Read O‘zbek tilidagi Muqaddas Kitob, 2013 Yeremiyo 37 Bible Online

Yeremiyo 37 - O‘zbek tilidagi Muqaddas Kitob, 2013 bible

Yeremiyo 37

¹Bobil shohi Navuxadnazar Yo‘shiyo o‘g‘li Zidqiyoni Yohayiqim o‘g‘li Yohayixinning o‘rniga Yahudo shohi qilib tayinladi.

²Ammo na shoh, na a’yonlari, na yurtdagi xalq Egamizning Yeremiyo orqali aytgan so‘zlariga quloq solar edilar.

³Shoh Zidqiyo Shalamiyo o‘g‘li Yohuxal bilan Masiyo o‘g‘li ruhoniy Zafaniyoni Yeremiyo payg‘ambarning oldiga yuborar ekan, shu gaplarni ayttirib yubordi: “Iltimos, biz uchun Egamiz Xudoga iltijo qil.”

⁴Yeremiyo shu vaqtgacha qamoqqa olinmaganligi uchun, xalq orasida bemalol yurar edi.

⁵Shu orada fir’avn lashkarlari Misrdan chiqishdi. Quddusni qamal qilib turgan Bobilliklar bu xabarni eshitishgach, Quddusdan chekindilar.

⁶Shunda Egamiz so‘zini Yeremiyoga ayon qildi.

⁷Isroil xalqining Xudosi — Egamiz shunday demoqda: “Xudoning so‘zini bilmoqchi bo‘lib, ikkovingizni oldimga yuborgan Yahudo shohiga shunday deb ayting: Sizlarga yordam bermoqchi bo‘lib kelayotgan fir’avn lashkarlari o‘zlarining yurti — Misrga qaytib ketishadi.

⁸Bobilliklar esa Quddusga qaytib kelib, shaharga qarshi jang qiladilar. Ular shaharni qo‘lga olib, yondirib yuboradilar.”

⁹Egamiz yana shunday demoqda: “Bobilliklar endi qaytib kelishmaydi, deb o‘zlaringizni aldamanglar, chunki ular albatta qaytib kelishadi.

¹⁰Bordi–yu, sizlar Bobilliklarning butun lashkarini mag‘lub qilganingizda ham, ularning chodirlarida qolgan yaradorlar kelib, shahringizga o‘t qo‘ygan bo‘lardi.”

¹¹Fir’avn lashkarlari yaqinlashib kelayotganligi uchun, Bobilliklar Quddusdan chekindilar.

¹²Shunda Yeremiyo Benyamin hududidagi xalq orasida o‘ziga tegishli yer ulushini ko‘rish uchun Quddus shahridan ketmoqchi bo‘ldi.

¹³U Quddusning Benyamin darvozasiga yetib olgach, soqchilar boshlig‘i Yiriyo: “Sen Bobilliklarning oldiga qochib ketmoqchisan”, deb uni qamoqqa oldi. Yiriyo Shalamiyoning o‘g‘li, Xanoniyoning nevarasi edi.

¹⁴“Yolg‘on! — dedi Yeremiyo — Men Bobilliklarning oldiga qochmoqchi emasman.” Ammo Yiriyo Yeremiyoning gapiga quloq solishni istamay, uni hibsga olib, a’yonlarning oldiga olib bordi.

¹⁵A’yonlar Yeremiyodan g‘azablanib, uni kaltaklashdi. So‘ng kotib Yo‘natanning zindonga aylantirilgan uyiga qamab qo‘yishdi.

¹⁶Shunday qilib, Yeremiyo uzoq vaqt zindon hujralaridan birida yotdi.

¹⁷Oradan vaqt o‘tdi. Shoh Zidqiyo Yeremiyoni saroyiga chaqirtirib: — Egamizdan biron xabar bormi? — deb yashirincha so‘radi. — Ha, bor, — dedi Yeremiyo. — Siz Bobil shohining qo‘liga tushasiz.

¹⁸Nega ular meni zindonga tashlashdi? Men a’yonlaringizga va bu xalqqa qarshi nima gunoh qilibman?! — dedi yana u.

¹⁹— “Bobil shohi sizga hujum qilmaydi, yurtimizga u tajovuz qilmaydi”, deb bashorat qilgan payg‘ambarlaringiz qani?!

²⁰Yolvoraman, Olampanohim, iltijoimni rad etmang, meni kotib Yo‘natanning uyiga qaytarib yubormang. U yerda adoi tamom bo‘laman.

²¹Shoh Zidqiyo, Yeremiyoni soqchilar hovlisiga qamab qo‘yinglar, shaharda non qolmaguncha, har kuni unga novvoy rastasidan bittadan non olib beringlar, deb buyurdi. Shunday qilib, Yeremiyo soqchilar hovlisida qoldi.