Read O‘zbek tilidagi Muqaddas Kitob, 2013 Yeremiyo 39 Bible Online

Yeremiyo 39 - O‘zbek tilidagi Muqaddas Kitob, 2013 bible

Yeremiyo 39

¹Yahudo shohi Zidqiyo hukmronligining to‘qqizinchi yili, o‘ninchi oyida Bobil shohi Navuxadnazar Quddusga qarshi bor qo‘shini bilan kelib, shaharni qamal qildi.

²Zidqiyo hukmronligining o‘n birinchi yili, to‘rtinchi oyining to‘qqizinchi kunida Bobilliklar Quddus devorini yorib, shaharga kirdilar.

³Shahar qo‘lga olingach, Bobil shohining hamma a’yonlari shaharning O‘rta darvozasidagi mahkamalarda qo‘mondonlik qarorgohini joylashtirdilar. A’yonlarning orasida Nargalsharazar, Samgarnavu, bosh maslahatchi Sarsahim va amaldor Nargalsharazar bor edilar.

⁴Yahudo shohi Zidqiyo va uning hamma lashkarlari ularni ko‘rdilaru qochdilar. Ular yarim kechasi shohning bog‘i orqali o‘tib, ikki devor orasidagi darvozadan chiqdilar–da, Iordan vodiysiga qarab ketdilar.

⁵Ammo Bobil lashkarlari Zidqiyoning orqasidan quvib, Yerixo tekisligida ularga yetib olishdi. Ular Zidqiyoni qo‘lga olib, Xomat yurtidagi Rivlo shahriga — Bobil shohi Navuxadnazarning huzuriga olib borishdi. Shoh Navuxadnazar Zidqiyoni hukm qildi,

⁶Rivloda Zidqiyoning o‘g‘illarini ko‘zi oldida o‘ldirdi, so‘ng hamma Yahudo a’yonlarini qatl qildi.

⁷Zidqiyoning esa ko‘zlarini o‘yib, Bobilga olib ketish uchun kishanladi.

⁸Bobilliklar shoh saroyiga va odamlarning uylariga o‘t qo‘yib, Quddus devorlarini yiqitdilar.

⁹Qo‘riqchilar sardori Nabizaradon shaharda qolgan butun xalqni, Bobil shohi tomonga o‘tgan qochoqlarni Bobilga asir qilib olib ketdi.

¹⁰U Yahudo yurtida hech vaqosi bo‘lmagan qashshoq odamlarnigina qoldirdi. O‘sha odamlarga dala va uzumzorlarni berdi.

¹¹Shoh Navuxadnazar qo‘riqchilar sardori Nabizaradon orqali Yeremiyoga oid quyidagi amrni berdi:

¹²“Yeremiyoni qaramog‘ingizga olib, unga yaxshi qaranglar. Aslo zarar yetkazmanglar, sizlardan nima so‘rasa bajaringlar.”

¹³Qo‘riqchilar sardori Nabizaradon, bosh nazoratchi Navushazbon, shoh maslahatchisi Nargalsharazar va Bobil shohining hamma bosh amaldorlari odam yuborib,

¹⁴Yeremiyoni qo‘riqchilar hovlisidan olib kelishini buyurdilar. Uni eson–omon uyiga eltib qo‘yish uchun, Gadaliyoga topshirdilar. Gadaliyo Oxixamning o‘g‘li, Shofoning nevarasi edi. Shunday qilib, Yeremiyo o‘z xalqining orasida qoldi.

¹⁵Yeremiyo soqchilar hovlisida qamoqda o‘tirganda, unga Egamizning so‘zi ayon bo‘lgan edi:

¹⁶“Habashistonlik Obidmalekning oldiga borib, shunday deb ayt: Isroil xalqining Xudosi — Sarvari Olam aytmoqda, Men aytgan so‘zlarimni bajo qilaman. Bu shaharga yaxshilik emas, yomonlik keltiraman. Sen o‘zing buning guvohi bo‘lasan.”

¹⁷Egamiz yana shunday demoqda: “Lekin o‘sha kuni Men seni qutqarib qolaman. O‘zing qo‘rqadigan odamlarning qo‘liga seni bermayman.

¹⁸Seni, albatta qutqaraman, jangda halok bo‘lmaysan. Menga umid bog‘laganing uchun, joning omon bo‘ladi.” Egamizning kalomi shudir.