Read O‘zbek tilidagi Muqaddas Kitob, 2013 Yeremiyo 50 Bible Online

Yeremiyo 50 - O‘zbek tilidagi Muqaddas Kitob, 2013 bible

Yeremiyo 50

¹Egamiz Bobil yurti va Bobilliklarning diyori xususida Yeremiyo payg‘ambar orqali shunday so‘zlarni aytdi:

²“Xalqlarga e’lon qiling, xabar yetkazing! Bayroq ko‘tarib, yangilikni ayting. Hech narsa yashirmay shunday jar soling: “Bobil qulaydi, Ularning xudosi Bel sharmanda bo‘ladi, Xudosi Mardux parcha–parcha qilinadi. Bobil butlari xor bo‘ladi, Sanamlari sindirib tashlanadi.

³Shimoldagi bir xalq Bobil ustiga bostirib keladi. Ular butun yurtni vayron qilishadi. U yerda hech kim yashamaydigan bo‘ladi. Odamlar va hayvonlar u yerdan qochib ketadi.

⁴Egamiz shunday demoqda: “O‘sha kunlar kelganda, Isroil xalqi Yahudo xalqi bilan birga ko‘z yosh to‘kib, Egasi Xudoga intiladigan bo‘ladi.

⁵Ular yuzlarini Quddus tomon buradilar, u yerga olib boradigan yo‘lni surishtiradilar. Egamizga bog‘lanib qoladilar, U bilan unutilmas, abadiy bir ahd tuzadilar.

⁶Mening xalqim adashgan qo‘ylarga o‘xshaydi. Cho‘ponlari ularni yo‘ldan adashtirib, tog‘larga haydab yubordilar. Ular tog‘laru qirlarda darbadar kezib, oromgohini unutdilar.

⁷Qo‘ylarimga kim duch kelgan bo‘lsa, qo‘ylarimni yedi. Dushmanlar esa shunday dedi: “Bizning aybimiz yo‘q. Ularning o‘zlari Egasiga qarshi gunoh qildi. Egasi ular uchun asil yaylovday edi, ota–bobolari Egasiga umid bog‘lagan edi.”

⁸Ey Isroil xalqi, Bobildan qochib chiqing! Bobilliklarning yurtini tark eting! Suruvni boshqarib ketayotgan serkaday birinchi bo‘lib chiqing.

⁹Mana, Men shimoldagi qudratli xalqlarni Bobilga qarshi qo‘zg‘atyapman. Ular saf tortib, Bobilga hujum qiladilar. Bobil jangda mag‘lub bo‘ladi. Dushman o‘qlarining hammasi to‘g‘ri nishonga tegadi, ularning o‘qlari merganlarning o‘qlaridaydir.

¹⁰Bobil talon–taroj qilinadi, hamma talonchilari o‘ljaga to‘yadi.” Egamizning kalomi shudir.

¹¹Ey, xalqimni talagan Bobilliklar! Sizlar sevinib, xursand bo‘lyapsizlar, O‘tloqdagi buzoqday shodon sakrayapsizlar, Otlar kabi kishnayapsizlar.

¹²Ammo bilib qo‘ying, ona yurtingiz xor bo‘ladi, Siz tug‘ilgan yurt oyoq osti qilinadi. Yurtingiz xalqlar orasida arzimas bo‘lib qoladi, Cho‘l, qaqroq yer, sahroga aylanadi.

¹³Egamiz Bobilga qahrini sochadi, U yerda hech kim yashamaydi. Butunlay tashlandiq bo‘lib qoladi. U yerdan kim o‘tsa yoqasini ushlaydi, Bobil xarobalarini ko‘rib qotib qoladi.

¹⁴Ey merganlar! Bobil atrofiga saf torting! Unga qarshi o‘q uzing! O‘qingizni sira ayamang. Axir, Bobil Egamizga qarshi gunoh qildi.

¹⁵Har yoqdan Bobilga shunday deb xitob qiling! “Bobil taslim bo‘lyapti, Istehkomlari yiqilyapti, Devorlari o‘pirilib tushyapti.” Mana bu — Egamizning qasosidir. Sizlar ham Bobildan o‘ch oling, Qilmishlarini o‘z boshiga qaytarib soling.

¹⁶Bobildagi urug‘ sepuvchilarni yo‘q qiling, O‘rim mavsumida o‘roqchilarni o‘ldiring. Dushman qilichidan hamma qochsin, U yerdagi asirlar o‘z xalqi orasiga qaytsin, Ona yurtiga qochib borsin.

¹⁷Egamiz shunday deydi: “Isroil xalqi sherlar har yoqqa tumtaraqay qochirib yuborgan qo‘ylarga o‘xshaydi. Ilk bor Isroilga Ossuriya shohi tashlangan edi, Isroilning suyaklarini esa Bobil shohi Navuxadnazar g‘ajigan edi.

¹⁸Shu sababdan Men, Isroil xalqining Xudosi — Sarvari Olam, Ossuriya shohini qanday jazolagan bo‘lsam, Bobil shohini va uning yurtini ham xuddi shunday jazolayman.

¹⁹Isroilni o‘z yayloviga qaytarib olib kelaman, ular Karmil tog‘ining yon bag‘irlarida va Bashanda o‘tlab yuradilar. Efrayim qirlarida va Giladda yurib, qorinlarini to‘yg‘izadilar.

²⁰O‘sha kunlar kelganda Isroildan biron gunoh topilmaydi, Yahudo ham benuqson bo‘ladi. Zero, Men asragan xalqimni kechiraman.

²¹Egamiz shunday demoqda: “Marotayim yurtiga bostirib boringlar, Paxo‘d aholisiga hujum qilinglar, Ularni tamomila qirib bitiringlar. Sizlarga Men buyurgan hamma ishni bajaringlar.”

²²Bobildan jang shovqin–suroni ko‘tarilmoqda, Hamma yoq xarobaga aylanmoqda.

²³Bobil butun dunyoni bolg‘aday parcha–parcha qildi, Eh, endi o‘zi sinib parchalanib ketdi! Bobilning ahvoli xalqlarni vahimaga soldi.

²⁴Ey Bobil, Men senga tuzoq qo‘ygandim, Bilmasdan tuzog‘imga tushib qolding. Seni fosh qildim, qo‘lga oldim. Axir, sen Menga qarshi chiqqan eding.”

²⁵Egamiz O‘z aslahaxonasini ochdi, G‘azab qurollarini olib chiqdi. Sarvari Olam — Rabbiy Bobilliklar yurtida bir ish qilishga shaylandi.

²⁶Uzoq yurtlardan Bobilga hujum qiling! Omborxona eshiklarini buzing! Bobilni donday uyum–uyum qilib yig‘ing, Hammasini yo‘q qiling. Undan asar ham qolmasin!

²⁷Yosh jangchilarini o‘ldiring, Hammasini qirib tashlang. Bobilning holiga voy, uning kuni bitdi, Jazo oladigan vaqti yetdi.

²⁸Bobildan qochib kelayotganlarning gaplarini eshiting. Ular Quddusga kelib, Egamiz Xudo O‘z Ma’badi uchun olgan qasosini e’lon qilishmoqchi.”

²⁹“Bobilga hujum qilish uchun kamonchilarni yig‘inglar. Shaharni qurshovga olinglar, bironta odam qochib keta olmasin. Bobilliklarning qilgan ishiga yarasha jazosini beringlar, qilmishlarini o‘z boshiga qaytarib solinglar. Zero, ular Isroil xalqining Muqaddas Xudosi — Egamizga nisbatan takabburlik qildilar.

³⁰O‘sha kuni Bobilliklarning yigitlari maydonlarda o‘lib ketadi, hamma sipohlari halok bo‘ladi.” Egamizning kalomi shudir.

³¹Sarvari Olam — Rabbiy shunday demoqda: “Ey takabbur Bobil, Men senga qarshi chiqyapman! Sening kuning bitdi, Seni jazolaydigan vaqt yetdi.

³²Bu takabbur xalqing qoqilib tushadi, Seni hech kim turg‘izib qo‘ymaydi. Men hamma shaharlaringga o‘t qo‘yaman, Olov atrofdagi hamma narsani yondirib yuboradi.

³³Sarvari Olam shunday demoqda: “Isroil va Yahudo xalqlari zulm iskanjasida qolishdi. Dushmanlarning hammasi ularni qattiq tutib turibdi. Ularni qo‘yib yuborishdan bosh tortyapti.

³⁴Ammo ularning Qutqaruvchisi qudratlidir, Uning nomi Sarvari Olamdir. U xalqini astoydil himoya qiladi, yurtiga orom beradi. Bobilliklarni esa tinchlikdan mahrum qiladi.”

³⁵Egamiz shunday demoqda: “Bobilliklarga o‘lim! Butun Bobil aholisi, A’yonlariyu donishmandlariga o‘lim!”

³⁶Folbinlariga o‘lim! Naqadar ahmoqdir ular! Jangchilariga o‘lim! Naqadar vahimaga tushgan ular!

³⁷Otlariyu jang aravalariga o‘lim! Yollangan jangchilariga o‘lim! Ayollarga o‘xshagan zaifdir ular! Ziynatu boyliklarini yo‘q qiling, Talang, o‘lja qilib oling.

³⁸Butun yurtga qurg‘oqchilik kelsin! Daryolari qurib ketsin. Zero, bu yurt butlar makoni bo‘ldi, Vahimaga solgan o‘sha butlar tufayli Odamlari aqldan ozdi.

³⁹Shuning uchun Bobilda sirtlonlaru tuyaqushlar yashaydi. U yer yovvoyi dasht hayvonlarining makoniga aylanadi. Inson zoti endi u yerda hech qachon yashamaydi, Bobil to abad bo‘m–bo‘sh bo‘lib qoladi.

⁴⁰Sado‘m, G‘amo‘ra va atrofdagi shaharlar qanday vayron bo‘lgan bo‘lsa, Bobil ham shunday vayron bo‘ladi. U yerda hech kim yashamaydi.

⁴¹Ana, shimoldan olomon kelmoqda. Dunyoning bir chetida Qudratli xalqlaru ko‘p shohlar qo‘zg‘almoqda.

⁴²Kamonu nayzalar bilan qurollangan ular, Shafqat qilmaydigan zolimdir bu odamlar. Ular otlarini yeldiradi, Dengizday guvullab keladi. Ey qiz Bobil, ular senga qarshi chiqadi, Jang qilgani saf tortishadi.

⁴³Bobil shohi bu xabarni eshitdi, Qo‘llarida mador qolmadi. Dard tutgan ayol kabi Azobu iztirobda qoldi.

⁴⁴Men Iordan chakalakzoridagi arslonday yaylovdagi qo‘ylarga hujum qilaman. Bir zumda Bobil xalqini o‘z yurtidan haydab chiqaraman. O‘zim xohlagan insonni u yerga bosh qilaman. Axir, kim Menga teng kela oladi?! Kim Mendan hisobot so‘raydi?! Qanday cho‘pon Menga qarshi tura oladi?!

⁴⁵Shunday ekan, Bobil yurtiga qarshi Men tuzgan rejalarni eshitinglar. Bobil xalqi to‘g‘risida qilgan niyatlarimga quloq tutinglar: Yirtqichlar suruvdagi qo‘zichoqlarni sudrab ketadi. Qilmishlari tufayli yam–yashil yaylovlari payhon bo‘ladi.

⁴⁶Bobil gursullab qulaganda, yer yuzi larzaga keladi, xalqning dodu voylari olisdagi ellarga eshitiladi.