Read O‘zbek tilidagi Muqaddas Kitob, 2013 Yeremiyo 51 Bible Online

Yeremiyo 51 - O‘zbek tilidagi Muqaddas Kitob, 2013 bible

Yeremiyo 51

¹Egamiz shunday demoqda: “Men Bobilga va uning aholisiga qarshi, Halokat keltiradigan shamol qo‘zg‘ataman.

²Bobilga ajnabiylarni jo‘nataman. Ular bug‘doyni sovurganday, Bobilni sovurib tashlaydilar. Uning bor–yo‘g‘ini shilib oladilar. Kulfat kuni unga har yoqdan yopiriladilar.

³Bobil kamonchilarining sovut kiyishiga, O‘q uzishlariga imkon bermang. Bobil yigitlariga rahm qilmang! Lashkarini tamomila qirib bitiring.

⁴Ular Bobil yurtida chopib tashlanadilar, Ko‘chalarida og‘ir yaralanib yotadilar.

⁵Isroil va Yahudo xalqlari Sarvari Olam oldida gunoh qilgan bo‘lsalar ham, Xudosi ularni tark etmadi. Isroilning Muqaddas Xudosi ulardan yuz o‘girmadi.

⁶Bobildan qochib chiqinglar! Joningizni qutqarib qolinglar! Bobilning gunohi tufayli qirilib ketmanglar, Zotan Egamiz Bobildan o‘ch olmoqda, Qilgan qilmishlariga yarasha jazosini bermoqda.

⁷Bobil Egamizning qo‘lidagi oltin kosaday edi, Bobil butun dunyoni mast qildi. Dunyo xalqlari kosadagi sharobdan ichdi, Hammasi aqldan ozdi.

⁸Bobil birdaniga qulaydi, buzib tashlanadi. Uning uchun faryod qiling! Yaralariga malham surting, Zora tuzalib qolsa!

⁹Bobilda yashagan ajnabiylar aytishadi: “Bobilni tuzatmoqchi edik, ammo u tuzalmadi. Endi uni tashlab ketaylik, Har birimiz yurtimizga qaytib ketaylik. Axir, Bobilning jazosi boshidan oshdi, Ko‘kdagi bulutlargacha yetib bordi.”

¹⁰Isroil xalqi deydi: “Egamiz bizni oqladi. Yuringlar, Quddusga boraylik, Egamiz Xudoning buyuk ishlarini U yerda e’lon qilaylik.

¹¹O‘tkirlang o‘qlarni! To‘ldiring o‘qdonlarni! Egamiz O‘z Ma’badi uchun Bobilliklardan o‘ch olmoqchi bo‘ldi. U butun Bobil yurtini vayron qilishni rejalashtirib qo‘ygan edi. Rejasini amalga oshirish uchun Midiya shohlarini Bobilga qarshi qo‘zg‘atgan edi.

¹²Bobilga qarshi bayroq ko‘taring. Qo‘riqchilar safini kuchaytiring, Soqchilar qo‘ying. Pistirma qo‘yishga tayyor turing. Egamiz rejalarini amalga oshiradi, Bobilga qarshi aytganlarini bajaradi.

¹³Ey serob suvlar bo‘yidagi shahar, Boy xazinaga ega bo‘lgan shahar! Sening kuning bitdi. Hayoting ipi uzildi.

¹⁴Sarvari Olam O‘z nomi bilan qasamyod qilib dedi: “Chigirtkaday gala–gala dushmanni senga qarshi yuboraman. Ular yurting uzra g‘olibona hayqiradi.”

¹⁵Egamiz qudrati ila yerni yaratdi, Donoligi ila dunyoni bunyod etdi, Idroki ila osmon gumbazini o‘rnatdi.

¹⁶Uning ovozidan osmondagi suvlar gulduraydi, U dunyoning to‘rt burchidan bulutlarni olib keladi. Yomg‘ir yog‘dirishdan oldin momaqaldiroq chaqtiradi, Omborlaridagi shamollardan esdiradi.

¹⁷Uning oldida hamma odamlar ahmoq va nodondir. Zargarlar yasagan butlari tufayli sharmanda bo‘lishadi. Yasagan sanamlari soxtadir, ularning joni yo‘q.

¹⁸Bu betayin butlar aldamchidir. Ularni jazolagan kunim yo‘q bo‘lishadi.

¹⁹Yoqubning Xudosi esa unday emas. U butun borliqni yaratgan, Merosi bo‘lgan Isroilni bino qilgan. Uning nomi Sarvari Olamdir.

²⁰Ey Bobil, sen Mening bolg‘am, urush qurolimsan. Sen bilan ezdim Men xalqlarni, Sen bilan parchaladim shohliklarni.

²¹Sen bilan pachaqladim otlaru chavandozlarni, Majaqladim jang aravalariyu aravakashlarni.

²²Sen bilan ezdim erkagu ayollarni, Sen bilan urdim yoshu qarilarni, Sen bilan o‘ldirdim yigitu qizlarni,

²³Sen bilan ezdim cho‘ponlaru ularning suruvlarini, Sen bilan urdim dehqonlaru ularning ho‘kizlarini, Sen bilan o‘ldirdim hokimlaru a’yonlarni.

²⁴Egamiz shunday demoqda: “Quddusga qilgan barcha yovuzliklari uchun Bobilliklarni va butun Bobil yurtini sizning ko‘zingiz oldida jazolayman.”

²⁵Egamiz shunday demoqda: “Ey Bobil, sen tog‘day bo‘lib, Butun dunyoni vayron qilding. Shu bois Men senga qarshiman! Men senga qarshi qo‘l ko‘taraman, Seni qoyalardan pastga dumalatib yuboraman, Kuyib abgor bo‘lgan toqqa aylantiraman.

²⁶Sendan na peshtoq uchun tosh, Na poydevor uchun tosh olinadi. Sen to abad tashlandiq bo‘lib qolasan.” Egamizning kalomi shudir.

²⁷“Bayroqni ko‘taring! Xalqlarga burg‘u chaling! Xalqlarni Bobilga qarshi urushga tayyorlang. Ararat, Minnax va Ashkanoz shohliklarini Unga qarshi to‘plang. Bobilga qarshi jang qiladigan lashkarboshini tayinlang, Chigirtka galasiday ko‘p otlar keltiring.

²⁸Xalqlarni Bobilga qarshi urushga tayyorlang. Midiya shohlarini, ularning hokimu a’yonlarini, Ularning qo‘li ostidagi hamma yurtlarni Bobilga qarshi safarbar qiling.

²⁹Butun dunyo dag‘–dag‘ titramoqda, Zero, Egamiz O‘z rejasini amalga oshirmoqda. Bobil vayron bo‘ladi, Evoh, kimsasiz huvullab qoladi.

³⁰Bobil sipohlari jangdan voz kechishadi, Qal’alarida pisib yotishadi. Ularning madori qolmaydi, Ayollarday zaif bo‘lib qolishadi. Bobilning dushmani shahar binolariga o‘t qo‘yadi, Shahar darvozalarini buzadi.

³¹Chopar ketidan chopar yugurar, Xabarchi ketidan xabarchi kelar. Bobil shohiga shunday xabar yetkazmoqchi ular: “Shahringiz quladi,

³²Daryoning kechuv joylari qo‘lga olindi, To‘qaylarga o‘t qo‘yildi, Sipohlar sarosimaga tushdi.”

³³Isroil xalqining Xudosi — Sarvari Olam shunday demoqda: “Qiz Bobil xirmondagi bug‘doyga o‘xshaydi. Tez orada o‘rim vaqti yetib keladi, Hademay u yanchiladi.”

³⁴Quddus aholisi shunday dedi: “Bobil shohi Navuxadnazar bizni g‘ajidi, ezdi, Bizni bo‘m–bo‘sh idishday qilib qo‘ydi. U ajdahoday bizni yamladi, Lazzatlarimiz bilan qornini to‘yg‘izdi, Keyin esa bizni tupurib tashladi.”

³⁵Quddus aholisi aytsin: “Majaqlangan tanam uchun Bobildan o‘ch olinsin”, deya. Sion aholisi aytsin: “To‘kilgan qonim uchun Bobilliklar jazolansin”, deya.

³⁶Egamiz shunday demoqda: “Men da’voingizni eshitib, Sizni himoya qilaman. Sizlar uchun o‘ch olaman. Bobilning bulog‘ini quritaman, Daryolarini suvsiz qoldiraman.

³⁷Bobilni bir uyum toshga aylantiraman, Chiyabo‘rilarning makoni qilaman. Bobilning ahvolidan odamlar dahshatga tushadi, Uni ko‘rganlar qotib qoladi. U yerda biron kimsa yashamaydi.

³⁸Bobilliklar sher kabi o‘kirishadi, Sher bolalariday bo‘kirishadi.

³⁹Ayni qizishgan paytlarida Ularga o‘tkir ichimlikdan ichiraman. Ularni mastu shodon qilaman. So‘ng ular abadiy uyquga ketishadi, Hech qachon uyg‘onishmaydi.” Egamizning kalomi shudir.

⁴⁰“Men ularni qo‘zichoq, qo‘chqor va takalarday Qassob oldiga olib boraman.”

⁴¹Eha, Bobil shahri quladi–ya! Butun dunyo g‘ururi mag‘lub bo‘ldi–ya! Uning qismatidan xalqlar dahshatga tushdi!

⁴²Dengiz suvlari Bobilni bosdi, Shovqin to‘lqinlar uni qoplab oldi.

⁴³Ana, shaharlari xarob bo‘ldi, Ular cho‘lu sahroga aylandi. Endi u yerda hech kim yashamaydi, Inson qadami u yerga yetib bormaydi.

⁴⁴Bobil xudosi Belni Men jazolayman, Yutganlarini og‘zidan chiqaraman. Endi xalqlar uning oldiga oqib bormaydi, Bobil devorlari qulab tushadi.

⁴⁵Ey xalqim, chiqib ket u yerdan! Qochib qol Egangning qahridan! Joningni qutqargin!

⁴⁶Yurtdagi mish–mishlar sizni qo‘rqitmasin, Yuragingizga g‘ulg‘ula solmasin. Bir yil bir mish–mish bo‘ladi, Keyingi yili boshqasi chiqadi. Ha, yurtdagi zo‘ravonlik haqida mish–mish chiqadi, Shohlar orasidagi urush haqida mish–mish tarqaladi.

⁴⁷Mana, shunday kun kelyaptiki, Men Bobilning soxta xudolarini jazolayman. Butun Bobil yurti sharmanda bo‘ladi, Ko‘chalarida jasadlar yotadi.

⁴⁸Ha, Bobilga qarshi shimoldan Qirg‘in keltiruvchi keladi. Shunda Bobilning halokatidan Yeru osmon shodlanadi, U yerdagi barcha mavjudot xursand bo‘ladi”, deb aytmoqda Egamiz.

⁴⁹“Axir, Bobil Isroil xalqining umriga zomin bo‘ldi, Yer yuzidagi ko‘p xalqlarning boshini yedi, Ana endi uning qilmishlari o‘zining boshiga yetdi.

⁵⁰Ey, qilichdan omon qolganlar! Qochinglar, o‘ylanmanglar! Olis yurtda Egangizni eslanglar. Quddus haqida o‘ylanglar.

⁵¹Sizlar aytasiz: “Sharmanda bo‘ldik. Haqoratlar eshitdik. Yuzimiz shuvut. Axir, Egamiz uyining muqaddas xonalarini Ajnabiylar oyoq osti qildi.”

⁵²Egamiz esa shunday demoqda: “Mana, shunday kunlar kelyaptiki, Men Bobilning soxta xudolarini jazolayman. Butun yurt uzra Yaradorlarning faryodlari eshitiladi.

⁵³Bobil osmonga chiqib olsa ham, Baland qal’asini mustahkam qilsa ham, Men unga qarshi qirg‘in keltiruvchini yuboraman.” Egamizning kalomi shudir.

⁵⁴Egamiz shunday demoqda: “Ana, Bobil xalqidan dodu faryod ko‘tarilmoqda, Bobil yurtidan vayron–talqon sadolari kelmoqda.”

⁵⁵Egamiz Bobilni vayron qiladi, Shang‘illagan tovushini o‘chiradi. Dushmanlar shiddatli to‘lqinlarday o‘kiradi, Quloq teshgudek qilib baqiradi.

⁵⁶Qirg‘in keltiruvchi Bobilga qarshi chiqadi, Sipohlarini asirlikka oladi. Kamonlarini sindiradi. Axir, Egamiz jazolaydigan Xudodir, U rosa Bobilning jazosini beradi.

⁵⁷Xudo Shohdir, Sarvari Olamdir Uning nomi. U shunday demoqda: “Mast qilaman Bobil amaldorlariyu donishmandlarini, Hokimlarini, a’yonlariyu jangchilarini. Ular abadiy uyquga ketadilar, Hech qachon uyg‘onmaydilar.”

⁵⁸Sarvari Olam shunday demoqda: “Bobilning qalin devorlari yer bilan yakson qilinadi, Baland darvozalari yondirib tashlanadi. Ellar behuda tinkasini quritadi. Xalqlarning ter to‘kib erishganlari olovga yem bo‘ladi.”

⁵⁹Yahudo shohi Zidqiyo hukmronligining to‘rtinchi yili. Shoh Zidqiyo Bobilga bormoqchi bo‘lib yo‘lga otlanganda, Yeremiyo payg‘ambar Neriyoning o‘g‘li, Maxsiyoning nevarasi Sarayoga ko‘rsatmalar berdi. Sarayo bu safarda javobgar bir shaxs edi.

⁶⁰Yeremiyo o‘rama qog‘ozga Bobilning boshiga tushadigan barcha kulfatlarni batafsil bayon qilib yozdirgan edi.

⁶¹U Sarayoga shunday tayinladi: “Bobilga borganingdan keyin, o‘rama qog‘ozdagi hamma so‘zlarni xalqqa baland ovozda o‘qib ber.

⁶²Keyin esa shunday xitob qil: “Ey Egam, Sen O‘zing bu joyni vayron qilaman, degansan. Bu yerda na odamlar, na hayvonlar yashaydi, bu joy to abad tashlandiq bo‘ladi, deb aytgansan.”

⁶³O‘rama qog‘ozni o‘qib bo‘lganingdan keyin, unga bir tosh bog‘lagin–da, Furot daryosining o‘rtasiga uloqtirib yubor.

⁶⁴Keyin shunday deb ayt: “Bobil ham shunga o‘xshab cho‘kib ketadi. Egamiz Bobilga yog‘diradigan kulfatlar tufayli Bobil hech qachon o‘nglanmaydi. Uning butun aholisi o‘ladi.” Yeremiyoning bashoratlari tugadi.