Read O‘zbek tilidagi Muqaddas Kitob, 2013 Yeremiyo 5 Bible Online

Yeremiyo 5 - O‘zbek tilidagi Muqaddas Kitob, 2013 bible

Yeremiyo 5

¹Egamiz shunday deydi: “Quddusning har bir ko‘chasiga kirib chiqinglar, Atrofingizga qarab, bilib olinglar, Shahar maydonlarida qidirib ko‘ringlar, Biron adolatli, rostgo‘y odam bormikan. Agar shunday odamni topib kelsangiz, Men Quddus aholisining gunohidan o‘taman.

²Ular “Egamiz shohid!” deya qasam ichadilar, Ammo ichgan qasamlari yolg‘on.”

³Ey Egam, Sen haqiqatni izlaysan. Sen bu xalqni urgan eding, Ammo ular og‘riq sezmadilar. Ularni deyarli yo‘q qilib yuborganingda ham, Gapingga kirmadilar. Betlarini toshdan ham qattiq qildilar, Tavba qilishni xohlamadilar.

⁴Shunda men ichimda dedim: “Eha, bular kambag‘al–ku! Shuning uchun ularning farosati yo‘q, Ular Egamizning yo‘lini bilmaydi, Xudosining qonunini tanimaydi.

⁵Qani, boylarning oldiga boray–chi, Ular bilan gaplashib ko‘ray–chi, Egamizning yo‘lini ular albatta biladi, Ular Xudosining qonunini tanishadi.” Ammo ularning hammasi bo‘yinturug‘ini sindirgan ekan, Egamizga itoat etishdan bosh tortgan ekan.

⁶Shuning uchun o‘rmondan chiqqan sher ularni o‘ldiradi, Cho‘ldan kelgan bo‘ri ularni g‘ajib tashlaydi. Qoplon shaharlari oldida pisib turadi, Shahardan chiqqan har bir odamni tilka–pora qiladi. Axir, ular ko‘p gunoh qildilar, Xudoga ko‘p xiyonat etdilar.

⁷“Sizlarni qanday qilib kechiraman?! Farzandlaringiz Meni tark etdilar–ku! Xudo bo‘lmagan butlarning nomini o‘rtaga qo‘yib ont ichdilar. Men ularning ehtiyojlarini qondirar edim, Ular esa zino qilaverar edilar, Fohishalarning uyiga to‘dalashib borar edilar.

⁸Ular hirsi qo‘zg‘agan ayg‘ir otlar kabi edi, Har biri qo‘shnisining xotiniga kishnar edi.

⁹Men ularni buning uchun jazolamaymi?! Shunday bir xalqdan o‘ch olmaymi?!” Egamizning kalomi shudir.

¹⁰“Qani, ularning uzumzorlariga kiringlar, Toklarini kesib tashlanglar. Ammo butunlay yo‘q qilmanglar. Novdalarini sindiringlar, Endi ular Meniki emas.

¹¹Axir, Isroil va Yahudo xalqlari Menga butunlay hiyonat qilishdi.” Egamizning kalomi shudir.

¹²Isroil xalqi Xudo haqida yolg‘on gapirdi, Ular shunday dedi: “Xudo baribir hech narsa qilmaydi. Hech qanday ko‘rgilik boshimizga tushmaydi! Qahatchilik, urush bo‘lmaydi!

¹³Payg‘ambarlarining bema’ni so‘zlari shamolga o‘xshaydi, Xudoning so‘zi ularga ayon bo‘lmagan. Bu kulfatlar o‘zlarining boshiga tushsin!”

¹⁴Shuning uchun Parvardigori Olam — Egamiz shunday demoqda: “Ey Yeremiyo, xalqim aytgan bu so‘zlari uchun, Men O‘z so‘zlarimni sening og‘zingda olovday qilaman. Bu xalq esa o‘tin kabi bo‘ladi, Olov ularni yondirib tashlaydi.”

¹⁵Egamiz shunday demoqda: “Ey Isroil xalqi, Men olisdagi bir xalqni qo‘zg‘ataman. Ularni sizga qarshi yuboraman. Ular kuchli, qadimgi bir xalqdir. Bu xalqning tilini sizlar bilmaysizlar, Ularning gaplarini tushunmaysizlar.

¹⁶Ularning hammasi mohir jangchilardir, O‘qlari o‘lim elchilaridir.

¹⁷Ular hosilingizni, noningizni yeb bitirishadi, O‘g‘il–qizlaringizni o‘ldirishadi. Mol–qo‘ylaringizni bo‘g‘izlashadi, Uzumzoru anjirzorlaringizni yo‘q qilishadi. Suyangan mustahkam shaharlaringizni Qilich bilan vayron qilishadi.”

¹⁸Egamiz shunday demoqda: “Shunday kunlarda ham Men O‘z xalqimni butunlay qirib yubormayman.

¹⁹Xalqim sendan: “Nima uchun Egamiz Xudo bunday ishlarni qildi?” deb so‘raganda, sen, ey Yeremiyo, ularga shunday javob ber: “Sizlar Xudoni tark etib, yurtimizda begona xudolarga xizmat qildingizlar. Endi o‘zga yurtda begonalarga xuddi shunday xizmat qilasizlar.”

²⁰“Borib, Yoqub nasliga shunday deb ayt, Yahudo xalqiga shunday deb e’lon qil:

²¹Sizlarning ko‘zingiz bor, ammo ko‘rmaysizlar, Qulog‘ingiz bor, ammo eshitmaysizlar. Ey aqlsiz, befarosat odamlar, Gaplarimni eshitinglar!”

²²Egamiz shunday demoqda: “Nahotki Mendan qo‘rqmasangizlar?! Mening oldimda titramasangizlar?! Axir, Men qumni dengizga chegara qilib qo‘ydim, Qumni o‘tib bo‘lmaydigan abadiy to‘siq qildim. To‘lqinlar ko‘pirib, ko‘tarilsa ham, To‘siqdan ustun kelolmaydi. Hayqirib o‘kirsa ham, Undan oshib o‘tolmaydi.

²³Ammo bu odamlar o‘jar va isyonkordir, Ular yo‘ldan ozib, Meni tark etdilar,

²⁴Ular ichlarida hech qachon aytmaydilar: “Egamiz Xudodan qo‘rqaylik, U o‘z vaqtida yomg‘ir yog‘diradi–ku. Kuzda ham, bahorda ham yerimizni sug‘oradi–ku. O‘rim–terim mavsumini o‘z vaqtida beradi–ku”, deb.

²⁵Gunohlaringiz sizlarni bulardan mahrum etdi, Ayblaringiz sizlarni barakadan judo etdi.

²⁶“Ha, xalqim orasida yaramas odamlar bor. Ular qushtutar kabi pisib yotishar, Tuzoq qo‘yib, odamlarni o‘z domiga tortishar.

²⁷Ovchi qafasni qushlarga to‘ldirganday, Ular uylarini hiylaga to‘ldirdilar. Shu tufayli kuchayib, davlat orttirdilar,

²⁸Semirib, yaltirab ketdilar. Qabih ishlarining cheki–chegarasi yo‘q. Ular yetimni oqlashga harakat qilmaydi, Yo‘qsilning haqini himoya etmaydi.

²⁹Ularni bu uchun jazolamaymi?! Shunday bir xalqdan o‘ch olmaymi?!” Egamizning kalomi shudir.

³⁰“Qo‘rqinchli va dahshatli ishlar Bu yurtda sodir bo‘lmoqda:

³¹Payg‘ambarlar yolg‘ondan bashorat qilmoqda, Ruhoniylar o‘zlaricha xalqni boshqarmoqda, Xalqqa bularning hammasi xush kelmoqda. Ammo oxirida ular nima qilar ekan–a?”