Read O‘zbek tilidagi Muqaddas Kitob, 2013 Yeremiyo 7 Bible Online

Yeremiyo 7 - O‘zbek tilidagi Muqaddas Kitob, 2013 bible

Yeremiyo 7

¹Yeremiyoga Egamizning quyidagi so‘zi ayon bo‘ldi:

²“Egang uyining darvozasi oldiga bor. O‘sha yerda turib, baland ovozda shunday deb ayt: Ey jamiki Yahudo xalqi — Egamizga sajda qilish uchun mana bu darvozalardan kirganlar! Egamizning gaplarini eshitinglar.

³Isroil xalqining Xudosi — Sarvari Olam shunday demoqda: “Yomon yo‘lingizdan qaytinglar. Turmush tarzingizni o‘zgartiringlar. Shundagina bu yurtda yashashingizga ijozat beraman.

⁴“Egamizning Ma’badi shu yerda! Mana, Egamizning Ma’badi, shuning uchun hech qanday xavf–xatar yo‘q!” degan yolg‘on so‘zlarga ishonmang.

⁵Agar haqiqatan yomon yo‘lingizdan qaytsangiz, turmush tarzingizni o‘zgartirsangiz, bir–biringizga nisbatan adolatli bo‘lsangiz,

⁶musofirlarga, yetim va bevalarga zulm qilmasangiz, bu yurtda aybsiz odamning qonini to‘kmasangiz, boshingizga falokat keltiradigan boshqa xudolarga ergashmasangiz,

⁷bu yerda qolishingizga ijozat beraman. Men ota–bobolaringizga abadiy mulk qilib bergan bu yurtda sizlar yashayverasizlar.

⁸Ammo sizlar yolg‘on so‘zlarga ishonyapsizlar.

⁹O‘g‘irlik qilyapsizlar, odam o‘ldiryapsizlar, zino qilyapsizlar, yolg‘ondakam qasam ichyapsizlar, Baalga nazrlar atab, o‘zingiz bilmagan xudolarga ergashyapsizlar.

¹⁰Shunday ekan, nima uchun sizlar Mening nomim bilan atalgan uyimga kelib, “Biz xavf–xatardan xolimiz!” deb aytyapsizlar?! Bunday jirkanch ishlarni davom ettirish uchunmi?!

¹¹Aytinglar–chi, Mening nomim bilan atalgan bu uy sizlar uchun qaroqchilar uyasi bo‘lib qoldimi?! Qilgan barcha ishlaringizni Men O‘z ko‘zim bilan ko‘rib turibman–ku!” deb aytmoqda Egamiz.

¹²“Qani, Shilo‘ shahriga boringlar! Men ilk bor o‘sha joyni ulug‘lanishim uchun tanlagan edim. Ammo xalqim Isroilning qabihliklari tufayli o‘sha joyni ne ahvolga solganimni ko‘rib qo‘yinglar.

¹³Bunday yovuz ishlarni qilayotganingizda, Men sizlarga qayta–qayta gapirdim. Ammo sizlar gaplarimga quloq solmadingiz. Sizlarga xitob qildim, ammo javob bermadingiz”, deb aytmoqda Egamiz.

¹⁴“Shunday ekan, Men Shilo‘ni ne ko‘yga solgan bo‘lsam, O‘z nomim bilan atalgan uyimni ham o‘sha ahvolga solaman. Sizlar umid bog‘lagan bu uyimni va ota–bobolaringizga bergan bu yurtni Shilo‘ning ahvoliga tushiraman.

¹⁵Qondoshingiz Efrayim xalqini uloqtirganimday, sizlarni ham O‘z huzurimdan uloqtirib tashlayman.”

¹⁶Egamiz shunday dedi: “Ey Yeremiyo, sen bu xalq uchun ibodat qilma! Ular uchun faryod qilib, iltijo qilma! Ularni deb, Menga yolvorma! Men senga quloq solmayman.

¹⁷Yahudo shaharlarida, Quddus ko‘chalarida ular nimalar qilayotganini ko‘rmayapsanmi?!

¹⁸Bolalar o‘tin yig‘ishadi, otalari olov yoqishadi, xotinlar esa xamir qorib, Samo Qirolichasiga atab nonlar yopishadi. G‘azabimni keltirish uchun begona xudolarga sharob nazrini keltirishadi.”

¹⁹Egamiz shunday demoqda: “Bu qilmishlari bilan ular Menga emas, o‘zlariga zarar keltirmoqda–ku! O‘zlarini sharmanda qilishmoqda–ku!”

²⁰Shu sababdan, Egamiz Rabbiy demoqda: “Men qahru g‘azabimni bu zaminga, insonlaru hayvonlarga, daladagi daraxtlaru ekinlarga sochaman. G‘azabim so‘nmas olovday yonadi.”

²¹Isroil xalqining Xudosi — Sarvari Olam shunday demoqda: “Sizlar qurbonliklarning go‘shtini yeysizlar, kuydiriladigan qurbonliklaringizning go‘shtini ham o‘zlaringiz yeyaveringlar.

²²Men ota–bobolaringizni Misrdan olib chiqqanimda ularga nafaqat qurbonliklar va kuydiriladigan qurbonliklarga oid amrlar bergan edim,

²³balki ularga yana shunday amr bergan edim: “Menga itoat qiling! Shunda Men sizning Xudoyingiz, sizlar esa Mening xalqim bo‘lasizlar. Faqat Men ko‘rsatgan yo‘ldan yuringlar, shunda baxtiyor bo‘lasizlar.”

²⁴Ammo ular itoat qilishni ham, quloq solishni ham xohlamadilar. Yovuz yuraklarining o‘jarliklarini qildilar. Oldinga yurmay, orqaga ketdilar.

²⁵Ajdodlaringiz Misrdan chiqqan kunidan boshlab shu kunga qadar, ketma–ket payg‘ambar qullarimni ularning oldilariga jo‘natdim.

²⁶Ammo ular Menga quloq ham solmadilar, e’tibor ham bermadilar. Ular qaysar edilar, yovuz qilmishlari bilan ota–bobolaridan ham o‘tib tushdilar.

²⁷Ey Yeremiyo, sen borib, aytganlarimning hammasini ularga yetkazasan, lekin ular senga quloq solishmaydi. Ularga xitob qilasan, ammo ular senga javob berishmaydi.

²⁸Shuning uchun sen ularga shunday deb ayt: “Sizning xalqingiz Egasi Xudoga itoat qilmadi, Uning gapiga kirmadi. Haqiqat qolmabdi, og‘zingizdan haq so‘z chiqmaydigan bo‘ldi.”

²⁹“Ey Quddus aholisi, aza tuting! Sochingizni qirib tashlang. Marsiyangiz yalang qirlar uzra nola qilsin, Zero, Egamizning toqati toq bo‘ldi, U bu naslni rad etib, tashlab ketdi.

³⁰Egamiz shunday demoqda: “Yahudo xalqi o‘zining Egasi oldida qabihliklar qildi. Ular Mening nomim bilan atalgan uyimga makruh butlarini o‘rnatdilar. Uyimni harom qildilar.

³¹Shunisi yetmagandek, Xinnum soyligidagi Tofatda sajdagohlar qurdilar. U yerda o‘z o‘g‘ilu qizlarini olovda kuydirdilar. Ammo Men ularga buni amr qilmaganman, bunaqasini xayolimga ham keltirmaganman.”

³²Egamiz shunday demoqda: “Qarab turing! Shunday kunlar keladiki, odamlar bu joyni Tofat yoki Xinnum soyligi, deb atamaydi. Bu joy “Qirg‘in vodiysi” deb nom oladi. U yerda ko‘p murdalar dafn qilinadi, murdalar ko‘pligidan qabrlarga joy yetmay qoladi.

³³Bu xalqning jasadlari qushlarga va yovvoyi hayvonlarga yem bo‘ladi, hech kim ularni haydamaydi.

³⁴Yahudo shaharlarida va Quddus ko‘chalarida shodu xurramlik sadolari bo‘lmaydi, kelin–kuyovning ovozi eshitilmaydi. Bu yurt huvullab qoladi.”