Read O‘zbek tilidagi Muqaddas Kitob, 2013 Yeremiyo 36 Bible Online

Yeremiyo 36 - O‘zbek tilidagi Muqaddas Kitob, 2013 bible

Yeremiyo 36

¹Yahudo shohi Yo‘shiyo o‘g‘li Yohayiqim hukmronligining to‘rtinchi yilida Yeremiyoga Egamizning shu so‘zi ayon bo‘ldi:

²“O‘rama qog‘oz ol. Isroil, Yahudo va barcha shohliklarga qarshi Men aytgan so‘zlarni yozib qo‘y. Senga ilk bor Yo‘shiyo davrida ayon qilgan so‘zimdan tortib, to bugunga qadar aytgan barcha gaplarimni yoz.

³Balki Yahudo xalqi Men boshlariga keltirmoqchi bo‘lgan falokatlar haqida eshitib, yovuz yo‘llaridan qaytar. Shunda Men ularning gunohu ayblarini kechiraman.”

⁴Yeremiyo Neriyo o‘g‘li Boruxni chaqirib, Egamizning aytgan hamma so‘zlarini yozdirdi.

⁵So‘ng Yeremiyo Boruxga tayinlab dedi: “Egamizning uyiga kirish menga man etilgan.

⁶Shuning uchun ro‘za kuni sen o‘zing u yerga borasan. U yerdagi odamlarga men senga yozdirgan Egamizning so‘zlarini o‘rama qog‘ozdan o‘qib berasan. O‘sha kuni Yahudoning turli shaharlaridan kelgan xaloyiq Egamizning uyida bo‘ladi, ular ham o‘qiganingni eshitishsin.

⁷Balki ular Egamizga yolvorib, yovuz yo‘llaridan qaytishar. Axir, Egamiz qahru g‘azabini ularga sochishini e’lon qildi!”

⁸Neriyo o‘g‘li Borux Yeremiyoning aytganlarini to‘la–to‘kis bajardi. U Egamizning uyiga bordi, o‘rama qog‘ozga bitilgan Egamizning so‘zlarini o‘qidi.

⁹Bu voqea Yahudo shohi Yo‘shiyo o‘g‘li Yohayiqim hukmronligining beshinchi yili, to‘qqizinchi oyida sodir bo‘ldi. Quddus aholisi bilan Yahudo shaharlaridan kelgan butun xalq Egamizga bag‘ishlab ro‘za tutgan edi.

¹⁰Shunda Borux Egamiz uyining Yangi darvozasi yonidagi yuqori hovlida joylashgan Shofon o‘g‘li kotib Gamariyoning xonasidan turib, o‘rama qog‘ozga bitilgan Yeremiyoning so‘zlarini butun xalqqa ovoz chiqarib o‘qib berdi.

¹¹Gamariyo o‘g‘li Mixiyo o‘rama qog‘ozga bitilgan Egamizning so‘zlarini eshitgach,

¹²darhol shoh saroyidagi kotibning xonasiga jo‘nadi. Barcha a’yonlar o‘sha yerda jamuljam bo‘lib o‘tirgan ekan: ular — kotib Elishama, Shamayo o‘g‘li Daloyo, Axbor o‘g‘li Elnatan, Shofon o‘g‘li Gamariyo, Xanoniyo o‘g‘li Zidqiyo va boshqa a’yonlar edilar.

¹³Borux o‘rama qog‘ozdan xalqqa o‘qib bergan barcha so‘zlarni Mixiyo ularga aytib berdi.

¹⁴A’yonlar Kushi o‘g‘li Shalamiyo avlodidan bo‘lgan Nataniyo o‘g‘li Yohudini Boruxning oldiga jo‘natib, shunday gapni aytib yubordilar: “Xalqqa o‘qib bergan o‘rama qog‘ozni olib, huzurimizga kelgin.” Neriyo o‘g‘li Borux o‘rama qog‘ozni olib a’yonlarning oldiga bordi.

¹⁵A’yonlar Boruxga: “Qani, o‘tir, bizga ham o‘rama qog‘ozdagi so‘zlarni o‘qib ber”, dedilar. Borux o‘qidi.

¹⁶A’yonlar eshitgan so‘zlaridan vahimaga tushib, bir–biriga qarab qoldilar. So‘ng Boruxga: “Bu haqda shohni xabardor qilishimiz zarur”, dedilar.

¹⁷Ular Boruxdan so‘radilar: — Bularni qayerdan olib yozding? Bu so‘zlarni senga aytgan mabodo Yeremiyo emasmi?

¹⁸— Ha, Yeremiyoning o‘zi aytib turdi, men esa uning aytganlarini siyoh bilan o‘rama qog‘ozga yozdim, — deb javob berdi Borux.

¹⁹— Yeremiyo bilan borib, biron joyga yashirinib olinglar, hech kim bu haqda bilmasin, — deb tayinlashdi a’yonlar.

²⁰A’yonlar o‘rama qog‘ozni kotib Elishamaning xonasida qoldirdilar, o‘zlari esa shoh huzuriga borib, hamma gapni yetkazdilar.

²¹Shoh o‘rama qog‘ozni olib kelish uchun Yohudini jo‘natdi. Yohudi kotib Elishama xonasidan o‘rama qog‘ozni olib kelib, uni shohga va shoh huzuridagi a’yonlarga o‘qib berdi.

²²Kech kuz. Shoh qishki saroyida o‘tirar, yonidagi manqalda o‘t yonib turar edi.

²³Yohudi o‘rama qog‘ozdan uch–to‘rt ustunni o‘qib bo‘lishi bilanoq, shoh Yohayiqim kotibning pichoqchasi bilan o‘ramning o‘sha qismini qirqib, manqaldagi olovga tashlayverdi. U o‘rama qog‘ozning hammasini olovda yondirib bo‘lguncha shunday qilaverdi.

²⁴O‘rama qog‘ozdagi so‘zlarni eshitgan shoh bilan xizmatkorlar qo‘rqmadilar, qayg‘udan kiyimlarini yirtmadilar.

²⁵Elnatan, Daloyo va Gamariyo shohga yolvorib, o‘rama qog‘ozni yondirmang, deb iltimos qilgan bo‘lsalar ham, shoh ularga quloq solmadi.

²⁶U shahzoda Yaraxmalga, Ozriyol o‘g‘li Sarayoga va Abdal o‘g‘li Shalamiyoga, Yeremiyo payg‘ambarni va kotib Boruxni tutib kelinglar, deb buyurdi. Egamiz esa Yeremiyo bilan Boruxni yashirib qo‘ygan edi.

²⁷Yeremiyo Boruxga yozdirgan o‘rama qog‘ozni shoh yoqib yuborgandan keyin, Yeremiyoga Egamizning quyidagi so‘zi ayon bo‘ldi:

²⁸“Yeremiyo, boshqa bir o‘rama qog‘oz ol. Unga Yahudo shohi Yohayiqim yondirib yuborgan avvalgi o‘rama qog‘ozdagi hamma so‘zlarni yoz.

²⁹Yahudo shohi Yohayiqimga esa shunday deb ayt: Egamiz demoqda: — O‘rama qog‘ozda “Bobil shohi albatta keladi, yurtni vayron qiladi, odamlaru hayvonlarni qirib tashlaydi”, deb yozilgani uchun, sen Yeremiyoga do‘q qilibsan, o‘rama qog‘ozni yoqib yuborishga jur’at etibsan.

³⁰Shuning uchun, ey Yahudo shohi Yohayiqim, Egamiz sen haqingda shunday demoqda: Sening avlodingdan birontasi ham Dovud taxtida o‘tirmaydi. Sening jasadingni odamlar uloqtirib yuborishadi, o‘liging kunning jaziramasigda, tunning sovug‘ida qoladi.

³¹Men seni, sening avlodingu a’yonlaringni qilgan gunohlaringiz uchun jazolayman. O‘zim aytgan barcha falokatlarni sizlarning boshingizga, Quddus aholisi va Yahudo xalqining boshiga yog‘diraman, chunki sizlar Menga quloq solmadingizlar.”

³²Yeremiyo boshqa bir o‘rama qog‘oz olib, Neriyo o‘g‘li kotib Boruxga berdi. So‘ng Yahudo shohi Yohayiqim yondirib yuborgan avvalgi o‘rama qog‘ozdagi barcha so‘zlarni unga yozdirdi. Ammo bu safar o‘ramga shunga o‘xshash mazmundagi ko‘p xabarlar qo‘shilgan edi.