Read O‘zbek tilidagi Muqaddas Kitob, 2013 Yeremiyo 4 Bible Online

Yeremiyo 4 - O‘zbek tilidagi Muqaddas Kitob, 2013 bible

Yeremiyo 4

¹Egamiz shunday demoqda: “Ey Isroil, qani endi qaytsang, Qani endi, Menga qaytib kelsang! Huzurimdan jirkanch butlaringni uloqtirib tashlasang, Qani endi, Mening yo‘limdan ozmay yursang.

²Qani endi, haqiqat, adolat va to‘g‘rilik ila “Egamiz shohid!” deya qasam ichsang. Shunda xalqlar Men orqali baraka topadi, Ular Men bilan faxrlanadi.”

³Egamiz Yahudo xalqiga va Quddus aholisiga shunday deb aytmoqda: “Yeringizni shudgor qiling, Tikanlar orasiga urug‘ sepmang.

⁴Ey Yahudo xalqi va Quddus aholisi, O‘zingizni Men, Egangizga, bag‘ishlang, Yuragingizni sunnat qiling. Aks holda, yovuz qilmishingiz uchun G‘azabimni ustingizga olovday yog‘diraman, Olovni hech kim o‘chira olmaydi.

⁵Yahudoda e’lon qiling, Quddusda jar soling. Butun yurt bo‘ylab burg‘u chalinsin, Baland ovozda hayqiring: “To‘planinglar! Mustahkam shaharlarga qochaylik!”

⁶Quddusga qochib kelish uchun ishora bering, Imillamay, tezroq qoching! Men shimoldan kulfat keltirmoqdaman, Dahshatli halokat olib kelmoqdaman.

⁷Ana, xalqlarni halok etuvchi yo‘lga tushdi, U sher kabi chakalakzordan chiqdi. Yurtingizni xarob qilgani uyasini tark etdi. Evoh, endi shaharlaringiz vayron bo‘ladi, Hammasi huvullab qoladi.

⁸Marsiya aytib, faryod qilinglar, Qanorga o‘ranib olinglar. Axir, Egamizning alangali g‘azabi Bizni chetlab o‘tmadi.

⁹Egamiz shunday demoqda: “O‘sha kuni shoh bilan a’yonlarning yuragi orqaga tortib ketadi. Ruhoniylar bilan payg‘ambarlar dahshatga tushadi.”

¹⁰Shunda men dedim: “Yo, Egam Rabbiy, Sen Quddus aholisini yomon laqillatding! Qilich ularning bo‘g‘zida turgan bir paytda, Sen ularga tinchlik va’da qilding.”

¹¹O‘sha payt kelganda Egamiz Quddus aholisiga shunday deb aytadi: “Sahrodagi yalang qirlardan chiqqan garmsel xalqim tomon esmoqda. U donni xashakdan tozalaydigan mayin shabada emas,

¹²balki Men yuborgan kuchli bir garmseldir. Men sizlarga qarshi O‘z hukmimni e’lon qilmoqdaman.”

¹³Qarang! Dushman bulutday ko‘tarilmoqda. Ularning jang aravalari quyun kabidir, Otlari burgutdan ham chaqqondir. Evoh, sho‘rimiz qurisin! Xonavayron bo‘ldik!

¹⁴“Ey Quddus, najot topishing uchun yuragingni pokla. Qachongacha yuragingda yovuz niyat saqlaysan?!

¹⁵Ana, Dan shahridan xabarchining ovozi eshitilmoqda, Efrayim qirlaridan bir shum xabar kelmoqda.

¹⁶Xalqlarga buni aytinglar, Quddusda shunday e’lon qilinglar: “Olis yurtdan bosqinchilar kelmoqda, Ular Yahudo shaharlariga qarshi hayqirmoqda.

¹⁷Bosqinchilar dala qo‘riqchilariga o‘xshab, Quddusni qurshab olishadi. Zotan Quddus ahli Menga qarshi bosh ko‘tardi”, demoqda Egamiz.

¹⁸Tutgan yo‘lingizdan, qilgan qilmishingizdan Bu kulfat boshingizga keldi–ku! Jazoingiz shudir. Oh, naqadar achchiq bo‘lmasa bu kulfat! Naqadar yurakni ezadi–ya!”

¹⁹Voy jonim, adoyi tamom bo‘ldim! Voy yuragim! Qinidan chiqquday bo‘lyapti! Sukut saqlab tura olmayman, Eshityapman burg‘u sadolarini, Eshityapman urushga da’vatlarni.

²⁰Kulfat ketidan kulfat keldi, Butun yurt xonavayron bo‘ldi. Bir zumda chodirlarim buzilib ketdi, Chodirimning pardalari yo‘q bo‘ldi.

²¹Qachongacha yov bayrog‘i ko‘zim oldida hilpirab turaveradi?! Qachongacha burg‘u ovozi qulog‘imga chalinaveradi?!

²²Egamiz shunday javob berdi: “Axir, Mening xalqim befarosat, Ular Meni tanishmaydi. Ular nodon, aqlsiz farzandlardir. Yomonlik qilishga usta, Yaxshilik qilish esa qo‘llaridan kelmaydi.”

²³Men yerga qaradim, yer ayqash–uyqash edi, Ko‘zimni osmonga tikdim, osmonda nur ko‘rinmasdi.

²⁴Tog‘larga qaradim, tog‘lar silkinayotgan edi, Hamma qirlar larzaga kelgan edi.

²⁵Qaradim, ammo inson zoti ko‘rinmadi, Hatto ko‘kdagi qushlar ham uchib ketgan edi.

²⁶Qaradim, hosildor yerlar cho‘lga aylangan edi, Hamma shaharlar vayron bo‘lgan edi. Bunga sabab Egamizning qattiq qahri edi.

²⁷Zero, Egamiz shunday degan edi: “Butun yurt vayron bo‘ladi, Lekin yurtni butunlay yo‘q qilib yubormayman.

²⁸Butun dunyo aza tutadi, Osmon ham qop–qora bo‘lib ketadi. Buni Men aytdim, shaxtimdan qaytmayman. Qaror qildim, qarorimni o‘zgartirmayman.”

²⁹Otliq va kamonchilar hayqirig‘idan Har bir shahar aholisi qochib qoladi. Ular chakalakzorlar oralab yugurishadi, Qoyalarga chiqib, oralariga yashirinib olishadi. Hamma shaharlar huvullab qoladi, U yerlarda yashaydigan odam bo‘lmaydi.

³⁰Sen esa, ey xarobazorga aylangan shahar, Nega ustingga qirmizi libos kiyib olding, Oltin taqinchoqlar bilan bezanding? Nega ko‘zlaringni bo‘yab olding? Bekorga bezanib olibsan! O‘ynashlaring sendan nafratlanadi, Joningga qasd qilmoqchi ular.

³¹Ana, kimdir to‘lg‘oq tutgan ayolday baqirmoqda, Kimdir ilk bor tug‘ayotgan ayolday ingramoqda. Qiz Quddus entikib qichqirmoqda, Qo‘llarini cho‘zib shunday demoqda: “Sho‘rim qurisin! Qotillarim oldida madorim qolmadi.”