Read O‘zbek tilidagi Muqaddas Kitob, 2013 Yeremiyo 38 Bible Online

Yeremiyo 38 - O‘zbek tilidagi Muqaddas Kitob, 2013 bible

Yeremiyo 38

¹Matton o‘g‘li Shafatiyo, Pashxur o‘g‘li Gadaliyo, Shalamiyo o‘g‘li Yuxal va Malkiyo o‘g‘li Peshxur Yeremiyoning xalqqa aytgan shu so‘zlarini eshitgan edilar:

²“Egamiz demoqda: Shaharda qolganlar qilichdan, qahatchilik va o‘latdan nobud bo‘ladilar. Bobilliklarning oldiga chiqqanlar esa tirik qoladilar. Bunday odamlar hech bo‘lmaganda o‘z jonlarini saqlab qoladilar.”

³Ular yana Egamizning Yeremiyo orqali aytgan shu so‘zlarni ham eshitgan edilar: Egamiz demoqda: “Bobil shohining lashkarlari albatta bu shaharni taslim qilib, qo‘lga kiritadilar.”

⁴A’yonlar shohga arz qilib: — Bu odamni yo‘q qilish kerak! — dedilar, — chunki u o‘zining bema’ni gaplari bilan shaharda qolgan jangchilaru odamlarning ruhini tushirmoqda. U xalqimizning foydasini emas, zararini ko‘zlamoqda.

⁵— Juda soz, — dedi shoh, — u bilan xohlaganingizni qiling. Men sizlarga monelik qila olmayman.

⁶A’yonlar Yeremiyoni ushlab, arqonlarga bog‘lab sardobaga tushirdilar. Soqchilar hovlisidagi bu suvsiz sardoba shahzoda Malkiyoga tegishli bo‘lib, sardobada balchiqdan boshqa hech narsa yo‘q edi. Yeremiyo balchiqqa botib qoldi.

⁷Shoh saroyining amaldori Habashistonlik Obidmalek Yeremiyo sardobaga tashlanganligi haqida xabardor bo‘ldi. Shoh o‘sha paytda Benyamin darvozasidagi mahkamada edi.

⁸Obidmalek saroydan chiqdi–da, shohning oldiga borib dedi:

⁹— Shoh hazratlari, Yeremiyo payg‘ambarni sardobaga tashlagan odamlar qabihlik qilishibdi. Shaharda non qolmagan bo‘lsa, Yeremiyo u yerda ochlikdan o‘ladi–ku.

¹⁰Shoh Habashistonlik Obidmalekka shunday amr qildi: — Bu yerdan o‘ttizta odamni olginda, borib Yeremiyoni sardobadan chiqarib ol. Tag‘in u yerda o‘lib qolmasin.

¹¹Obidmalek yoniga odamlarni olib, saroy xazinasining ostki qismida joylashgan xonaga kirdi. U yerdan eski–tuski kiyimlar va latta–putta topib, ularni arqonlarga bog‘lab, Yeremiyoga tushirdi.

¹²So‘ng Yeremiyoga dedi: “Arqon tanangizga botmasligi uchun, lattalarni arqon bilan qo‘ltig‘ingiz orasiga qo‘ying.” Yeremiyo aytilganday qildi.

¹³Odamlar Yeremiyoni arqonlar yordamida sardobadan chiqarib oldilar. Yeremiyo soqchilar hovlisida qoldi.

¹⁴Shoh Zidqiyo Yeremiyo payg‘ambarni chaqirtirdi, uni Egamiz Ma’badining uchinchi kirishida kutib oldi. — Sendan bir narsa so‘ramoqchiman, — dedi shoh. — Mendan hech narsa yashira ko‘rma.

¹⁵— Sizga haqiqatni aytsam meni o‘ldirishingiz aniq, — dedi Yeremiyo. — Sizga maslahat berganim bilan, baribir quloq solmaysiz.

¹⁶Shoh Zidqiyo Yeremiyoga maxfiy ravishda ont ichib dedi: — Bizga hayot baxshida etgan Xudo shohid, men seni o‘ldirmayman. Joningga qasd qilayotgan odamlarning qo‘liga ham seni topshirmayman.

¹⁷Shundan keyin Yeremiyo Zidqiyoga dedi: — Isroil xalqining Xudosi, Parvardigori Olam — Egamiz demoqda: Agar siz Bobil shohining a’yonlariga taslim bo‘lsangiz, o‘z joningizni saqlab qolasiz, bu shahar ham olovga yem bo‘lmaydi. Siz va butun xonadoningiz tirik qolasizlar.

¹⁸Bordi–yu, Bobil shohining a’yonlariga taslim bo‘lmasangiz, Bobilliklar bu shaharni yengib, unga o‘t qo‘yadilar, o‘zingiz ham ularning qo‘lidan qochib qutulolmaysiz.

¹⁹— Men Bobilliklar tomonga qochib o‘tgan yahudiylardan qo‘rqaman, — dedi shoh. — Bobilliklar meni ularning qo‘liga topshirishsa, ular meni xo‘rlashadi.

²⁰— Topshirishmaydi, — dedi Yeremiyo. — Aytganlarimni qilib, Egamizning so‘ziga itoat qilsangiz, hammasi yaxshi bo‘ladi, joningizni saqlab qolasiz.

²¹Bordi–yu, taslim bo‘lishdan bosh tortsangiz, Egamiz menga vahiy orqali ayon qilganlari bajo bo‘ladi:

²²Saroyingizda qolgan hamma ayollar Bobil shohining a’yonlari oldiga chiqariladi. O‘sha ayollar sizga shunday deyishadi: Ishongan do‘stlaringiz Sizni aldab, yengib ketishdi. Oyog‘ingiz loyga botganda, Ishongan do‘stlaringiz sizni tashlab ketishdi.

²³Sizning xotinu bola–chaqalaringiz Bobilliklarning oldiga chiqariladi. Siz o‘zingiz ham Bobilliklarning qo‘lidan qochib qutula olmaysiz. Bobil shohi sizni qo‘lga tushirib, shaharni yondirib yuboradi.”

²⁴— Suhbatimiz haqida hech kimga og‘iz ochma, aks holda o‘lasan, — dedi Zidqiyo Yeremiyoga.

²⁵— Bordi–yu, a’yonlar sen bilan gaplashganimni bilib qolib, senga: “Shoh bilan nimalar haqida gaplashding? Bizdan biron narsani yashirmay ayt, bo‘lmasa o‘lasan”, — deb aytishsa,

²⁶sen ularga: “Meni Yo‘natanning uyiga qaytarib yubormang, shohim, aks holda u yerda adoi tamom bo‘laman, deb iltijo qildim”, deya javob ber.

²⁷A’yonlar Yeremiyoning oldiga kelib, uni so‘roqqa tutishdi. Yeremiyo shoh buyurgan gaplarni aytib, javob berdi. Shundan keyin a’yonlar unga boshqa savol bermadilar, chunki shoh bilan Yeremiyo orasida bo‘lgan suhbatni hech kim eshitmagan edi.

²⁸Yeremiyo Quddus qulagan kunga qadar soqchilar hovlisida qoldi.