Read O‘zbek tilidagi Muqaddas Kitob, 2013 Yeremiyo 9 Bible Online

Yeremiyo 9 - O‘zbek tilidagi Muqaddas Kitob, 2013 bible

Yeremiyo 9

¹Koshkiydi, boshim bir buloq bo‘lsa, Ko‘zlarim yoshlar chashmasi bo‘lsa. Xalqim halokatga uchragani uchun, Kechayu kunduz yig‘lagan bo‘lar edim!

²Qaniydi, sahroda bir qo‘nolg‘am bo‘lsaydi, Men xalqimni tark etgan bo‘lardim, Ularning orasidan chiqib ketardim! Axir, ularning hammasi zinokor, xoinlar to‘dasidir.

³Egamiz shunday demoqda: “Xalqim tillarini kamon kabi qayirib, Yolg‘on so‘zlarni o‘qdek otishadi. Xalqim nohaqlik qilib, yurtda kuchayib bormoqda, Yomonlik ketidan yomonlik qilmoqda, Ular Meni tan olmaydilar.”

⁴“Qo‘shningizdan ehtiyot bo‘ling, Qarindoshingizga ishonmang. Hamma qarindoshingiz yolg‘onchi, Hamma qo‘shningiz tuhmatchi.

⁵Qo‘shni qo‘shnisini aldaydi, Birontasi to‘g‘ri gap gapirmaydi. Tili yolg‘on gapirishga o‘rganib qolgan. Holdan toyguncha gunoh qilishadi.

⁶Ey Yeremiyo, sen yolg‘onchilar orasida yashayapsan, Ular yolg‘onlari dastidan Meni tan olishni xohlamayaptilar.” Egamizning kalomi shudir.

⁷Shu sababdan Sarvari Olam demoqda: “Men xalqimni sinovdan o‘tkazib, poklayman. Ularni boshqa nima ham qilar edim?!

⁸Ularning tili halokat keltiradigan o‘qqa o‘xshaydi, Og‘zidan faqat yolg‘on so‘zlar chiqadi. Qo‘shnilariga shirin gapirishadi, Ichlarida esa ularni tuzoqqa tushirmoqchi bo‘lishadi.

⁹Shunday ekan, bular uchun ularni jazolamaymi?! — deb aytmoqda Egamiz, Shunday bir xalqdan o‘ch olmaymi?!”

¹⁰Men tog‘lar uchun faryod qilib, yig‘layman, Dashtdagi yaylovlar uchun marsiya aytaman, Chunki yaylovlarning hammasi qurib qolgan. U yerdan hech kim o‘tmaydi, Sigirlarning ma’rashi eshitilmaydi. Qushlaru hayvonlar bu yerlarni tark etgan.

¹¹Egamiz shunday dedi: “Men Quddusni vayron qilaman, Bu yerni chiyabo‘rilarning makoniga aylantiraman. Yahudo shaharlari huvullab qoladi, U yerda bironta ham odam qolmaydi.”

¹²Men Egamizdan so‘radim: “Ey Egam, nechun bu yurt shu qadar vayron bo‘lib ketdi? Nechun sahro kabi huvullab qoldi? U yerda bironta ham sayyoh ko‘rinmaydi. Qaysi farosatli odamning bunga aqli yetadi?! Sen bularni kim orqali xalqqa yetkazasan?”

¹³Egamiz shunday javob berdi: “Men xalqimga qonunlar bergan edim, lekin ular rad etdilar, Menga itoat etmadilar, qonunlarimga rioya qilmadilar.

¹⁴Aksincha, yuraklarining o‘jarliklarini qildilar, ota–bobolari o‘rgatgandek Baalga sig‘indilar.”

¹⁵Shuning uchun Isroil xalqining Xudosi — Sarvari Olam demoqda: “Men bu xalqqa achchiq o‘tdan yedirib, zaharli suvdan ichiraman.

¹⁶O‘zlari va ota–bobolari bilmagan xalqlar orasiga Men ularni tarqatib yuboraman. Ularning ketidan qilich jo‘natib, qirdirib tashlayman.”

¹⁷Sarvari Olam shunday demoqda: “Endi quloq soling! Yig‘ichilarni chaqirib keling, Ularning eng mohirlari kelsin.”

¹⁸Xalq shunday dedi: “Ularga ayting, tezroq kelsin. Biz uchun marsiya aytishsin, Ko‘zimizdan yoshlar oqsin, Kipriklarimizdan suvlar to‘kilsin

¹⁹Ana, Quddusdan faryod eshitilmoqda: “Xonavayron bo‘ldik! Qanday sharmandagarchilik! Yurtimizni tark etishga majburmiz, Uylarimiz vayron bo‘ldi.”

²⁰Ey ayollar, Egamizning so‘zini eshiting, Uning og‘zidan chiqqan har bir so‘ziga quloq soling. Qizlaringizga marsiya aytishni o‘rgating, Bir–biringizga yig‘i qo‘shig‘ini yodlating.

²¹Ana, derazalardan o‘lim o‘rmaladi, Qal’alarimizga kirib oldi. Ko‘chalardagi bolalarni yo‘q qilib tashladi, Maydonlardagi yoshlarni qirib yubordi.

²²Ey ayollar, sizlar ayting: — Egamiz shunday demoqda: “Odamlarning jasadlari yotadi Daladagi go‘ng kabi, O‘roq solingan bug‘doy kabi. Ularni hech kim yig‘ishtirib olmaydi.”

²³Egamiz shunday deb aytmoqda: “Donolar donoligi bilan maqtanmasin. Kuchlilar kuchi bilan maqtanmasin. Boylar boyligi bilan maqtanmasin.

²⁴Kim maqtanmoqchi bo‘lsa, Xudoni bilaman, deb maqtansin, Xudoni tushunaman, deb maqtansin. Men Egangizman. Men mehr–shafqat ko‘rsataman, yer yuzida adolatu haqiqat ila ish tutaman. Bunday qilishdan Men zavqlanaman.” Egamizning kalomi shudir.

²⁵Egamiz shunday demoqda: “Shunday kunlar keladiki, badani sunnat qilingan, yuragi esa sunnat qilinmagan odamlarning hammasini Men jazolayman.

²⁶Ha, Men Misrliklarni, Edom naslini, Ommon xalqini, Mo‘abliklarni, sochini oldirib yuradigan cho‘l qabilalarining hammasini va ular bilan birga O‘z xalqim Yahudoni jazolayman. Chunki aslida, bu xalqlarning hammasi sunnatsiz, ularning yuragi sunnat qilinmagan.”