Read O‘zbek tilidagi Muqaddas Kitob, 2013 Yeremiyo 46 Bible Online

Yeremiyo 46 - O‘zbek tilidagi Muqaddas Kitob, 2013 bible

Yeremiyo 46

¹Egamiz xalqlar haqida Yeremiyoga O‘z so‘zini ayon qildi.

²Bu Misr haqida bashorat edi. Aniqrog‘i, Misr fir’avini Nexoning lashkarlari to‘g‘risida edi. Ular Furot daryosi bo‘yidagi Karxamish shahrida qarorgoh qurgan edilar. (Yahudo shohi Yo‘shiyo o‘g‘li Yohayiqim hukmronligining to‘rtinchi yilida Bobil shohi Navuxadnazar bu lashkarlarni mag‘lub qildi).

³“Kattayu kichik qalqonlarni tayyor tuting! Qani, endi jangga kiring!

⁴Otlarga egar uring, Chopqir otlarni mining! Dubulg‘alarni kiyib oling, Jangovar holatga turing. Nayzalarni o‘tkirlang, Sovutlarni kiyib oling!

⁵Nimalarni ko‘ryapman?! Misr lashkari vahimaga tushdi, Ular orqaga chekindi, Jangchilari tor–mor bo‘ldi. Ular orqaga qaramay shoshilib qochdilar. Atrofni dahshat qamradi.” Egamizning kalomi shudir.

⁶Chaqqonlar qocha olmaydilar, Sipohlar qochib qutulolmaydilar. Ular shimolda, Furot daryosi bo‘yida Qoqilib yiqilib tushadilar.

⁷Kim u Nil daryosiday qirg‘og‘idan chiqib ketgan?! Kim u suvlari toshqin daryo kabi bo‘lib qolgan?!

⁸Misr Nilday haddidan oshgan, Suvlari toshqin daryoga o‘xshab qolgan. U aytadi: “Men ko‘tarilib, yer yuzini qoplayman, Shaharlarni vayron qilaman, Aholisini qirib tashlayman.”

⁹Ey otliqlar, hujum qiling! Jang aravalarini uchirtiring! Ey qalqon tutgan Habashistonliklaru Liviyaliklar, Ey kamon ushlagan Lidiyaliklar, Qani, jangga kiring!

¹⁰Axir, bu Sarvari Olam — Rabbiyning kunidir. Bu kun qasos kuni bo‘ladi, Xudo dushmanlaridan o‘ch oladi. Uning qilichi to‘yguncha et yeydi, Chanqog‘i bosilguncha qondan ichadi. O‘sha kuni Furot bo‘yidagi shimoliy yurtda, Sarvari Olam — Rabbiy yovlarini qurbon qiladi.

¹¹Ey, bokira qiz Misr, Giladga bor, malham olgin. Ammo sen bekorga dori–darmon yig‘asan, Baribir dardingga shifo topmaysan.

¹²Xalqlar sharmanda bo‘lganingni eshitdi, Faryodlaring bilan yer yuzini to‘ldirding. Jangchilaring bir–biriga urildi, Hammasi mag‘lub bo‘lib yiqildi.

¹³Bobil shohi Navuxadnazar Misrga hujum qilishi haqida Yeremiyoga Egamizning quyidagi so‘zi ayon bo‘ldi:

¹⁴Misrda shunday deb e’lon qilgin, Migdol shahrida shunday deb xabar bergin, Nuf va Taxpanxas shaharlarida jar solib aytgin: “Joylaringizni egallang! Jangga shay turing! Zero, qilich atrofdagi hammani qiradi.”

¹⁵Jangchilaringiz mag‘lub bo‘ladi! Ular bardosh bera olmaydi. Zero, Egamizning O‘zi ularni uradi.

¹⁶Ular qayta–qayta qoqiladilar, Bir–birining ustiga yiqiladilar. Shunda o‘zlariga o‘zlari aytadilar: “Qani, bo‘linglar, Xalqimizning oldiga qochib qolaylik! Kindik qonimiz to‘kilgan yurtga boraylik. Bu qirg‘indan qochib qutulaylik.”

¹⁷Ular shunday deb baqiradilar: “Fir’avn katta gapirdi, Ammo fursatni qo‘ldan boy berdi.”

¹⁸Xudo Shohdir, Sarvari Olamdir Uning nomi. U shunday demoqda: “Men barhayot Xudo bo‘lganim haqi aytamanki, Sizlarga qarshi bir g‘anim kelayotir. U tog‘lar orasidagi Tovur tog‘iday zabardast, Dengiz bo‘yidagi Karmil tog‘iday ulkan.

¹⁹Ey qiz Misr, Tuguningni yiqqin, Surgunga ketishga hozirlangin! Ana, Nuf shahri vayron bo‘ladi, Kimsasiz, huvullab qoladi.

²⁰Misr chiroyli bir g‘unajinga o‘xshaydi, Ammo shimol so‘nasi unga yopiriladi.

²¹Misrning yollanma askarlari Boqilgan buzoqlarga o‘xshaydi. Ammo kulfat kuni kelganda, Jazo oladigan vaqti yetganda, Ularning hammasi orqaga qochadi, Dushman qarshisida chekinadi.

²²“Bostirib kelayotgan dushman dastidan Misr qochayotgan ilonday vishillaydi. Dushmanlar daraxt kesuvchilar kabi Bolta ko‘tarib, Misrga hujum qilishadi.”

²³Egamiz shunday demoqda: “Misrning o‘rmoni qalin bo‘lsa–da, Dushmanlar uni kesib tashlaydi. Axir, dushmanlar chigirtkadan ham ko‘p, Sanog‘iga yetib bo‘lmaydi.

²⁴Qiz Misr sharmanda bo‘ladi, Shimoldagi xalqning qo‘liga tushadi.”

²⁵Isroil xalqining Xudosi — Sarvari Olam shunday demoqda: “Men No‘ shahrining xudosi Omonni jazolayman. Fir’avnning, Misrning, u yerdagi shohlar va xudolarning, fir’avnga umid bog‘lagan hammaning adabini beraman.

²⁶Ularning jonlariga qasd qilayotgan Bobil shohi Navuxadnazarning va a’yonlarining qo‘liga beraman. Ammo vaqt o‘tib, Misrda ilgarigidek odamlar yashaydigan bo‘ladi.” Egamizning kalomi shudir.

²⁷“Ey qulim Yoqub, qo‘rqma! Ey Isroil xalqi, sarosimaga tushma! Men seni olis yurtdan ozod qilaman, Naslingni surgun bo‘lgan mamlakatdan qutqaraman. Ey Yoqub nasli, sen yurtingga qaytasan, Osoyishta va bexatar yashaysan. Endi hech kim seni qo‘rqitmaydi.”

²⁸Egamiz shunday demoqda: “Sen, ey qulim Yoqub, qo‘rqma, Men sen bilan birga bo‘laman. Seni xalqlar orasiga tarqatib yuborgan edim, Endi o‘sha xalqlarning hammasini qirib tashlayman. Seni esa qirib yubormayman, Ammo jazosiz ham qoldirmayman. Adolat ila jazoingni beraman.”