Read O‘zbek tilidagi Muqaddas Kitob, 2013 Yeremiyo 43 Bible Online

Yeremiyo 43 - O‘zbek tilidagi Muqaddas Kitob, 2013 bible

Yeremiyo 43

¹Yeremiyo Egasi Xudo o‘ziga ayon qilgan bu so‘zlarning hammasini butun xalqqa aytib bo‘lgach,

²Ho‘shayyo o‘g‘li Ozariyo, Kariyox o‘g‘li Yo‘xanon va boshqa surbetlar Yeremiyoga shunday dedilar: “Yolg‘on gapiryapsan! Egamiz Xudo senga, Misrga borib yashamanglar, deb aytmagan.

³Neriyo o‘g‘li Borux seni gijgijlab yuribdi. U bizni Bobilliklarning qo‘liga tushirib, halok qilmoqchi yoki surgun qilib yubormoqchi.”

⁴Shunday qilib, Kariyox o‘g‘li Yo‘xanon, lashkarboshilar va butun xalq Egamizning amriga itoat qilmadilar, ular Yahudo yurtida qolishdan bosh tortdilar.

⁵Yahudoga turli yurtlardan qaytib kelgan hamma odamlarni Kariyox o‘g‘li Yo‘xanon va lashkarboshilar o‘zlari bilan olib ketdilar.

⁶Bulardan tashqari, ular qo‘riqchilar sardori Nabizaradon Oxixam o‘g‘li Gadaliyo yonida qoldirib ketgan hamma erkagu ayollarni, bola–chaqa, malikalar, Yeremiyo payg‘ambar va Neriyo o‘g‘li Boruxni ham o‘zlari bilan olib ketdilar.

⁷Ular Egamizning amriga itoat qilmay, Misrga jo‘nab, Taxpanxas shahriga yetib bordilar.

⁸Taxpanxasda Yeremiyoga Egamizning quyidagi so‘zi ayon bo‘ldi:

⁹“Yahudiylarning ko‘zi oldida katta toshlarni ol. Bu toshlarni Taxpanxas shahridagi fir’avn saroyining kiraverishiga, hovlidagi g‘isht yo‘lagi ostiga ko‘mib qo‘y.

¹⁰So‘ng yahudiylarga shunday deb ayt: Isroil xalqining Xudosi — Sarvari Olam demoqda: Men Bobil shohi qulim Navuxadnazarni bu yerga olib kelaman. U mana shu ko‘milgan toshlarning ustiga taxtini o‘rnatib, shohona chodirini tikadi.

¹¹U kelib Misrni vayron qiladi, har bir odam peshanasidagini ko‘radi: Ba’zilar o‘latga yo‘liqib, nobud bo‘ladi, Ba’zilar asirlikka tushib, surgun qilinadi, Ba’zilar qilichdan o‘tkaziladi.

¹²Mening amrim bilan Navuxadnazar Misr xudolarining sajdagohlariga o‘t qo‘yadi. Ba’zi butlarini yondiradi, ba’zilarini o‘zi bilan olib ketadi. Qo‘ychivon to‘nini bit–burgadan astoydil tozalaganday, Navuxadnazar ham Misr yurtini qirtishlab tozalaydi. So‘ng sog‘–salomat o‘z yurtiga qaytib ketadi.

¹³U Misrdagi Quyosh sajdagohiga o‘rnatilgan butsimon toshlarni buzib tashlaydi. Misr xudolarining sajdagohlarini yoqib yuboradi.”