Read O‘zbek tilidagi Muqaddas Kitob, 2013 Yeremiyo 49 Bible Online

Yeremiyo 49 - O‘zbek tilidagi Muqaddas Kitob, 2013 bible

Yeremiyo 49

¹Egamiz Ommon xalqi to‘g‘risida shunday dedi: “Isroil tirnoqqa zormidi?! Uning merosxo‘ri yo‘qmidi?! Nimaga unda Mo‘laxga topinadiganlar Gad hududini egallab olishdi? Nimaga Ommon xalqi Gad shaharlarida yashayapti?”

²Egamiz demoqda: “Bu qilmishlari uchun shunday kunlar keladiki, Men Ommonliklarning Rabba shahriga qarshi jang e’lon qilaman. Rabba shahrini vayronalar uyumiga aylantiraman, Atrofdagi qishloqlariga o‘t qo‘yaman. Shunda Isroil xalqi bosqinchilarining yerlarini bosib oladi.” Egamizning kalomi shudir.

³Dod sol, ey Xashbon! Ay shahri vayron bo‘ldi! Ey Rabba aholisi, faryod qiling! Qanorga o‘ranib, marsiya ayting, Sarosimaga tushib badaningizni tiling. Axir, xudoyingiz Mo‘lax surgun qilinadi, Ruhoniylaru a’yonlaringiz asirga olib ketiladi.

⁴Ey isyonkor qiz Ommon, Nechun kuching bilan maqtanasan? Sening kuching qirqiladi! Sen boyligingga ishonasan, “Bizga hujum qilishga kim jur’at etar?”, deysan.

⁵Sarvari Olam — Rabbiy shunday demoqda: “Men O‘zim senga har tomondan dahshat solaman. Hammangiz tumtaraqay bo‘lib qochasizlar, Qochoqlaringizni hech kim to‘play olmaydi.

⁶Ammo shundan so‘ng Men Ommon xalqini yana farovonlikka erishtiraman.” Egamizning kalomi shudir.

⁷Sarvari Olam Edom haqida shunday dedi: Temonda farosatli kishi qolmadimi? Oqilona nasihat beradigan topilmadimi? Aqllarini mog‘or bosdimi?

⁸Ey Dedonliklar, qochinglar, Chuqur g‘orlarda bekinib olinglar! Vaqt keldi Esov naslini jazolashga, Falokat keltiraman uning boshiga.

⁹Bog‘ingizda uzum tergan odamlar Bir–ikki bosh uzum qoldiradi–ku! Kechasi uyga tushgan o‘g‘ri Faqat xohlagan narsasini oladi–ku!

¹⁰Men esa Esovning bor–yo‘g‘ini tortib olaman, Uning pana joylarini oshkor qilaman, U hech qayerga yashirina olmaydi. Uning bolalari halok bo‘ladi, Og‘a–ini, qo‘shnilari o‘ladi. Undan asar ham qolmaydi.

¹¹Yetimlaringizni qoldiring, Ularning jonini asrayman. Bevalaringiz Menga inonib yashasin.

¹²Egamiz shunday demoqda: “Aybsiz odamlar jabr tortsa–yu, sen, ey Edom, jazosiz qolasanmi?! Yo‘q, sen jazodan qochib qutulolmaysan. Jazo kosasidan albatta ichasan.

¹³O‘z nomim bilan qasam ichib aytamanki, Bozrax shahri vayron bo‘ladi. Uning ayanchli ahvoli odamlarni vahimaga soladi. O‘tgan–ketganlar uni mazax qilib, nomini qarg‘ishlarda ishlatadi. Yon–atrofidagi hamma shaharlar ham to abad tashlandiq bo‘ladi.” Egamizning kalomi shudir.

¹⁴Men, Yeremiyo, Egamizdan bir xabar oldim, Jarchi bu xabarni xalqlarga e’lon qildi: “To‘planing! Shaharga hujum qiling, Qani, jangga otlaning!

¹⁵Ey Edom, seni xalqlar orasida arzimas qilib qo‘yaman, Butun odamzod sendan hazar qiladigan bo‘ladi.

¹⁶Vajohating seni aldadi, Takabburliging seni ahmoq qildi. Sen–ku tik qoyada yashaysan, Azim cho‘qqilarni egallagansan. Burgut kabi iningni baland qurgan bo‘lsang ham, Seni u yerdan tortib tushiraman.” Egamizning kalomi shudir.

¹⁷Edomning boshiga tushadigan kulfatlar shu qadar dahshatli bo‘ladiki, bu yurtning oldidan o‘tgan har bir kishi vahimaga tushib, qotib qoladi.

¹⁸Sado‘m, G‘amo‘ra va atrofdagi shaharlar qanday vayron bo‘lgan bo‘lsa, Edom ham xuddi shunday vayron bo‘ladi. U yerda hech kim yashamaydi.

¹⁹Men Iordan chakalakzoridagi arslonday yaylovdagi qo‘ylarga hujum qilaman. Bir zumda Edom xalqini o‘z yurtidan haydab chiqaraman. O‘zim xohlagan insonni u yerga bosh qilaman. Axir, kim Menga teng kela oladi?! Kim Mendan hisobot so‘ray oladi?! Qaysi cho‘pon Menga qarshi tura oladi?!

²⁰Shunday ekan, Edom xalqiga qarshi tuzgan rejalarimni eshitib qo‘ying. Temon aholisiga qilgan niyatlarimga quloq tuting: Yirtqichlar suruvdagi qo‘zichoqlarni sudrab ketadi. Qilmishlari tufayli yam–yashil yaylovlari payhon bo‘ladi.

²¹Edom gursullab qulaganda, yer yuzi larzaga keladi. Xalqning dodu voylari Qizil dengizgacha eshitiladi.

²²Qaranglar! Dushman burgutday Bozraxga hujum qilmoqda. Qanot kerib shahar uzra parvoz etmoqda. O‘sha kuni Edom lashkarlari dard tutgan ayol kabi vahimaga tushadi.

²³Quyidagi xabar Damashq haqidadir: Xomat bilan Arpad ahli shum xabar eshitishadi, Shuning uchun ular sarosimaga tushadi. Yuragiga tushgan g‘ulg‘ula bosilmaydi, Jo‘shqin dengiz kabi tinchlanmaydi.

²⁴Damashq madorsiz qoladi, Orqaga qochmoqchi bo‘ladi, Butun vujudini vahima qamrab oladi. Dard tutgan ayolday azobu qiynoqda qoladi.

²⁵Evoh, mashhur shahar tark etiladi! Quvonch makoni tashlab ketiladi!

²⁶O‘sha kuni yigitlari maydonlarda o‘ladi, Hamma sipohlari halok bo‘ladi.” Sarvari Olamning kalomi shudir.

²⁷“Men Damashq devorlariga o‘t qo‘yaman, Olov Banhadad qal’alarini yondirib tashlaydi.”

²⁸Bobil shohi Navuxadnazar mag‘lub qilgan Kedar va Xazor shohliklari haqida Egamiz shunday deydi: “Qani bo‘ling, Kedarga hujum qiling! O‘sha sharq qabilalarini halok eting!

²⁹Qo‘lga kiriting chodirlariyu qo‘ylarini, Pardalariyu bor bisotini. Tuyalarini o‘zingizga oling.“ Odamlar baqiradi: “Atrofni dahshat qamradi!”

³⁰Egamiz shunday demoqda: “Ey Xazor aholisi! Qoching! Uzoqlarga bosh olib keting. Chuqur g‘orlarda yashirinib oling. Zero, Bobil shohi Navuxadnazar Sizlarga qarshi bir reja tuzdi, Sizlarni halok etish niyatida yuribdi.”

³¹Egamiz shunday demoqda: “Ey Bobil lashkarlari, Qani, xotirjam bo‘lgan xalqqa hujum qilinglar! Bexatar yashayotganlarga tashlaninglar! Ular sahroda yolg‘iz yashaydilar, Shaharlarining na darvozalari, na tambalari bor.

³²Ularning tuyalarini o‘lja olasiz, Mol podalarini qo‘lga kiritasiz. Sochini oldirib yurgan Xazorliklarni Men to‘rt tomonga tarqatib yuboraman. Ularning ustiga har yoqdan kulfat yog‘diraman.” Egamizning kalomi shudir.

³³Xazor to abad tashlandiq bo‘lib qoladi, Chiyabo‘rilar makoniga aylanadi. U yerda hech kim yashamaydi, U joylarga hech kim borib o‘rnashmaydi.

³⁴Yahudo shohi Zidqiyo hukmronligining boshida Egamiz Yeremiyo payg‘ambarga Elam yurti to‘g‘risida O‘z so‘zini ayon qildi.

³⁵Sarvari Olam demoqda: “Men Elam merganlarini nobud qilaman. Qudratining manbaini sindiraman.

³⁶Ular ustiga to‘rt tomondan dushman solaman. Hammasini yer yuzining to‘rt tomoniga tarqatib yuboraman. Elamliklar qochib bormagan biron bir yurt qolmaydi.”

³⁷Egamiz demoqda: “Men Elamni qasdi bor dushmanlari qarshisida sarosimaga solaman. Qaynagan g‘azabimni ustilariga kulfat qilib yog‘diraman. Ortidan qilich solib, hammasini bitta qoldirmay qirib tashlayman.

³⁸Ularning shohini a’yonlari bilan birga yo‘q qilaman. Elamda O‘z taxtimni o‘rnataman.

³⁹Ammo keyinchalik Men Elam xalqini yana farovonlikka erishtiraman.” Egamizning kalomi shudir.