon qildi:

²“Qani bo‘laqol, Yeremiyo, Raxav xonadoni huzuriga borib, u yerdagi odamlar bilan gaplash. So‘ng Egang uyidagi yon xonalarning biriga ularni taklif qilgin–da, sharobdan quyib ber.”

³Men borib, Xavazzinyoning nevarasi — Yeremiyo o‘g‘li Yazaniyoni aka–ukalari bilan birga, hamma o‘g‘illarini va butun Raxav xonadonini chaqirib,

⁴Ma’badga boshlab keldim. Ularni Yixdaliyo o‘g‘li Xanon payg‘ambarning o‘g‘illariga qarashli xonaga olib kirdim. Bu xonaning yonida Ma’bad a’yonlarining xonasi, tagida esa Shallum o‘g‘li Masiyoning xonasi joylashgan edi. Masiyo Ma’bad darvozaboni bo‘lib xizmat qilar edi.

⁵Men dasturxonga idishlarni to‘ldirib sharob tortdim, piyolalar qo‘ydim. So‘ng Raxab nasliga: — Marhamat qilib, sharobdan ichinglar, — deb taklif qildim.

⁶Ular shunday dedilar: — Biz sharob ichmaymiz. Ajdodimiz Raxav o‘g‘li Yohunadov bizga shunday amr qilgan edi: “Zinhor sharob ichmanglar, bolalaringiz ham ichmasin.

⁷Uylar qurmanglar, ekin ekmanglar, uzumzorlar barpo qilmanglar, ularni o‘zingizga mulk qilib olmanglar. Ko‘chib borgan joyingizda uzoq vaqt yashay olishingiz uchun, chodirlarda kun kechiringlar.”

⁸Shuning uchun biz ajdodimizning amriga bo‘ysunib, hech qachon sharob ichmaymiz, xotinlarimiz ham, o‘g‘il–qizlarimiz ham sharob ichmaydilar.

⁹O‘zimiz uchun uylar qurmaymiz, bizda na uzumzor, na dala bor, na ekin ekamiz.

¹⁰Biz ajdodimiz Yohunadovning amriga itoat qilib, bir umr chodirlarda yashab keldik.

¹¹Ammo Bobil shohi Navuxadnazar bu yurtga bostirib kelgandan so‘ng, Bobil va Oram lashkarlaridan qo‘rqib, Quddusga kelishga qaror qilgan edik. Shu sababdan hozir biz Quddusda yashab yuribmiz.

¹²Shundan so‘ng Yeremiyoga Egamizning quyidagi so‘zi ayon bo‘ldi.

¹³Isroil xalqining Xudosi — Sarvari Olam unga shunday dedi: “Qani bo‘l, Yeremiyo, Yahudo xalqi va Quddus aholisining huzuriga borib, shunday deb ta’na qil: Sizlar o‘zi saboq olasizlarmi?! Menga itoat qilishni o‘rganasizlarmi o‘zi?!

¹⁴Ana, ko‘rib qo‘ying, Raxav nasli o‘z ajdodining amriga itoat qilgani uchun, bugunga qadar sharobni og‘ziga ham olmay yuribdi. Men esa sizlarga qayta–qayta gapirgan bo‘lsam ham, sizlar Menga itoat qilmadingizlar.

¹⁵Men payg‘ambar qullarimni oldingizga qayta–qayta jo‘natdim. Ular orqali sizlarni shunday deb ogohlantirgan edim: “Sizlarga va ota–bobolaringizga Men bergan bu yurtda yashay olishingiz uchun, yomon yo‘lingizdan qaytinglar. Turmush tarzingizni o‘zgartiringlar. Boshqa xudolarga ergashmanglar. Ularga xizmat qilmanglar.” Ammo sizlar quloq solmadingizlar, gapimga kirmadingizlar.

¹⁶Yohunadovning avlodi o‘z ajdodi buyurib ketgan amrni ijro etdi, bu xalq esa Menga itoat qilmadi.”

¹⁷Shuning uchun Isroil xalqining Xudosi, Parvardigori Olam — Egamiz shunday demoqda: “Men Yahudo va Quddus aholisiga gapirgan edim, ammo ular gaplarimga quloq solmadilar, ularni chaqirgan edim, ammo Menga javob bermadilar. Shuning uchun O‘zim aytgan barcha balo–qazolarni ularning boshlariga yog‘diraman.”

¹⁸Raxav xonadoniga esa Yeremiyo shunday dedi: “Isroil xalqining Xudosi — Sarvari Olam demoqda: Sizlar ajdodingiz Yohunadovning amriga itoat etdingiz, uning nasihatlarini rad etmay, aytganlarining hammasini bajardingiz, shuning uchun,

¹⁹Raxav o‘g‘li Yohunadov avlodidan bo‘lgan kishi huzurimda abadulabad xizmat qiladigan bo‘ladi.” Isroil xalqining Xudosi — Sarvari Olamning kalomi shudir.