Read O‘zbek tilidagi Muqaddas Kitob, 2013 Yeremiyo 52 Bible Online

Yeremiyo 52 - O‘zbek tilidagi Muqaddas Kitob, 2013 bible

Yeremiyo 52

¹Zidqiyo yigirma bir yoshida shoh bo‘ldi va Quddusda o‘n bir yil hukmdorlik qildi. Onasining ismi Xamutal bo‘lib, Libnalik Yeremiyoning qizi edi.

²Zidqiyo ham, Yohayiqim kabi, Egamiz oldida qabih ishlar qilgani uchun

³Egamiz Quddus va Yahudo xalqidan g‘oyat g‘azablangan, oqibatda ularni O‘z huzuridan quvib yuborgan edi. Zidqiyo Bobil shohiga qarshi isyon ko‘tardi.

⁴Zidqiyo hukmronligining to‘qqizinchi yili, o‘ninchi oyning o‘ninchi kunida Bobil shohi Navuxadnazar Quddusga qarshi bor lashkarini tortib kelib, shaharni qamal qildi. Shahar devori atrofida baland qurilmalar yasatdi.

⁵Shoh Zidqiyo hukmronligining o‘n birinchi yiligacha shahar qamalda qoldi.

⁶To‘rtinchi oyning to‘qqizinchi kuni shaharda ocharchilik shu qadar kuchaydiki, xalq bir luqma non topolmay qoldi.

⁷Bobilliklar Quddus devorini yorib kirdilar. Ular Quddusni har tomondan qurshab olishgan bo‘lsalar–da, Yahudo sipohlari shoh bilan birga qochib ketdilar. Ular tunda saroyning bog‘i yaqinidagi ikki devor orasidagi darvozadan chiqib, Iordan vodiysi tomonga qochdilar.

⁸Ammo Bobil sipohlari shohning orqasidan quvib, Yerixo tekisligida Zidqiyoga yetib oldilar. Zidqiyoning hamma lashkarlari shohni tashlab qochib ketdilar.

⁹Bobil sipohlari shoh Zidqiyoni ushlab, Xomat yurtidagi Rivlo shahriga, Bobil shohi huzuriga olib keldilar. Bobil shohi Zidqiyoni o‘sha yerda hukm qildi.

¹⁰Rivloda Zidqiyoning ko‘zi oldida hamma o‘g‘illarini, so‘ng Yahudo a’yonlarini qatl qildi.

¹¹Zidqiyoning esa ko‘zlarini o‘yib, uni kishanlab qo‘ydi. Bobil shohi uni o‘zi bilan Bobilga olib ketdi. Zidqiyo umrining oxirigacha zindonda yotdi.

¹²Bobil shohi Navuxadnazar hukmronligining o‘n to‘qqizinchi yili, beshinchi oyining o‘ninchi kunida Bobil shohi xizmatidagi qo‘riqchilar sardori Nabizaradon Quddusga kirdi.

¹³U Egamizning uyiga, shoh saroyiga, Quddusdagi hamma uylarga, har bir hashamatli imoratga o‘t qo‘ydi.

¹⁴Qo‘riqchilar sardori boshchiligida hamma Bobil lashkarlari Quddus devorlarini yiqitdilar.

¹⁵Nabizaradon ba’zi qashshoqlarni, shaharda tirik qolganlarni, Bobil shohi tomonga o‘tgan qochoqlaru qolgan–qutgan hunarmandlarni asir qilib olib ketdi.

¹⁶Uzumchilik va dehqonchilik bilan mashg‘ul bo‘lsinlar, deya hech vaqosi yo‘q, qashshoq odamlardan ba’zilarinigina qoldirdi, xolos.

¹⁷Bobilliklar Egamizning uyidagi bronza ustunlarni, aravalarni, bronza hovuzni parchaladilar, hamma bronzani Bobilga olib ketdilar.

¹⁸Egamizning uyida xizmat paytida ishlatiladigan buyumlarni — qozonlarni, kuraklarni, qaychilarni, tog‘orachalar va kurakchalarni, barcha bronza ashyolarni ham olib ketdilar.

¹⁹Qo‘riqchilar sardori Nabizaradon oltin va kumushdan yasalgan tog‘oralarni, olovkuraklarni, tog‘orachalarni, tovoqlarni, chiroqpoyalarni, kurakchalarni va sharob nazri uchun ishlatiladigan idishlarni ham olib ketdi.

²⁰Egamizning uyi uchun shoh Sulaymon yasattirgan ikkita ustunga, hovuzga, hovuz ostidagi o‘n ikkita buqaga va aravalarga behisob bronza sarf qilingan edi.

²¹Har bir ustunning balandligi 18 tirsak, tevaragi 12 tirsak edi. Ustunlarning ichi kavak bo‘lib, devorlarining qalinligi to‘rt enli edi.

²²Ikkala ustunning tepasida bittadan ustunqosh bor edi. Ustunqoshlarning balandligi 5 tirsakdan, atroflari bronzadan yasalgan to‘rsimon bezak va anor tasviri bilan bezatilgan edi.

²³Ustunqoshning har bir tomoniga to‘qson oltita anor tasviri tushirilgan edi. Hammasi bo‘lib to‘rsimon bezakdagi anorlar soni yuzta edi.

²⁴Qo‘riqchilar sardori Nabizaradon oliy ruhoniy Sarayoni, undan keyingi ruhoniy Zafaniyoni va uchta darvozabonni ham asirga oldi.

²⁵Quddusda qolgan sipohlarning lashkarboshisini, shohning yettita shaxsiy maslahatchisini, xalqni lashkar safiga yozgan lashkarboshining kotibini va xalqdan shaharda qolgan oltmish kishini ham bandi qildi.

²⁶Ularning hammasini Rivloga, Bobil shohi huzuriga olib keldi.

²⁷Bobil shohi ularni Xomat yurtida, Rivloda qatl qildi. Shunday qilib, Yahudo xalqi o‘zlarining yurtidan surgun qilindilar.

²⁸Navuxadnazar surgun qilgan xalqning miqdori quyidagichadir: Hukmronligining yettinchi yili 3.023 nafar yahudiyni,

²⁹o‘n sakkizinchi yili Quddus aholisidan 832 nafar kishini,

³⁰yigirma uchinchi yili qo‘riqchilar sardori Nabizaradon Yahudodan 745 nafar kishini surgun qildi. Hammasi bo‘lib surgun qilingan xalqning miqdori 4.600 kishi edi.

³¹Yahudo shohi Yohayixin surgunda yurganiga o‘ttiz yetti yil bo‘lganda, Evilmardux Bobil shohi bo‘ldi. Evilmardux o‘sha yilning o‘n ikkinchi oyi yigirma beshinchi kuni Yahudo shohi Yohayixinga iltifot ko‘rsatib, uni zindondan olib chiqdi.

³²Unga yaxshi munosabatda bo‘ldi, Bobilga surgun qilingan boshqa shohlardan ko‘ra balandroq martaba berdi.

³³Shunday qilib, Yohayixin zindon kiyimlarini yechdi. Umr bo‘yi doimo Bobil shohining dasturxonidan taom yedi.

³⁴Umrining oxirigacha Bobil shohi tarafidan kundalik ehtiyoji har doim qondirildi.